بلوچ جُنز ءُ پدائی اُرش
نبشتہ کار: میرین بلوچ
دی بلوچستان پوسٹ
وھدیکہ 1948ءَ پاکستان تاکت ءِ زور ءَ کیت بلوچ ءِ سرڈگار ءِ سر ءَ کبزہ کنت ءُ بلوچ ءَ ایردست کنت، ایردستی ءِ بِنداتی روچاں چہ بلوچ زورگیر ءِ کبزہ ءِ بگیری ءَ وتی جُنز ءَ بِندات کنت ءُ پاکستان ءِ زوراکی ءُ بلوچ راج ءِ سر ءَ کبزہ کنگ ءِ بَگیری ءَ جنگ کنت۔ بلوچ ءِ جنگ ءِ جُتائیں دُور ھست اَنت کہ بِنداتی دور ءَ پِرنس کریم گوں وتی ھمراھاں آجوئی ءِ جُنز ءَ بِندات کنت پاکستان ءِ کبزہ ءِ بَگیری ءَ دیم پہ کوہ ءَ روت ءُ گوں دُژمن ءَ جنگ کنت۔ بلوچ ءِ جنگی جُنز ءِ دومی دُور ءَ کماشیںء بابو نوروز ئیگ اِنت کہ کماش گُوں وتی لھتیں ھمراھاں ھما وھد ءَ دیم پہ کوہ ءَ روت وھدے خان اف کلات ریاستی پوج ءِ دست ءَ گِرگ ءُ دستگیر کنگ بیت گُڑا بابا نوروز گُش اِیت مئے خان مئے ننگ اِنت ءُ پاکستان ءَ مئے ننگ ءِ سر ءَ دست چِست کُتگ۔ سیمی جنگی جُنز جَنرل شیروف ءِ سروکی ءَ بِندات بیت کہ جنرل شیروف جنگ ءَ دگہ دروشمے دنت ءُ پراری جُنز ءَ بِندات کنت ءُ جَنرل وھدے اے تحریک ءَ بِندات کنت گُڑا بلوچ سرمچار ھمد ءَ چہ دُژمن ءَ گیش ءَ گیش زھنی ٹارچر کن اَنت، پراری تحریک ءِ جنگی رھبند انچُش بنت کہ دُژمن ءَ ھما وھد ءَ ھما جاگہ ءَ چہ بہ جَن کہ دُژمن مہ زانت من چہ کُجام نیمگ ءَ جَنگ بوگ ءَ آں۔ بلوچ جنگ ءِ چارمی پیز ءِ تیاری ھما وھد ءَ بِندات بیت وھدے سیمی پیز اوشت ءِ آماچ بیت گُڑا لھتیں وھد ءَ پد چارمی پیز بندات بیت کہ آ چار سال ءَ داں پاکستان ءِ لشکر ءِ بگیری ءَ جنگ کنت اے جنگ ءَ سے بلوچ لشکر ھوار بنت کہ آ پیپل فرنٹ فار آرمڑ رزیسٹنس(PFAR)، بلوچ پیپل لبریشن پرنٹ،(BPLF)ءُ بلوچ اسٹوڈنٹس آرگنائزیشن(BSO) بنت۔
چارمی فیر ءَ پد بلوچ راجی آجوئی ءِ زرمبشت لھتیں وھد ءَ داں ھاموش بیت، بلے2000 ءَ پنچمی پیز ءَ بلوچ ءِ جنگی لشکر بی ایل اے بِندات کنت، 2006 ءَ ھمے جنگ تُرندی ءَ دیم ءَ کیت ءُ ادارتی لیکھے دیم ءَ کار اِیت۔
بلوچ ءِ جنگ ءِ پنچمی پیز پیسرگیں جنگ ءِ پیزاں بندوک اِنت بلے اد ءِ نوکیں چیزے گِندگ ءَ کیت کہ بلوچ ءِ جنگ وتارا دنیا ءَ گیش منارین اِیت ءُ دنیا ءِ آ دگہ آزاتی ءِ جُنزانی وڑ ءَ وتی یک نوکیں یونٹے جوڑ کنت کہ آ مجید بریگیڈ ءِ نام ءَ بیت ءُ تھنا سرمچار بریگیڈ ءِ بھر جُوڑ بنت کہ پدائی اُرش کن اَنت ءُ بریگیڈ یونٹ تھنا پدائی اُرش کنت۔ بلوچ جُنز ءِ ھمے پدائی اُرشاں چہ گِندگ بیت کہ دُژمن چنچو نپسیاتی نادراہ بُوگ ءَ اِنت ءُ بلوچ ءِ راجی جُنز ھم مزنیں کچے ءَ مین اسٹریم میڈیا ءَ دیم ءَ کیت، ءُ بلوچ ءِ ھما لس مھلوک کہ دُژمن ءَ مُدام گوں وتی زوراکیاں چہ جنگ ءَ دُور داشتگ مرچی پہ شان پہ راج ءَ ندر بوتگیں پدائیاں کوپگ دینت ءُ ھزارانی کچ ءَ مردُم آیانی جنازھاں ھوار بنت، بلے دُژمن انچو نزور بیت ءُ زھنی پریشر ءِ آماچ بیت کہ پدائیانی جونانی دیگ ءَ تیار نہ بیت گُڑا ھمے لس مھلوک پاد کیت زھرشانی کنت ءُ پدائی سنگتانی جوناں چہ دُژمن ءَ پُل اِیت ءُ پہ شان زمین ءِ باھوٹ اِش کن اَنت۔ اے بلوچ ءِ گھگیری ءِ پنچمی پیز ءِ ھما بھر اِنت کہ گْوست ءِ گھگیریاں نہ بوتگ۔ پاکستان ءَ گُوں وتی زوراکیاں بلوچ ءِ سرڈگار ءِ سر ءَ کبزہ کُتگ ءُ بلوچ ءَ چہ اولی روچ ءَ وتی گھگیری ءِ جُنز بِندات کُتگ۔ پِرنس کریم کہ خان اف کلات ءِ کستریں بِرات بیت ءُ پاکستان ءِ زور آیگ ءُ بلوچ سرڈگار ءِ سر ءَ کبزہ کنگ ءِ زمانگ ءَ تربت ءِ گورنر بیت، وھدیکہ پاکستان کلات ءَ لشکر کشی یے بِندات کنت گُڑا پرنس کریم 1000ءِ کچ ءَ سلاہ بندیں بلوچ سرمچارانی ھمراھی ءَ دیم پہ کوہ ءَ روت ءُ آزاتی ءِ جنگ ءِ جار ءَ جنت۔
پاکستان ءِ کبزہ کنگ ءَ پد آغا عبدالکریم خان ءِ گھگیری بلوچ ءِ گھگیری ءِ اولی پیز بیت کہ پاکستان ءِ ایردست بوگ ءِ اولی روچ ءَ چہ بِندات بیت ۔۱۶ مئی ۱۹۴۸ ءُ پرنس گوں وتی سلاہ بندیں ھمراھاں دیم پہ اوگانستان ءَ روت بلے اوگانستان ءَ ھچ وڑیں مَدت ءُ کمک ءَ تیار نہ بیت پرچا کہ پرنس ءَ وتی سرڈگار ءِ وتواجھی ءِ جنگ ءِ جار جتگ اَت ءُ گوں وتی ھمراھاں جنگ ءَ تیار اَت ءُ اوگانستان ءِ جنگ ءَ ھچ وڑیں دزمانجنی نہ لوٹگ ءَ اَت۔ پرنس وھدے سے ماہ ءَ اوگانستان ءَ نِندگ ءَ پد بلوچستان ءَ کیت گُڑا جنگ ءَ بِندات کنت۔گُوں پاکستان ءَ جنگی مُکابلہ ءَ پرنس ءِ ھمراھیں لشکر ءَ چہ یک بلوچ سرمچارے نمیران بیت ءُ مُکابلہ ءَ سے پنجاپی ھم مِر اِیت، بلے بدبھتی ءَ اے جنگ دیر ءَ نہ مان اِیت ءُ پِرنس رد دیگ بیت ءُ کُرآن ءِ سر ءَ دست ایر کنگ بیت کہ پاکستان تئی دُرستیں لوٹاں مَن اِیت ءُ وتی پوجی لشکر ءَ چہ بلوچستان ءَ در کنت، بلے وھدیکہ پِرنس پہ گپ ءُ تران ءَ چہ کوہ ءَ جھل کیت گُڑا گوں وتی 200 ھمراھاں دستگیر کنگ بیت ءُ کلات ءَ برگ بیت ءُ ھمے شپ ءَ گوں ھزاراں پوجی سپاھیگانی ھمراھی ءَ مچ ءِ جیل ءَ دیم دیگ بیت ءُ داں 10 سال ءَ زندانی کنگ بیت، بلے بلوچ ءِ گھگیری نہ اوشت اِیت پرچا کہ دُژمن مُدام وتی زُلم ءُ زوراکیاں بلوچ ءَ ھمے باور کنائین اِیت کہ تو گُلام ئے ءُ بلوچ ءَ ھمے گُلامی ءِ توکل پہ وتی گُٹ ءَ دوست نہ بیت، بگند ئے لھتیں وھد ءَ ھاموشی اتکگ وھدے کہ یک پیزے ھلاس بوتگ گھگیری ءِ گُڑا لھتیں سال پہ ھاموشی گْوستگ بلے ایشی ءِ مُراد اے نہ بوتگ کہ بلوچ ءَ گُلامی کبول کُتگ بلوچ ءَ مُدام یک پیزے ءِ ھلاس بوگ ءَ دومی پیز ءِ بِندات کنگ ءِ تیاری بِندات کُتگ۔
