یک پون کالے ءُ دو تیر- ھزاران رھیم داد |ساجدبلوچ

یک پون کالے ءُ دو تیر

نبشتہ کار: ھزاران رھیم داد

رجانکار: ساجد بلوچ

دی بلوچستان پوسٹ

6 دسمبر 2024 ءِ بیگاہ ءَ ات۔ تھاری ءَ پیسریگیں ڈول ءَ گلی بلیدہ مان پوشتگ ات۔ زِرباری بلوچستان ءِ کُچگ ءَ بس یک روچے دو ساھت ءِ واستا لئین رس ایت۔ سردیں ھاموشی ءِ پروشگ ءِ ھاتر ءَ بس کُچکانی وکّگ ءِ توار ءُ عائشہ ءِ نیزوریں سُرِشت اِت اَنت۔ یک ھپتاد سالی ئیں پیریں زالے، آئی ءِ مُود اسپیت ءُ دیم ءَ دْراجیں کریچک ِپِر ات، پہ کُمک ءَ عائشہ ءَ یک دار ءِ لَٹے دست ءَ ات ءُ دومی دست ءَ یک پلیٹے ڈال ءُ لھتیں نان کسانیں ءُ اِنانیں کدم جُت ءُ وتی بست ءُ نو سالی ئیں گوھار زتک ءِ بان ءَ شُت۔ آ وھد ءَ ساھت مگرب ءِ 7:30 ات۔ نوید گِس ءَ اَنچو واتر بوتگ ات گڑا ورگ ءِ واستا چیزے لوٹ ات ئے۔

آئی ءِ تْرو ءَ اَنچو پلیٹ آئی ءِ دیم ءَ ایر کُت اَنت ءُ گُشت ئے اُزیر ءِ ھالاں بہ دے۔ من ءَ یک برے ورگ ءِ ھتم کنگ ءَ بِل، امّا۔ من چہ گُژن ءَ مِرگ ءَ آں۔ من ترا دْراھیں گپاں گُشاں، آئی ءَ گُشت۔ آئی ءَ اَنچو ٹُکرے نان سِست ڈال ءَ پِرجنگ ءَ ات کہ آئی ءِ یک پون کالے اتک۔ شر۔ زاناں تو جزم ئے؟ آئی ءَ گالوار بدل کُت بلوچی ءَ گُشت۔

کساس ھما مگرب ءِ یات کنگ ءَ سے ماہ گوستگ ات کہ عائشہ ءَ گشت کہ من پون کال ءِ ڈائلوگ ءِ دومی نیمگ اِش کُت نہ کُت بلے دیست کہ نوید زوت زوت ءَ پاد اتک۔ ترا ھمیش اِنت کہ نوکی دہ مِلٹ بیت لوگ ءَ اتکگ ئے، ءُ انو پد ءَ روگ ءَ ئے؟ شُھیب، آئی ءِ ناکوزتک، ءَ گُشت تو وتی دیوان ءِ بابت ءَ گوں کرنل ءَ مارا نہ گُشت۔ من نیم ساھت ءِ تہ ءَ کا آں۔ من پد ءَ ترا دْراھیں گپاں گشاں، نوید ءَ دْرّائینت۔ بلے تو وتی ورگ ھتم نہ کُتگ اَنت۔ تو گشتگ ات کہ تو گژنگ ئے، عائشہ ءَ نوید یات ءَ گیتک۔ وھدے کہ من واتر باں گڑا ور آں، آئی ءَ زوت زوت ءَ گُشت آئی ءَ گاڈی ءِ کلیت زُرت اَنت ءُ گوں گُشادی ءَ گاڈی ءِ نیمگ ءَ شُت عائشہ ءَ اُپّے کش ات ورگ یک کش ءَ ایر کُت اَنت بان ءَ شُت شُھیب ھم زوت زوت ءَ پہ واب ءَ دومی بان ءَ شُت۔ شپ ءِ 8:30 ءُ 9 بج ءِ میان ءَ نزیکیں جِنتری کئور ءَ لھتے تیرانی تواراں ھاموشی پروشت۔ اود ءِ مردم گیشتر مھلہ وپس اَنت ھاسکر سردی ءِ موسم ءَ بلے میتگ ءِ لھتے مردم آگاہ ات اَنت کہ زانگ ءِ ھاتر ءَ ڈن ءَ شُت اَنت کہ چے بیتگ۔ کمو رُژنا ات ءُ آیاں ھمے دیست کہ گاڑی ءِ آیڈلائیٹس ءُ انڈیکیٹرز پچ اَنت بلیدہ ضلع کیچ ءِ یک گریبیں ءُ پدمنتگیں تھسیلے کہ چاریں نیمگ ءَ کوھاں چہ اَنگّیر اِنت۔ روکپتی نیمگ ءَ اے کوہ ایران ءِ سیمسر ءَ دُک اَنت۔

