کتاب : اورئنٹلزم (Orientalism)
چمشانک: شفقت بلوچ
دی بلوچستان پوسٹ
اورئنٹلزم ایڈورڈ سعید ءِ نبشتہ کتگیں کتاب ئے۔ ایڈورڈ سعید گش اِیت کہ اورئنٹلزم(شگر بزانتی) مگرب ءِ نیمگ ءَ جوڑ بوتگیں یک لیکہ (school of thought) ئے۔ وھدے کہ مگربی استان( انچوشکہ یورپ ءُ پرانس) مشرک ءِ تہ ءَ وتی کالونیاں جوڑ کن اَنت گڑا آں اورئنٹلزم ءَ بطور tool کارمرز کن اَنت تانکہ آیانی نوآبادیاتی سسٹم ءَ یک جواز ءِ بہ رس اِیت۔ ھر ھما مگربی زانتکار, ندکار یا مزھبی ءُ کلونیل مردم کہ آیاں اورئنٹ (بزاں مَشرِک) بابت ءَ ونتگ یا نبشتہ کتگ اں-
اورئنٹلسٹ(orientalist) گشگ بنت ءُ اے کاریچ ءِ (عمل) جِند اورئنٹلزم (شگربزانتی) گشگ بیت۔ ھژدمی ءُ نوزدمی کرن ءَ اورئنٹلزم یورپ ءُ پرانس ءِ تہ ءَ بتور سبجیکٹ وانینگ بُوتگ ءُ مَشرِک ءِ سرا مزنیں لٹریچر نبشتہ کنگ بوتگ۔ مگربی استاناں وترا مزن لیکگ ءُ رودراتکی استاناں جھل جنگ ءِ ھاترا (Us vs They) ھیال دیما آؤرتگ ءُ سرجمیں دگنیا ءِ تہ ءَ ھمے ھیال دور داتگ کہ دومی استانانی سرا کبزہ کنگ مگرب ءِ مردمانی ھَک اِنت۔
اورئنٹلسٹاں مدام ھمے ھیال وتی گُشتانک ءُ نبشتانکانی تہ ءَ آؤرتگ کہ مشرِک(east) ءِ مردم وتی راجدپتر، بندپتر ءُ دود ءُ ربیدگانی بابت ءَ ھچ نزان اَنت ءُ ما ایشاناں سوج دیگ ءِ ھاترا اد ءَ آتکگیں۔ مگرِب ءِ زانتکار گش اَنت کہ آ اورئنٹل(بزاں مشرِک ءِ جاھمننداں) شریں وڑے ءَ زان اَنت۔سر لارڈ کرومر ءِ رد ءَ کا لونیلزم ءَ برجم دارگ ءِ ھاترا فوجی پاور ءَ چہ گیش ھمے وڑیں ٹیکٹکس کارمرز کنگ لوٹ اَنت کہ آیاں ایردستیں راج وشی ءَ گوں من اِیت۔ کرومر دیما گش اِیت کہ کبزہ گیریت ءِ برجم دارگ ءِ واستہ اے ھم ھژدری اِنت کہ ایردستیں راج راجدوستی ءِ لیکہ ءِ نیمگ ءَ مہ روت۔
وھدے کہ اسلام ءُ دومی ایشین پاور دیمروئی کن اَنت ءُ دگنیا ءِ تہ ءَ وت ءَ را منارینگ ءِ جھد کن اَنت گڑا مگرِب ترس ءِ آماچ بیت۔ پمیشکا اے راجانی کاؤنٹر کنگ ءِ ھاترا اولی سر ءَ ایشانی سٹرکچر، شری ءُ نزوری ءُ مردمانی تب ءَ سرجم ءَ وان اِیت ءُ ایشانی وترا شریں وڑے ءَ سرپد بیت۔ پد ءَ ایشانی پروش دیگ ءُ ایشانی سر ءَ کبزہ کنگ ءَ سوب مند بوتگ۔
یورپ ءَ ایشیا ءِ بابت ءَ وانگے واستا ادارہ جوڑ کتگ اَنت کہ آیانی تہ ءَ “Royal Asiatic Society Bretain” ءُ دومی نپولین ءِ جوڑ کتگیں “Institute of egypt” بیتگ اَنت۔ اے ادارھاں مَشرِک ءُ مشرِکی مردمانی بابت ءَ انفارمیشن دیم ءَ آؤرتگ اَنت۔
وھدے کہ مشرِکی زانتکار مگرِب ءِ دو تل دو پوستی ءَ سرپد بوتگ اَنت ءَ بازیں ایردستیں راجاں پرانس ءُ یورپ ھلاپ ءَ سلاہ بندیں جُھد بندات کتگ۔ اد ءَ گڑا ماڈرن اورئنٹلزم بِندات بیت کہ ایشی تہ ءَ اورئنٹلزم ءِ سٹرکچر مٹ کنگ بوتگ۔ ساری ءَ اورئنٹسلٹانی نبشتانک مزھبی بوتگ اَنت بلے نوں نبشتہ کنگ ءِ جِند سیکولر کنگ بوتگ۔یورپی زانتکاراں گوں مشرِکی راجاں ھمدردی پیش داشتگ ءُ وترا مشرِکی راجانی ھمدرد گشتگ۔ ماڈرن اورئنٹلزم ءِ تہ ءَ سلویسٹر ڈی ساسی ءُ ایرنسٹ رینان ناموریں زانتکار بوتگ اَنت۔
دومی میان استمانی جنگ ءَ چہ پد پرانس ءُ یورپ ءِ جند نزور بوتگ اَنت امریکہ سُپر پاور ءِ جوڑ بوتگ۔ امریکہ ھم اورئنٹلزم کارمرز کتگ کہ آئی تہ ءَ اراک ءِ سرا اُرش کنگ ءُ ھمے جواز دیگ کہ سدام ھسین کِرا جوھری سلاہ ھست اَنت۔ امریکن میڈیا ءُ زانتکاراں ارب ملکانی تہ ءَ مدام دزماندجی کتگ ءُ ھمے جواز داتگ کہ اے استان دھشت گردی ءَ کمک کنگ اَنت ءُ امریکہ ءِ سیکیورٹی ھاترا ھترہ اَنت۔
بلوچستان ھم اورئنٹلزم ءِ آماچ بوتگ۔ وھدے کہ برتانیہ برسگیر ءِ سرا کبزہ کنت گڑا بلوچستان سرا کبزہ کنگ ءِ جُھد کنت۔ بلوچستان ءَ بھر ءُ بانگ کنت ءَ بلوچ ءِ راجدپتر ءَ وتی ھساب ءَ نبشتہ کنت۔ جنرل ڈائر ءِ نبشتہ کتگیں کتاب “Raiders of Sarhad” ایشی ءِ یک درورے۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت