بلوچستان ءِ جتاجتائیں دمگاں چہ دگہ چل ءُ یک مردم زورانسری بیگواہ، یک مردمےآجو بیتگ

بلوچستان ءَ زورانسری آوار جنی ءِ دْرچ برجاہ، چہ کلات، شال، نوشکی ءُ تربت ءَ دگہ چل یک مردم پاکستانی پوج ءَ زورانسری بیگواہ کتگ اَنت-

گیشیں ھالانی رِد ءَ پاکستانی پوج ءَ شال ءِ دمگ چہ قمبرانی دگ ءَ دو ورنا دزگیر کتگ ءُ بیگواہ کتگ اَنت-

کھول رِد ءَ پاکستانی پوج ءَ گوستگیں شپ ءَ کساس یازدہ ءَ بیڑبرتگ فضل الرحمان قمبرانی ء حاجی خلیل قمبرانی ءُ ضیاء رحمان قمبرانی ء عبدالرشید قمبرانی آیانی لوگ چہ کلی قمبرانی ءَ آوار جتگ ءُ بیگواہ کتگ اَنت-

چہ نوشکی ءَ ھالانی رِد ءَ چہ سرجمیں نوشکی ءَ درزنانی ورنا پاکستانی پوج ءَ زورانسری بیگواہ کتگ ءُ ناشناسیں جاھے ءَ برتگ اَنت – انچش نوشکی، کلی جمالدینی ءِ سے ورنا زورانسری آوار جنی ءِ نشانگ کنگ بیتگ- نصراللہ ء ملنگ شاہ بیست یک فروری 2025 ءِ بیگاہ ءِ پنچ ءَ نوشکی اسٹیشن نزیک ءَ ھوٹل ءَ پوریاگری ءَ پد واتر وتی لوگ ءَ روگ ءَ بیتگ بیگواہ بیتگ انگت آ بیگواہ ءَ اِنت-

دو برات ابرار بلوچ ءُ عدنان بلوچ ء اکبر جمالدینی بیسر ھشت پروری ءُ یک مارچ ءِ میانی شپ ءَ آیانی لوگ کلی قمبرانی ءَ پوج ءَ زورانسری بیگواہ کتگ اَنت – وھدے کہ عدنان بلوچ دومی روچ ءَ آجو بیتگ-

عدنان بلوچ اشی ءَ ساری ھم زورانسری بیگواہ کنگ بیتگ-

بی وائی سی نوشکی ءَ راج ءَ چہ دزبندی کتگ ک بے تواری پروش اِت ءُ اے بلاھیں جیڑہ ءِ نیمگ سنجیدگی ءَ دلگوش بکن اِت- اگاں ما نو بے توار بہ بہ ایں گُڑا آؤکیں وھد ءَ جیڑہ گیش بنت- بیگواھیں مردمانی کھول اے در کانودی کار ھلاپ ءَ زوت توار چست بہ کن اَنت- انّیگیں وئیلانی اے گپ ءِ منّانک اِنت کہ ریاست بلوچ ورنایانی گوم ءَ ھرچے کت کنت – بے تواری ءِ بزانت زوراک ءَ گیش توانمند کنگ-

چہ تربت ءَ ھالانی رِد ءَ گزین لیاقت ء لیاقت نامیں نھمک تبک ءِ نودربر مروچی بیگاہ ءَ آپسر ءَ لوگ ءَ دراھگ ءَ پد واتر نیتکگ-

آ سید ھاشمی گرائمر وانگجاہ تربت ءِ نُھمی تبک ءِ نودربرے ءُ گیشکور آواران ءِ جھمنند اِنت بی ایس او پجّار ءِ گوستگیں کیڈر لیاقت بلوچ ءِ بچّ اِنت-

چہ کلات ءَ گوستگیں شپ ءَ پاکستانی پوج ءَ دو درزن ءَ گیش مردم آوار جتگ ءُ بیگواہ کتگ اَنت-