اِد ءَ گیشتر اے پیم نہ بیت کہ شپ ءَ ھر کارے گِندگ ءَ کیت ءُ اگاں گِندگ ءَ کیت گڑا مردم ھمے پھم اَنت کہ اے تاگتور یا دُز ءُ ڈُنگانی کار اَنت۔ اود ءَ انچیں گاڈیانی روگ تْرسناک بوت کُت کنت، ھمے ھاتر ءَ اود ءِ مردم گیشتر اود ءِ روگ ءَ گُریز کن اَنت۔ ھمے شپ ءَ تماشائی ھم لپرزگ ءَ ات اَنت۔ لھتیں مردماں ھمے جیڑیتگ ات کہ گاڈی ءِ ٹائیر پنکچر بوتگ ھمیشی ءِ سبب ءَ تْرندیں توار اتکگ، گڑا مردماں دوبر وتی گِس ءِ واتر کنگ ءِ پیسلہ کُت سُھب ءِ شش ءَ یک ٹریکٹر ءِ ڈلاورے وتی گاڑی ءِ اسٹارٹ کنگ ءِ تیاری ءَ کنگ ءَ ات کہ آئی ءَ چہ دور ءَ شپ ءِ اسپیتیں گاڑی دیست کہ آ انگت ھما جاگہ ات۔ آئی ءِ تہ ءَ وس وس ءِ یک مارشتے ودی بوت اے گاڑی اِد ءَ چہ دور اَتکگ، آئی ءَ جیڑ ات۔ یا اے گاڈی پُرشتگ یاکہ یک تْرسناکیں وھیلے ءِ آماچ بوتگ انچشکہ آ نزیک ءَ شُت، ٹریکٹر ڈلاور ءَ تہ ءَ یک مردمے دیست ءُ آئی ءِ سر دیم ءِ نیمگ ءَ جُکّیتگ ات وھدے کہ آ گاڑی ءِ نزیک ءَ رس ات گڑا آئی ءَ دیست کہ نوید چہ ھون ءَ مِچّل ات۔ اے نوید ات سھب ءِ ساھت 6:30 ءَ نوید ءِ کھول اے ترسناکیں وھیل ءِ بابت ءَ سئیگ بوت۔ نوید کُشگ بوتگ ات۔ آیاں نوید ءِ کِسّگ ءَ موبائل ءُ بٹوا ءِ تہ ءِ شناکتی کارڈ ءُ لھتے زر بُرتگ اَنت وھدے آئی ءِ کُنٹ ھَمود ءَ ات گٖڑا بئٹوا ھمود ءَ موجود ات بلے آ ھورک ات۔ آئی ءِ شناکتی کارڈ، موبائیل، ءُ زرّ گار ات اَنت آئی ءَ دو تیر جنگ بوتگ ات، ءُ دوئیں تیر آئی ءِ سر ءَ لگ اتگ اَنت گاڑی چہ پوجی کیمپ ءَ یک کلومیٹرے ءِ دوری ءَ ات۔

یک دیوانے گوں کرنل ءَ:

