تربت ءَ پوج ءِ سے کارندھانی کوش ءِ زمہ واری بی ایل اے ءَ منّ اِتگ

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ سے جتاجتائیں کاروائیاں زورگریں پوج ،ھال اھوالی ٹاور ءُ زورگریں پوج ءَ راشن سر کنوک نشانگ کتگ اَنت-

جارکش ءَ گْوشتگ بی ایل اے ءِ سرمچاراں مروچی تربت ءَ یک کاروائی ءِ میان ءَ زورگریں پوج نشانگ کتگ-

جارکش ءَ گْوشتگ کہ تربت ءِ دمگ ناصر آباد ءَ بلوچ لبریشن آرمی ءِ سرمچاراں زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ کتگ- تراک ءِ نشانگ آیگ ءَ دُژمنیں پوج ءِ سے کارندہ جاہ پہ جاھی مرتگ اَنت وھدے کہ چار سک ٹپیگ بیتگ اَنت، آیانی گاڑی سرجمی ءَ تباہ بیتگ-

جارکش ءَ گْوشتگ کہ دگہ یک کاروائی ءَ بی ایل اے ءِ سرمچاراں سبی ءِ دمگ ناڑی بنک ءَ درخان شار ھند سر ءَ زونگ شرکت ءِ ھال اھوالی ٍٹاور نشانگ کتگ- سرمچاراں ٹاور ءِ مشینری مانداشتگ ءُ تباہ کتگ-

جارکش ءَ دیمتر ءَ وتی درشان ءِ تہ ءَ گْوشتگ سیمی کاروائی بلوچ لبریشن آرمی ءِ سرمچاراں پنجگور ءِ دمگ پروم ءَ زورگریں پاکستانی پوج واستا راشن سر کنوکیں گاڑی دستیگ کتگ –

جارکش ءَ گْوشتگ ما پروم ءَ ھوار کش گور ءِ دمگی مردماں کڈن کن ایں کہ آ زورگریں پاکستانی پوج ءَ راشن ءُ دگہ سامان سر کنگ ءَ پھریز بہ کن اَنت- اے کڈن ءَ پد اے کار ءَ ھواریں مردم وتی جانی ءُ مالی تاوان زمہ وار وت بنت-

جارکش ءَ گْوشتگ بلوچ لبریشن آرمی اے سئیں اُرشانی زمہ واری ءَ منّ اِیت-