بی وائی سی کلات ءَ یک شنگ کتگیں درشانے ءِ تہ ءَ گْوشتگ کہ بلوچستان ءَ ریاستی کھر جوڑ کنگ ءَ اِنت ھمے ھپتگ ءَ ھزرانی بلوچ ورنا زورانسری آوار جنی ءَ ھوار درزنانی ٹپ ٹوریں لاش ءُ ٹارگٹ کلنگ نشانگ کنگ بیتگ اَنت، وھدے کہ زورانسری آوار جنی، ریاستی زوراکی ءُ ڈیتھ اسکواڈ ءِ زوراکی ءِ ھلاپ ءَ سرجمیں بلوچستان ءَ زھرشانی ءُ نندانک برجاہ ءَ اِنت-

کلات ءَ لوگ لوگ ءَ بیڑبرگ بیگ ءَ اِنت ءُ اے وھد ءَ تنی وھدے ھالانی رِد ءَ سی پنچ ءَ چہ گیش مردم زورانسری آوار جنی ءِ نشانگ کنگ بیتگ اَنت- آیانی پجّار اشفاق بلوچ ء خدا بخش، محمد اسحاق ء حافظ غلام نبی، جمیل احمد ء مولوی یاسین، محمد حمزہ ء عبدالواحد، محراب ء عبدالواحد، مصباح الحق ء عبدالجبار، غلام اللہ ء عبدالرشید، غلام فاروق ء غلام نبی، غلام فاروق، محمد مصطفیٰ ء غلام حیدر، مھرتر خان ء غلام فاروق، عبدل احمد ء علی احمد، ناصر احمد ء علی احمد، بالاچ خان ء عطااللہ، فراز احمد ء فیض احمد، ساجد ء فیض ، مھر طارق ء جان محمد، محمد بخش ء جان محمد ، گاٹر خان ء داد کریم، سمیر احمد ء حاجی رمضان ، محمد اسماعیل ء درمحمد، جمیل ء ھدایت اللہ، عصمت اللہ ء غلام حیدر، صدام ء محمد عظیم، علی دوست ء اللہ بخش، حاجی عبدالرحیم ء علی محمد، زاکر ء عبدالرحیم، معیز ء محمد اقبال، مولوی منیر احمد، سرفراز ء منیر احمد، نیک محمد، احمد ء حاجی محمد بخش، نعیم ء عبدالصمد، اسد اللہ ء عبدالحمید. خلیل احمد ءُ واجد احمد ء خلیل احمد نام ءَ چہ بیتگ اَنت کہ گوستگیں شپ ءَ کلات ءَ آیانی لوگ ءَ چہ بیگواہ کتگ اَنت-

بلوچ یکجھتی کمیٹی سرجمیں بلوچستان ءَ ریاستی زوراکی ءَ ناں تھنا ایر جنت بلکیں بلوچستان ءُ بلوچستان ءَ چہ ڈن انسانی ھکانی ادارھاں ءُ سرپد ءُ سیاسی، چاگردی ھرچ پڑ مردماں چہ گھگیری ءَ دزبندی ءَ کنت- چہ کلات ءَ زورانسری بیگواہ بیتگیں اشفاق بلوچ ءَ ھوار آ دگہ مردم گوستگیں شپ ءَ بیگواہ کنگ بیتگ اَنت کہ آیانی یل کنگ ءِ لوٹ ءَ کن ایں-

دومی نیمگ ءَ کیچ ءِ تھسیل چہ تمپ ءَ بیگواہ کنگ بیتگیں ورنا حسرت خلیل ء میر خلیل نیکی پہ سلامتی آجو بیتگ ءُ لوگ ءَ سر بیتگ-

آ سیزدہ فروری 2025 ءَ تمپ ءِ دمگ چہ گومازی ءَ زورانسری آوار جنی ءِ نشانگ کنگ بیتگ، حسرت خلیل یل بیگ گپ کھول ءَ راست کتگ-