بلیدہ ءَ وھدے کہ کسّے زورانسری بیگواہ کنگ بیت گڑا آئی ءِ کھول گیشتر نیوانو بِٹ کیمپ ءَ وتی بیگواھیں زھگ ءِ بابت ءَ جست کنگ ءَ روت نوید، کہ یک ڈگارے ءِ مالِک ات، کیمپ ءَ ایپ سی ءِ ھر پیمیں سْرِشت ءَ شریں وڑے ءَ مھلوم ات پرچاکہ ایپ سی ءَ مُدام سرجمیں میتگ ءَ گشت کُتگ۔ یک روچے نوید وتی ڈگار ءِ سر ءَ بیت گڑا ایپ سی ءِ سوبیدار، آئی ءِ گوم ءَ گشت ءِ دوران ءَ نوید ءِ باز رند ءَ دیم پہ دیمی بوتگ، نزیک ءَ اتک نوید ءَ سوبیدار جُست گیپت کہ منی ناکوزتک شمے کِرّ ءَ بند اِنت؟ سوبیدار ءَ پَٹ ءُ لٹ ءَ پد دْرّائینت کہ جست ءُ پُرس بوگ ءَ انت ئے ءُ گشت ئے دو سے روچ ءَ پد آجو کنگ بیت پہ سرپدی دیگ ءَ نوید ءَ سوبیدار ءِ منّت گیپت ءُ آئی ءِ رَھوت نمبر لوٹ ات سوبیدار، کہ بلوچی ءَ بلد ات، ءَ وتی نمبر دات نوید ءِ کھول ءِ رِد ءَ نوید ءَ رند ءَ سوبیدار توار کُتگ گڑا سوبیدار ءَ نوید ءِ گوں کرنل ءَ یک گِند ءُ نندے ٹھینتگ کرنل ءَ نوید سِتک باور کنائینتگ کہ اُزیر ءَ زوت آجو کنیں روچ گوازان بوت اَنت، گِلی ءِ مردم یکجاہ بوت اَنت ءُ پسھانی لوٹگ ءَ نیوانو کیمپ ءِ روگ ءِ پیسلہ کُتگ ات۔ اود ءَ کھولاں ھمے گشگ بوتگ ات کہ کرنل ءِ مات وپات بوتگ آ شُتگ وھدے کہ کیت گڑا اُزیر بلوچ ءَ آجو کنگ بیت گڑا مردم پد ءَ گِساں واتر بوت اَنت ءُ ودار کنگ ءَ ات اَنت شش دسمبر ءَ بلیدہ ءِ کرنل ءَ نوید ءَ را اُزیر ءِ بابت ءَ گپ کنگ ءِ ھاتر ءَ ماں کیمپ ءَ لوٹارینتگ۔ بیگاہ ءِ سے بجا ءِ نزیک ءَ آ اود ءَ شُت، آئی ءِ گوم ءَ بلیدہ ءِ نندوک شکیل بلوچ گون ات۔ نوید 7:30 ءِ نزیک ءَ چہ کیمپ ءَ لوگ ءَ واتر بوت۔ وھدے کہ آئی ءِ آیگ ءَ دہ ملٹ نہ بوتگ ات گڑا آئی ءَ یک پون کالے کیت۔ ورگانی ھتم کنگ ءَ پیسر آ دومی رند ءَ شُت۔

جبری مارچ:

اُزیر ءِ مات عائشہ ءَ زامران پُٹانی ءَ گسے ھست، پُٹانی چہ گِلی ءَ بازیں چیزاں گیشتر زِبَھر اِنت ءُ اَے یک الگیں میتگے۔ آئی ءِ لوگواجہ گیشتر ھَمِدا نندوک اِنت، وتی پساں چارین اِیت۔ عائشہ وتی زھگانی ھمراھی ءَ، کہ آ اوں شریک اَنت، گِلی ءَ یکیں جاگہ ءَ نشتگ اَنت اود ءَ آئی ءِ برات حمید ھم جھمنند انت، نوید ءِ مات پیسر ءَ وپات بوتگ ات ءُ نوید ءِ مات ءِ مرگ ءَ پد گڑا ھما اِنت عائشہ وتی برات حمید ءِ گِس ءَ ھیالداری ءَ کنگ ءَ اِنت گوں چہ کوھاں اَنگیر پُٹانی اَنچو دور اِنت کہ اگاں کسے موتر سائیکل ءِ سر ءَ بروت گڑا اود ءَ روگ سک گْران اِنت۔ اود ءَ بُنکّی آسراتی ھچ نیست چمیشکا ازیر بلوچ گیشتر وتی کماش ءِ ورگ ءُ سامان ءِ رسینگ ءِ ھاتر ءَ اود ءَ شتگ ات۔ یک روچے یک گشتے ءِ دوران ءَ حمید وتی زھگ اُزیر ءِ ھمراھی ءَ گدان ءِ ڈنّ ءَ نندوک ات گڑا ایپ سی ھَمدا کا اَنت۔ آیاں پِت ءُ چُک دْروت ءُ سلام کُت اَنت ءُ پد ءَ وتی نزیکیں سیاد عبدالرھمان ءِ گوناں دلگوش بوت اَنت ایپ سی ءَ اُزیر بلوچ ءُ عبدالرھمان وتی گوناں آیگ ءِ واستا گشت انت اُزیر ءُ عبدالرھمان دو روچ ءُ دو شپ ایپ سی ءِ ھمراھی ءَ راہ ءَ ات اَنت اُزیر ءِ کھول ءِ گشگ اِنت کہ ایپ سی ءَ کوہ ءُ دمگانی نکشہ ءُ اکس گون بوتگ اَنت، آیانی تہ ءَ لھتے اُزیر ءَ زانت اَنت ءُ لھتے انّا۔ آیاں اُزیر بار بار زور داتگ کہ تو آجوئی لوٹوکیں سرمچارانی بابت ءَ سرپدی بہ دے کہ کجا بوت کُت کن اَنت بلے اُزیر ءِ کرّ ءَ آیانی بابت ءَ ھچ سرپدی نیست ات۔