ھمے رنگ ءَ گِندگ ءَ کیت کہ وھدے پِرنس دستگیر کنگ بیت کمو وھد ءِ ھاموشی ءَ پد دگہ پیر مردے پاد کیت 1958ءَ کہ آ پہ بلوچ ءِ آزاتی ءِ جُنز ءِ گھگیری ءِ دگہ پیزے بِندات کنت۔ اے پیر ءُ توانائیں مرد بابو نوروز بیت کہ وھدے خان احمد یار خان کراچی ءَ بلوچ سرداراں توار پِر کنت آ پہ بلوچستان ءِ آجوئی ءِ ھاتر ءَ جُھد بہ کن اَنت۔ گُڑا ایوب خان ءَ ھمے جار دُوست نہ بیت پرچاکہ آ ھچبر نہ لوٹ اِیت کہ بلوچ پاد بیا اَنت ءُ پہ وتی آجوئی ءَ جنگ بہ کن اَنت پمیشکا ایوب، خان اف کلات ءِ سر ءَ بھتام جنت کہ خان ءَ گوں وتی 40 ھزار لشکر ءَ پاکستان ءِ سر ءَ اُرش کُتگ ءُ گوں وتی پوج ءَ کلات ءَ کیت مُلک ءَ مارشل لاء جنت ءُ خان اف کلات ءَ دستگیر کنت۔گُڑا کماشیں بابو نوروز خان ءِ سروکی ءَ بلوچ پاد کاینت ءُ پاکستانی پوج ءِ بَگیری ءَ گھگیری بِندات کن اَنت ھمد ءَ چہ بلوچ ءِ گھگیری ءِ دومی پیز بِندات بیت۔ بابو نوروز گُش اِیت کہ خان مئے ننگ اِنت ءُ پاکستانی پوج ءَ خان دستگیر کُتگ بِزاں کہ بلوچ ءِ ننگ ءِ دست جَتگ ءُ پہ بلوچ ءَ بے ننگ بُوگ اَیبے۔ بابو نوروز گوں پاکستان ءِ پوج ءَ مزنیں جنگے دنت، بلے گُڈ سر ءَ کُران ءِ سوگِند ءَ چہ کوھاں ایر کیت ءُ گوں وتی ھمراھاں دستگیر کنگ بیت۔
اے دُومی رند بیت کہ بلوچ کُرآن ءِ نام ءِ سر ءَ رد دیگ بیت۔ بابو نوروز وھدے زندانی کنگ بیت گُڑا بابو نوروز ءِ ھمراہ گوں بابو نوروز ءِ زھگاں ھوار پاھُو دیگ بنت ءُ کماشیں بابو نوروز خان 90 سال ءِ اُمر ءَ ریاستی آزار جاہ ءَ نمیران بیت۔ بِگند ئے پاکستان گَل بیت کہ بلوچ ءِ راجی سروک ءُ بلوچیں ورنا من زندانی کُتگ ءُ پاھو داتگ اَنت نوں بلوچ ءَ بس اِنت، بلے بلوچ زانت کہ اے جنگ کہ من پہ آجوئی ءَ بِندات کُتگ آسر ھما وھد ءَ بیت کہ بلوچ سرڈگار آجو بیت پمیشکا بلوچ ءِ راجدپتر چارگ بہ بیت گُڑا گِندگ ءَ کیت ھرچ یک گیگیری ءِ پیز ءِ ھلاس بُوگ ءَ پد نوکیں پیزے گُوں نوکیں دُروشمے ءَ بِندات بیت ءُ بلوچ پُسگ وتی سرڈگار ءِ آجوئی ءَ جنگ کنت۔
بلوچ راجی جنگ ءِ سیمی پیز 1963ءَ بِندات بیت کہ اِیشی ءِ سَروکی ءَ شیر مھمد مری پَنام ءِ شیروف کنت۔ وھدیکہ بابو نوروز گوں ھمراھاں کُران ءِ سوگِند ءِ سر ءَ جھل ءَ کیت ءُ دستگیر کنگ بیت گُڑا بلوچ ءِ گھگیری ءِ دُومی پیز چہ ھمد ءَ آسر بیت بلے تھنا کمو مُدت ءَ شیروف مری وتی یک جنگی لشکرے مُنظم کنت (Baloch people’s liberation front) ءِ نام ءَ زانگ بیت۔ ھمے وھد ءَ پاکستانی لشکر بلوچستان ءِ جِتائین دمگاں وتی لشکر ءَ دیم دنت ءُ پوجی بُنجل جُوڑ کنت گُڑا شیروف پاکستانی لشکر ءِ بَگیری ءَ گوں وتی سِلاہ بندیں لشکر ءَ پراری اُرشاں بِندات کنت۔ شیروف مری گوں وتی لشکر ءَ پاکستانی پوج ءِ کاروان، آرمی سگنل، رابطہ کاری، ریلوے ٹریک پوجی انجینئر، اے دُرستانی سر ءَ وتی اُرشاں بِندات کنت ءُ اے اُرش پاکستان ءَ بے کساس تاوان دینت، شیروف مری ءِ گھگیری انچُش مُھکم ءُ توانا بیت کہ پاکستان شیروپ ءِ لشکر ءِ پُروش دیگ ءِ واستا گوں تُرندی ءَ اُرش بِندات کنت گُڑا 1969ءَ BPLF ءِ جنگ بندی بیت۔ بلے داں 1969ءَ شیروف ءَ 900 باسک مُھکمیں پوجے تیار کُتگ اَت کہ شیروف ءِ دستگیری ءَ پد ھمے پوج ءِ سروکی ءَ میر ھزار خان کنت ءُ ھمد ءَ شیروف ءِ دستگیری ءَ چہ بلوچ گھگیری ءِ سیمی پیز ھلاس بیت،بلے ھمے لشکر کہ شیروف ءَ تیار کُتگ ءُ میر ھزار خان آئی سروکی ءَ کنگ ءَ اِنت ھمد ءَ چہ چارمی پیز ءِ تیاری بِندات بیت کہ سیمی پیز ءِ جنگ بندی ءَ چہ 4 سال ءَ چارمی پیز ءِ جنگ بِندات بیت۔
شیروف ءِ دستگیری ءَ پد سیمی پیز آسر بیت گُڑاں ھمے میان ءَ بلوچستان ءَ نیپ ءِ سرکار بیت ءُ نیپ ءِ پالیسی ءُ سیاسی تاکت پاکستانی پوج ءَ دوست نہ بنت۔
ھمے سیاسی تاکت ءِ پُروش دیگ ءَ پہ پاکستانی پوج ھمک پیم ءَ وتی منِارینگ ءِ زور ءَ جنت ءُ ھمے سوب بیت کہ نیپ ءِ سروک عطااللہ مینگل، بابا خیربخش مری، غوث بخش بَزنجو گُوں آ دِگہ بلوچ رھشوناں حیدرآباد سازش کیس ءَ دستگیر کنگ بنت ءُ زندانی کنگ بنت ھمد ءَ چہ سیاسی چِست ءُ ایر اُوشت ءِ آماچ بنت گُڑا ھمد ءَ چہ بلوچ جنگول 4 سال ءِ مُدتءِ ھاموشی ءَ پد چارمی پیز ءِ جنگ ءَ بِندات کن اَنت کہ اے جنگ 4 سال ءَ داں برجم بیت ءُ 1977ءَ آسر بیت۔ اے جنگ ءَ سے بلوچ لشکر PFAR ,BPLF ءُ بی ایس او ھوار بنت۔ اے جنگ چہ گْوستگیں سئیں جنگاں گیش تُرندتِر بیت کہ پاکستان ایشی ءِ دارگ ءَ پہ 80000 پوجی کار اِیت 1977ءَ اے بلوچ گھگیری ءِ چارمی پیز ءَ ھلاس کنت۔ اے پیز ءِ ھلاس کنگ ءَ پہ ایران پاکستان ءَ کمک کنت کہ ایران ءِ شاہ رضا شاہ پہلوی 30 US ہیلیکواپٹرءَ ھوار F-86 جِٹ فائیٹر راہ دنت کہ ایشانی فائیلیٹ ھم ایرانی بنت، اے جنگ ءَ 120 بلوچ جنگول جَنگ بیت ءُ بلوچ ءِ جنگی لشکر سک باز تاوان وارت ءُ اے جنگ 1977ءَ داں برجاہ بیت مزنیں کساسے ءَ بلوچ جنگول ءُ لس مھلوک بیران بیت گُڈسر ءَBPLF وتی دُرستیں جنگی اوتاکاں ھلاس کنت ءُ پشکپتگیں جنگول اوگانستان ءَ رو اَنت گُڑا ھمد ءَ چہ سلاہ بندیں جنگ اوشت ءِ آماچ بیت۔ بازیں وھدے ءَ داں سلاہ بندیں گھگیری گِندگ ءَ نئیت ھمد ءَ چہ گَپ کنگ بِندات بیت کہ بلوچ نوں گھگیری ءِ نیمگ ءَ نہ روت بلے وھدیکہ بلوچ ءِ بُن دپتر ءَ چارگ بہ بیت گُڑا یک چیزے پّدر بیت کہ بلوچ کدی زورآور ءِ ھِلاپ ءَ ھاموش نہ بوتگ بلکیں مُدام گھگیری کُتگ ءُ مُدام چو کوہ ءَ دُژمن ءِ دیم ءَ مِک بوتگ، انچُش بازیں استان اتکگ بلے بلوچ ءِ گھگیری ءِ دیم اِش داشت نہ کُتگ ءُ چہ بلوچ ءِ سرڈگار ءَ درایگ ءَ مجبور بوتگ اَنت۔
