تربت : لاشانی دست دیگ واستا نندانک، سی پیک شھدگ دومی روچ ءَ ھم برجاہ ءَ اِنت

نبیل بلوچ، زکاء اللہ ءُ فیروز ساربان ءِ لاشانی دست ءَ دیگ لوٹ سر ءَ ڈی بلوچ ءِ ھند سر ءَ سی پیک شھدگ دومی روچ ءَ ھم بند اِنت-

جمعہ ءَ زھرشانی ءِ دومی روچ ءَ زالبول، چکانی ءُ لَس شھریانی مزنیں کچے ءَ بُنجاھی شھدگ سر ءَ نندانک داتگ زھرشانی ءَ مزنیں کچے ءَ بھر زرتگ، چریشی ءِ سبب ءَ شھدگ ءِ دوئیں نیمگاں گاڑیانی دراجیں لین لگ اِتگ-

زانگ بہ بیت کہ نبیل بلوچ ءُ آئی سنگت پاکستانی پوج ءِ گوم ءَ میڑ ءَ بیران بیتگ اَنت، چریشی ءَ پد پوج ءِ کارندھاں آیانی لاش وتی بُنجل ءَ برتگ-

کھول ءَ لوٹ کتگ کہ لاشاں زوت دست ءَ بدے اِت دانکہ آیاں بلوچی ءُ اسلامی رسم رواج رِد ءَ کل ءُ کسارت کت بہ کن ایں-

اِھوالکار رِد ءَ کھول ءَ لاشانی دست ءَ دیگ واستا مجسٹریٹ دیم ءَ ارزبندی پیش کتگ، بلے مجسٹریٹ ءَ ارزبندی رد کتگ- اشی ءَ پد کھول ءَ ڈپٹی کمشنر کیچ ءَ چہ گپ دیوان، بلے آیاں ھم پھلی لوٹ اِتگ کہ کہ لاش آیانی اختیار ءَ نہ اِنت، بلکیں توانمندیں ادارھانی دست ءَ اِنت، پمیشکا آ اے درگت ءَ ما ھچ نہ کن ایں-

زھرشانی کنوکانی گوشگ اِنت کہ دانکہ لاش آیانی دست ءَ دیگ نہ بنت، آ شھدگ ءَ بند کن اَنت ءُ زھرشانی برجاہ بیت-