سنجاوی دروگیں میڑ : دگہ دو لاشانی پجّار زورانسری بیگواھیں مردماں چہ بیتگ اَنت

ھمے سال ءِ نوزدہ اپریل ءَ زیارت سنجاوی ءَ پاکستانی پوج ءَ ھپت مردم یک دروگیں میڑے ءَ کُشک ءِ ٹاہ داتگ اَت، بلے دزکپتگیں منّانکانی رِد ءَ اے سرجمیں مردم جتاجتائیں وھداں پوج ءِ دست ءَ دزگیر کنگ بیتگ اَنت تاں ھما روچ ءَ بیگواہ بیتگ اَنت-

انی کہ ھمے دوئیں مردمانی پجّار بیتگ اَنت ،اشانی تہ ءَ مزار خان مری ءُ خیر محمد مری ھوار اَنت، کہ آ چار ماہ ءَ ساری چہ دُکی ءَ پوج ءَ دزگیر کتگ ءُ بیگواہ کتگ اَنت-

زانگ بہ بیت کہ پاکستانی پوج سر ءَ زورانسری آوار جنگ بتگیں مردماں دروگیں میڑاں کُشگ ءِ دْرچ برجاہ ءَ اِنت- گوستگیں ماہ ءَ ھم دُکی ءَ یک دروگیں میرے ءَ پنچ مردم کُشتگ اَت-

زانگ بہ بیت اے لاشانی دزکپگ ءَ پد دمگی مردماں سی ٹی ڈی ءِ ٹاہ رد کنان ءَ گْوشتگ کہ دمگ ءَ ھچ وڑیں میڑ نہ بیتگ، بلکیں پوج ءَ لاش دور داتگ ءُ آیاں میڑ ءِ پیشدارگ جُھد کتگ-

سی ٹی ڈی گیشتر ھما وھد ءَ شکی گوشگ بیتگ کہ سال دوھزار ءُ بیست ءُ سَے ءَ آئی ءَ وتی دزگیری جاہ ءَ کیچ ءَ سَے مردمانی کوش دیم ءَ اتکگ انت-

سال 2023 ءَ بیست ءُ دو بیست ءُ سَے نومبر ءِ میانی شپ ءَ بلوچستان ءِ دمگ کیچ تربت ءَ بالاچ مولا بخش گوں دگہ دو مردمانی ھواری ءَ دیم پہ دیمی جنگ ءَ کُشتگ بیتگ انت-

بالاچ مولا بخش ءِ کھول ءَ تربت ءَ لاش ءِ ھمراھی ءَ دھرنا داتگ ءُ پد ءَ آئی ءِ لاش ءِ کل ءُ کسارت کنگ ءَ پد کھول ءَ بی وائی سی ءِ ھمراھی ءَ تربت شال ءُ اسلام آباد ءَ لانگ مارچ کتگ ءُ اود ءَ اسلام آباد ءَ دھرنا دیگ بیتگ ات –

سی ٹی ڈی ءَ بلوچستان ءَ بازیں وئیل کتگ انت کہ پد ءَ آئی ءِ جتگیں مردم پیش ءَ بیگواھیں مردمانی ناماں زانگ بیتگ انت –

ایشی ءَ پیش زیارت ءَ سی ٹی ڈی ءِ دست ءَ یازدہ مردمانی کوش ءِ ھلاپ ءَ 2021 ءَ بیست ءُ یک جولائی ءَ شال ءَ ریڈ زون ءَ دھرنا داتگ بیتگ کہ اود ءَ کھولاں پنجاہ ءُ یک روچ ءَ داں نندانک داتگ بیتگ ءُ پد ءَ پاکستان ءِ وزیر رانا ثناء اتکگ ءُ کھولانی گون ءَ سدکی ءُ دزنشانی نبشتگ کتگ بیتگ کہ شمئے مردم بندیگ جاہ ءَ کُشگ نہ بنت اِنت-

رانا ثنا ء اللہ ءِ دزنویشت ءَ پد ھم بندیگیں مردمانی کوش ءَ کمی آیگ ءَ ابید گیشی آیگ گندگ بیتگ انت –