وھدیکہ بلوچ ایردست کنگ بیت 1948ءَ گُڑا ھما روچ ءَ چہ بلوچ وتی ایردستی ءِ بگیری ءَ جنگ بِندات کنت کہ اے جنگ چہ جُتائیں پیزاں گوز اَنت مروچی وتی پنچمی پیز ءَ سر اِنت،گُوستگیں پیزاں چہ یک چیزے گِندگ ءَ کیت کہ یک پیزے ءِ جنگ ءِ ھلاس بوگ ءَ گُوں ۲،۳ سال ءِ مُدت ءَ پد دُومی پیز ءِ جنگ بِندات بیت۔ بلے وھدے 1977ءَ چارمی پیز ءِ جنگ آسر بیت گُڑا 2000 ءَ پنچمی پیز ءِ جنگ بِندات بیت، پنچمی پیز ءِ جنگ ءَ چیر اندریں جنگُول لشکر بی ایل اے 2000 ءَ بِندات کنت، اے 23 سال ھاموشی ءَ گُوز اِیت کہ ھچ وڑیں جنگی گھگیری گِندگ ءَ نئیت، بلے 2000 ءَ وھدیکہ جنگ بِندات بیت گُڑا ھمے چیز اِشکنگ بیت کہ 1977ءَ وھدے چارمی پیز ھلاس بیت گُڑا ھما روچ ءَ چہ پنچُمی پیز ءِ تیاری بِندات بیت ءُ جنگ ءِ جار 2000 ءَ جَنگ بیت ءُ بی ایل اے کم کم ءَ وتی سیاسی ءُ جنگی تیاریاں مُھکم کنت ءُ 2004 ءَ گوں تُرندی ءَ جنگ ءَ بِندات کنت۔ بلوچ راجی زُرمبشت ءِ دُرستیں پیزاں چہ مُھکمتر، مُنظم تِر ءُ مَزنتِریں پیز ھمے پیز اِنت کہ 2000 ءَ بِندات بوتگ ءُ انگت برجاہ اِنت۔
گْوست ءِ پیزاں وھدے چار ئے گُڑا گِندگ بیت ھمک یک پیزے ءِ تھنا چار داں شش سال ءِ مُدت ءَ برجاہ بوتگ ءُ پُد ءَ دُژمن ءِ زوراکیانی دیم ءَ وڑے ناں وڑے ءَ وتارا داشت اِش نہ کُتگ ءُ ھلاس بوتگ اَنت، یک چیزے اے ھم گِندگ ءَ کیت کہ گْوست ءِ ھمک پیز کہ ھلاس بوتگ اَنت اود ءَ ادارتی لیکھی پکر نہ بوتگ ھمک جُنز ءِ سروک کہ دستگیر کنگ بوتگ گُڑا پیز اوشت ءِ آماچ بوتگ اَنت یا ھلاس بوتگ انت، اگاں ما بِندات ءَ چہ بِچار ایں گُڑا مارا گِندگ ءَ کیت کہ گھگیری ءِ اولی پیز گوں پرنس کریم ءِ دستگیر بُوگ ءَ ھلاس بیت، ھمے ھساب ءَ دُومی پیز گوں بابو نوروز ءِ دستگیری ءَ ھلاس بیت ءُ سیمی گوں شِیروف ءِ دستگیری ءَ ھلاس بیت بلے وھدے برجمیں جنگ ءَ چار ئے گُڑا گِندگ بیت کہ اے پیز انچُش مُنظم اِنت کہ پہ لیڈرشپ ءِ شھید بوگ یاکہ دستگیر بوگ ءَ اوشت آماچ نہ بوتگ بلکیں ھمک آیوکیں لیڈرشپ ءَ گیش مُھکم ءُ مُنظم کُتگ، وھدیکہ بالاچ شھید بیت گڑا اے جُنز نہ اوشت اِیت، یک نوکیں رنگے ءَ نوکیں لیڈرشپ /کماندار گوں نوکیں جنگی رِپک ءُ ھُنراں جنگ ءَ دیم ءَ بر اَنت جنگ ءِ تہ ءَ انچیں شوربندی کار اَنت کہ گْوست ءِ پیزانی تہ ءَ گِندگ نہ بوتگ اَنت۔ بی ایل اے وتی تہ ءَ یک سرجمیں جنگی اِدارھے ءُ ھمے ادارہ ءِ تہ ءَ بی ایل اے یک یونٹے پچ کنت کہ آ یونٹ مجید بریگیڈ ءِ نام ءَ زانگ بیت۔ اے یونٹ ءَ تھنا ھما سرمچار ھوار بنت کہ آ پدائی اُرش کن اَنت۔
