بلوچستان ءِ ھَند ھزدار ءِ جاگہ کانک ءِ جاھمنند بی بی درھاتون ءَ گوں دگہ ھمراھیں زالبولاں یک ھنگامی پریس کانفرنس ءَ پدّر کُتگ کہ 7 کرّا 2025 ءِ بیگاہ ءَ 6 مردم گوں توپکانی ھمراھی ءَ آئی ءِ لوگ ءَ پُتر اَنت ءُ 16 سالی جنک نسرت بی بی بیگواہ کُتگ ءُ گوں وت بُرتگ ءُ لوگ ءِ زالبولانی سر ءَ لٹ ءُ کُٹ ھم کتگ۔
زالبول ءِ گْوشگ اِنت بیگواہ کنوک ھما ساھت ءَ آئی ءِ لوگ ءِ گوانکو ءُ دگہ کیمتی ئیں چیز گوں وت بُرتگ اَنت۔
بی بی درھاتون ءِ رِد ءَ بیگواھی ءِ وھد ءَ گِر ءُ چیلی ءَ یک ملزمے ءِ دیم ءِ پُچ دورآتکگ، آئی ءِ پجّار کُتگ ءُ ھزدار ءِ تھانہ ءَ ایف آئی آر دزنبشت کُتگ۔
آئی ءِ گُشگ اَت کہ پولیس ءَ یک ملزمے دزگیر کُتگ بلے آئی ءَ را مھمانانی وڑ ءَ تھانہ ءَ نندارینتگ ئِے ناں آئی ءِ سر ءَ جوانیں چار ءُ تپاس کنگ بوگ ءَ انت ءُ بلکے آئی درکنگ ءِ ٹھ ءُ شور کنگ بوگ ءَ انت۔
آوار جنگ بوتگیں جنک ءِ مات ءَ الزام جتگ کہ ایس ایچ او سٹی پولیس ءِ مبینہ بے پروائی ءُ ملزم ءِ ھلاپ ءَ نرمیں رویہ ءِ سبب ءَ نسرت بی بی انگت ءَ در کنگ نہ بوتگ۔ پولیس ایف آئی آر ءِ تہ ءَ نام گرگ بوتگیں سدام ءَ ھوار دگہ ملزماں دزگیر کنگ ءَ ھم چک ءُ پد اِنت۔
بی بی درھاتون ءَ بلوچستان ءِ سر وزیر آئی جی پولیس بلوچستان ، ڈی آئی جی کلات رینج ءُ ایس ایس پی ھزدار ءَ گوں دزبندی کتگ کہ آوار جنگ بوتگیں مردم ءِ پجارینگ ءُ ملزم ءَ را کیس ءِ دیم ءَ آرگ ءِ واستا زوت دزمانجنی بہ کن انت۔
آئی ءَ ھُشدار داتگ کہ اگاں آوار جنگ بوتگیں جنک مرچی سھب ءَ تاں رکّینگ نہ بوت گڑا آ ءُ آئی ءِ لوگ بانک شال ءُ کراچی مزن دگ ءِ سر ءَ دھرنہ ءِ زھرشانی کن اَنت ءُ قرآن مجید ءَ وتی دست ءَ دار اَنت ءُ اے دھرنہ ھما وھد ءَ برجاہ بیت داں آئی ءِ جنک رکّینگ نہ بیت ءُ مجرماں سزا دیگ نہ بیت۔
آئی ءَ گیش گوشت کہ ایف آئی آر ءِ تہ ءَ نام گپتگیں ملزم سانمند اَنت ءُ پولیس ایشانی ھلاپ ءَ تچکیں کارروائی ءَ چہ رکّگ ءَ اِنت، ایشی ءِ سبب ءَ آوار جنگ بوتگیں مردم ءِ جان ءَ را مزنیں ھترہ ءِ تہ ءَ اِنت۔
زانگ بہ بیت کہ ھزدار ءِ دمگ ءَ قبائلی ءُ سرکاری آھوک ءُ رھوک ءِ واھندیں سلاہ بندیں گلانی نیمگ ءَ زالبولانی آوار جنگ ءِ بازیں وئیل دیم ءَ آتکگ انت۔
اے سال ءِ پروری ءَ چہ ھزدار ءَ بگر داں ریاستی سیمسر ءَ کار کنوکیں ڈیتھ اسکواڈ ءِ مردماں یک لوگے ءِ سر ءَ اُرش کتگ ءُ مردم اِش ٹارچر کتگ ءُ یک جنینے اسماء جتک آوار جتگ کہ ایشی ءَ چہ سرجمیں بلوچستان ءَ زھرشانی ءِ سبب جوڑ بوتگ۔
ھزدار ءِ جاور ءَ ھوار بوتگیں ملزم تنی وھدی دزگیر کنگ نہ بوتگ اَنت۔