اگاں بلوچ ءِ گْوست ءَ بِچار ئے گُڑا گِندگ ءَ کیت کہ 70 ءِ دھک ءَ مجید لانگو بھٹو ءِ سر ءَ پدائی کنت، مجید لانگو بُھٹو ءِ نزدیک ءَ سر نہ بیت پیسر ءَ بمب تِرک ایت ءُ مجید نمیران بیت، اد ءَ چہ پد دگہ پدائی اُرش نہ بیت، بلے وھدے بی ایل اے مُنظم بیت گُڑا ھمد ءَ یک ورنایے کہ چہ بابا مری ءِ سرکل ءَ در کیت ءُ ھمے گپ ءِ سر ءَ یکین دار اِیت کہ بلوچ ءِ گُلامی ءِ توجیل تھنا سِلاہ بِندیں جنگ اِنت ءُ ھمے ورنا اسلم بلوچ پہ بی ایل اے ءِ مُنظم کنگ ءَ وتی شپ ءُ روچاں یک کنت، گل ءَ انچُش مُھکم ءُ منظم کنت کہ گل ءِ تہ ءَ سانمندتریں مردُم بیت ءُ 2017 ءَ گل ءِ سروک گِچین کنگ بیت۔ اُستاد اسلم چہ 70 ءِ زمانگ ءِ جنگ ءَ چہ آشنا نہ بیت پمیشکا آ جنگ ءَ نوکیں دُروشمے دنت ءُ شھر ءَ داں جنگ ءَ سر کنت۔ اُستاد اسلم ءِ زِھن ءَ مُدام یک جُستے بیت کہ آ جُست چہ ھک توار سرکل ءَ پاد کیت، دنیا ءَ ھرچی کہ آزاتی ءِ جنگ بوتگ اَنت دُرستیں جنگاں پدائی بوتگ بلوچ ءِ گور ءَ سرمچار ھست، گُڑا کُجام نِزوری اِنت کہ بلوچ پہ وتی جنگ ءَ پدائی ودی کُت کنگ ءَ نہ اِنت۔ ھمد ءَ چہ اُستاد پیسلہ کنت کہ من گل ءِ تہ ءَ انچیں یونٹگ اَڑ دَیاں کہ آ یونٹ ءِ باسک بودناک بہ بنت ءُ تھنا پدائی کن اَنت۔
2007 ءَ بولان ءَ سارو کیمپ ءَ اُستاد وتی دُرستیں نزدیک ءُ بروسھیں سنگتاں یک جاگہ کنت ءُ درائین اِیت کہ من بی ایل اے ءِ تہ ءَ انچیں بریگیڈے جوڑ کن آں کہ آئی ءِ تہ ءَ تھنا بودناکیں باسک بنت ءُ تھنا پدائی کن اَنت استاد مُدام ھمے ھاتر ءَ تچ ءُ تاگ کنت، مُدام جنگ ءَ را نوکیں دُروشمے ءَ دیم ءَ آرگ ءِ جُھد ءَ کنت ءُ اے وھد ءَ اُستاد ھمے نِند ءُ نیادانی تہ ءَ اِنت کہ مارا پدائی بریگیڈ جوڑ کنگی اِنت ءُ پدائی اُرش ءِ بِندات کنگی اِنت داں ما دُژمن ءَ گیش ءَ گیش نِزور کُت بہ کن ایں ءُ وتی جنگ ءَ دُگنیا ءَ داں سرکُت ءُ منارینت بہ کن ایں۔ 17 مارچ 2010 ءَ شال ءَ گولیمار چُوک ءَ پاکستانی لشکر یک لوگے سرجم ءَ وتی گِیرہ ءَ کنت گُڑا یک ورنایے گوں پاکستانی لشکر ءَ داں یک کلاکے ءَ جنگ کنت وتی سرجمیں ھمراھانی کشگ ءَ سوبین بیت ءُ وت نمیران بیت۔ ھال شَنگ بیت کہ اے ورنا مجید اِنت مجید لانگو، ھما مجید لانگو ءِ کستریں بِرات کہ بُھٹو ءِ سر ءَ اُرش کنت ءُ نمیران بیت، ھما وھد ءَ مجید ءِ گِس ءَ ھمے ورنا ودی بیت کہ مرچیگیں روچ ءَ شھید بوتگ گُڑا مات ءُ پت مجید لانگو ءِ نام ءَ ھمے ورنا ءَ پر کن اَنت کہ مرچی گُوں دُژمن ءَ دیم پہ دیم جنگ ءَ نمیران بوتگ، دگنیا مرچی اے دوئیں بِراتاں مجید اول ءُ مجید سانی ءِ نام ءَ زانت۔ ھمے روچ ءَ 17 مارچ ءَ 2010 ءَ اُستاد اسلم بی ایل اے ءِ پدائی بریگیڈ ءِ بُنھشت ءَ ایر کنت ءُ رسانکدر ءَ بیان شِنگ کنت کہ مجیدیں براتانی کُربان بُوگ ءِ پلسپہ ءَ مارا رژنائیں راھے ءِ شُون ءَ دنت ءُ بی ایل اے ءِ پدائی بریگیڈ ءَ مجید سانی ءِ نام ءَ چہ “مجید بریگیڈ” ایر کنت ءُ ھمد ءَ چہ بلوچ جُنز ءِ دُرستان چہ مستریں ءُ ھترناکتِریں ءُ درستان چہ نوکتریں یونٹ ودی بیت۔ بِگند ئے اے وھد ءَ اے تھنا یونٹے بیت بلے اُستاد اِنت کہ نا اُمیت نہ بیت ءُ مجید بریگیڈ ءَ پہ تربیت بِندات کنت، باسکاں لکچر دیگ ءَ بِندات کنت کہ بلوچاں پدائی یونٹے پرچا زلورت اِنت، پدائی اُرش پرچا بِندات کنگی اَنت اے اُرشانی سان ءُ ارزشت چی بیت ءُ چوں پدائی اُرشاں چہ بلوچ جُنز ءِ تب مٹ بوت کنت۔ یونٹ ءِ جُوڑ کنگ ءَ چہ یک سالے ءَ پد 30 دسمبر 2011 ءَ پدائی باز خان پنام ءِ درویش کوئٹہ ءَ شپیک مینگل ءُ آئی ءِ کارندگانی سر ءَ اُرش کنت ءُ مجید بریگیڈ اُرش ءِ زمہ واری ءَ کبول کنت ءُ رسانکدر ءَ بیان شِنگ کنت کہ اے مجید بریگیڈ ءِ باضابطہ کاروائی اِنت کہ بی ایل اے مجید بریگیڈ ءِ پدائی درویش ءَ کُتگ۔ چہ اے اُرش ءَ پد ھپت سال ءَ داں مجید بریگیڈ ھچ اُرش نہ کنت ءُ وتی دومی اُرش ءَ انچیں روچے ءَ کنت کہ بلوچانی گْور ءَ اے روچ ءِ وتی یک بِستارے دار اِیت بِزاں کہ 11 اگست، 11 اگست ھما روچ اِنت کہ بلوچستان چہ برطانیہ ءَ وتی آزاتی ءَ گِیپت ءُ وتواک بیت۔
مجید بریگیڈءِ دومی پدائی اُرش 11 اگست 2018 ءَ چائینیز انجیئرانی سر ءَ بیت کہ بازیں انجیئر زدگ ءُ بازینے مِر اِیت بلے اے اُرش ءَ دُرستان چہ جتاتریں چیز پدائی ءِ جند اِنت۔ ھمیشی ءِ سَوب ءَ آیوکیں سالانی میان ءَ جنگ ءِ نکشہ ءُ وڑ ءُ ڈول بدل بُوان بنت۔ پدا بوتگیں سنگت 22 سالی ریھان اسلم بیت کہ بی ایل اے ءِ سروک اُستاد اسلم ءِ وتی زھگ بیت ءُ ھمے روچ ءَ کُل بلوچ ءِ زُبان ءَ تھنا ھمے گپ بیت کہ مئے اھد ءِ ابراھیم ءَ پہ آزاتی ءَ وتی دُرستاں چہ کیمتی ئیں چیز ندر کُتگ۔ چرے پدائی ءَ پد دنیا ءِ نیوز چینل ءُ روتاکاں بلوچ ءِ آزاتی ءِ جنگ ءِ ھال شِنگ بیت ءُ سرجمیں دُنیا سرپد بیت کہ بلوچ ءَ پہ وتی آجوئی ءَ ھمک وڑیں کُربانی دیگ ءَ تیار اَنت ءُ اے پدائی اُرش ھمے گپ ءِ منارین اِیت۔
پرچا کہ اُستاد وتی یکیں زھگ ریھان ءَ پہ پدائی ءَ تیار کنت ءُ اے گپ ءَ ھم کنت کہ پہ آجوئی ءَ کُربانی وتی جِند ءَ چہ بِندات کنگ بہ بیت گُڑا اے کُربانی دیگ ءِ پلسپہ بِھ نِزور نہ بیت بلکیں ھمک بلوچ زھگ ھمے کُربانیانی رندگیری ءَ کنت ءُ پہ کُربان بوُگ ءَ تیار بیت۔ بی ایل اے ءِ سروک اُستاد اسلم بلوچ 25 دسمبر 2018 ءَ وت ھمراھانی گوما شھید کنگ بیت بلے اُستاد ءِ شَھیدی ءَ چہ پد اے کاروان اوشت ءِ آماچ نہ بیت بلکیں روچ پہ روچ گیش مُھکم بیت ءُ ھمے مھکمی بلوچ جُنز ءِ پنچمی پیز ءِ مستریں سوبمندی اِنت کہ ھمُک سروک ءِ نمیران بُوگ ءَ پد نُوکیں سروک کہ گِچین کنگ بیت آ جنگ ءَ نوکتِر ءُ تواناتر کنت ءُ دُژمن ءَ گیش نِزورتر کنگ ءَ پہ نوک نوکیں جنگی شوربندی کار بند ایت۔ اُستاد اسلم ءِ جُوڑ کُتگیں مجید بریگیڈ مرچی گوں تیزی ءَ دیم ءَ جُنزان ءَ اِنت ءُ پدائی اُرشانی تہ ءَ روچ پہ روچ گیشی ودّان اِنت ءُ ھمے اُرشاں چہ گِندگ بیت کہ بلوچ ءِ راجی تاکت بلوچ لس مھلوک مرچی پہ شان بلوچ پدائیاں وتی راجی “بامرد” نامین اِیت ءُ پہ شانے پدا بوتگیں سنگتانی جوناں زمین ءِ باھوٹ کن اَنت، دومی نیمگ ءَ تو کہ دُژمن ءَ گِندئے گُڑا گِندگ بیت کہ دُژمن چنچو نپسیاتی نادراہ جُوڑ اِنت اے ھمے پدائی اُرشانی سوبمندی اِنت کہ مرچی پدا بوتگیں سنگتانی جوناں چہ استان تُرس آماچ بیت ءُ ھمے جونانی دیگ ءَ اوں تیار نہ بیت۔
ءُ ھمے اُرش کہ بنت مُدام انچیں جاھاں بنت کہ دنیا مجبور بیت وتی چماں ھمد ءَ سک بِہ دنت۔ بلوچ راجی زرمبشت ءِ اے پیز چہ آدگہ پیزاں سرجمی ءَ جُتا بیت۔ وھدے تو گْوست ءِ پیزاں چار ئے گُڑا گِندگ بیت کہ گْوست ءِ ھرچی جنگ بوتگ اَنت لھتیں ھاسیں ھند ءُ دمگاں داں مِھدُود بوتگ اَنت بلے مرچی ئیں جنگ چہ لھتیں ھاسیں دمگاں در اتکگ ءُ شاھگانیں رنگے ءَ بلوچستان ءِ کُنڈ کُنڈ ءَ سر اِنت ءُ اِیشی ءِ برورد ادارتی دُروشم اِنت کہ اے جنگ ءَ وتارا چہ آدگہ جنگاں جِتا کُتگ ءُ یکشل ءَ گُوں تُرندی ءَ برجاہ اِنت ءُ مُدام نوکیں رنگے ءَ وتی جنگی شوربندیاں سازگ ءَ اَنت۔
آسر:
دنیا ءَ ھما راج زِندگ بنت کہ مُدام زورگیر ءِ ھلاپ ءَ گھگیری کن اَنت ءُ وتی راج ءُ ھستانک ءِ رکینگ ءَ پہ جُھد کن اَنت ءُ ھما راج گار ءُ بیگواہ بنت کہ زورگیر ءِ زوراکیانی ھِلاپ ءَ گھگیری نہ کن اَنت ءُ ھاموش بنت۔ بلوچ دنیا ءِ ھما راجانی تہ ءَ ھوار اِنت کہ مُدام پہ وتی ھستانک ءِ رکینگ ءَ پہ گھگیری کُتگ ئِے ءُ زلم ءُ زوراکیانی دیم ءَ اوشتاتگ، بلوچ ءَ 2000 سال ءِ گھگیری ءِ دراجیں بُن دپرے گوں ءُ ھمے ھساب ءَ پاکستان ءِ ھلاپ ءَ بلوچ ءِ گھگیری ءَ مرچی 74 سال اِنت کہ یکشل برجاہ اِنت ءُ اے 74 سالانی تہ ءَ بلوچ ءِ جنگ جتائیں پیزاں چہ گْوستگ ءُ مرچی اِد ءَ سر اِنت کہ بلوچ ءِ جُنز دنیا ءَ سر بوتگ ءُ مرچی چہ ھمک بلوچ ءَ ھمے لوٹ ءَ کنگ ءَ اِنت کہ وتی گُلامی ءَ بہ مار اَنت پہ زمین ءَ ندری ئیں سرانی رندگیری ءَ بہ کن اَنت ءُ جُھد ءَ ھوار بہ بنت۔
بلوچ ءِ گوستانک مُدام بلوچ ءَ ھمے پیشدار اِیت کہ تئی گھگیری ءِ دراجیں پندے ھست کہ مُدام پہ راجی پجار ءَ بلوچ ھمے پند ءَ بُرّان اِنت ءُ روچ پہ روچ نوکیں دابے ءَ سپر کنان اِنت۔
مرچی بلوچ ءَ سما کنگی اِنت کہ اگاں من ءَ چیزے چہ گُلامی ءِ توپ ءَ آزات کُت کنت گُڑا آ گھگیری اِنت ھما گھگیری چہ ھزاراں سال ءَ بلوچ ءَ گُون اِنت ءُ بلوچ ءِ بُن دپتر ءِ بھر اِنت اگاں بلوچ ءَ وتی زمین رکینگی اِنت ءُ راجی پجار زندگ دارگی اِنت گُڑا بلوچ ءَ ھمے گھگیری ءِ کِشک ءَ اّلم سپر کنگ لوٹ اِیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-