ایشی ءَ چہ ابید حمید وتی پس ءُ میشانی سمبالگ ءَ وتی ھر روچیگیں کاراں کنگ ءَ ات۔ پد ءَ چہ دور ءَ آئی ءَ ایپ سی والا واتر آیگ ءَ دیست اَنت۔ آئی ءِ گُشے دل لاپ ءَ نہ ات ءُ لرزگ ءَ لگ ات کہ منی زھگ ءَ مہ بارت ءُ مہ کش ایت۔ آئی ءِ زھگ زندگ ات، ءُ گِس ءِ نیمگ ءَ واتر کنگ ءَ ات آئی ءِ پِت آسودگ بوت ءُ اللہ ءِ سُجدہ ءَ کپت ءُ اللہ ءِ کرّ ءَ دوا ئے لوٹ ات۔ وھدے کہ آ آیانی مِلگ ءَ تیزی ءِ گون ءَ روگ ءَ ات، گڑا ایپ سی والاھانی تہ ءَ یکے ءَ آ اوشتگ ءِ واستا گشت مئے دومی گروپ ءَ ھمے ساھت ءَ بریانی یے جوڑ کُت، آیانی تہ ءَ یکے ءَ گشت۔ اُزیر مئے گوم ءَ بریانی وارت گوں پد ءَ ما آئی ءَ دوبر دیم دے ایں۔ انّا مئے کرّ ءَ ورگ ھست، حمید ءَ دْرّائینت۔ من شمے منّت ءَ گر آں کہ ایشی ءَ بِل ات کہ ھَمِدا اِنت من لوٹاں کہ وتی زھگ ءَ بہ گِند آں۔

آیانی تہ ءَ یکے ءَ کند ایت ءُ گشت، کہ آئی ءَ کمو باز بلوچی زانتگ ات، بابا انو نوکی دو روچ اِنت، ءُ ترا پیسر ءَ وس وس بوگ ءَ اِنت۔ پد ءَ اُزیر ءِ نیمگ ءَ دلگوش بوت ءُ گشت ئے بر ایں رو ایں۔ اُزیر ءَ یک لبزے ھم نہ گُشت۔ آئی ءِ کماش آیانی منّت ءَ گِر ءَ ات بلے اُزیر ءُ آئی ءِ سیاد گوں وت بُرت اَنت اش انچشکہ کہ آ پُٹانی ءِ کسانیں کوھاں اندیم بوت اَنت، سپائیگاں آیانی چم سیاھیں پٹی ءِ سر ءَ بست اَنت بلیدہ ءِ کیمپ ءَ بُرت اَنت۔ اُزیر بلوچ ءُ عبدالرھمن 18 نومبر 2024 ءَ ایپ سی ءَ زورانسری بیگواہ کُرت اَنت نوید ءِ ناھکیں کوش ءَ سے روچ پیسر اُزیر بلوچ ءُ عبدالرھمن بلوچ 10 دسمبر ءَ آجو کنگ بوت اَنت۔

مَرگ ءِ لوٹوک:

شما یاگیاں گِند ات ءُ مارا ھال نہ دے ات۔ تو سرمچاراں راشن دے ئے۔ یک ایپ سی اپسرے ءَ اُزیر گُشت وھدے کہ اُزیر بندیگ ات بلے مارا مرچی دو روچ بیت شمے گوم ءَ ایں، زاناں شما جنگولیں ءُ آجوئی لوٹوکیں سرمچار دیستگ؟ اُزیر ءَ گشت۔ اناگت ءَ آئی ءِ دیم ءَ یک ترندیں شھماتے لگ ات آئی ءِ چم سیاھیں پٹی ءِ سر ءَ بستگ ات اَنت، آئی ءِ دست ترندی ءَ پشتہ بستگ ات اَنت۔ چہ ترندیں شھمات ءَ آئی ءِ پُونز ھون دیگ ءَ لگ ات آئی ءَ زانت کُت نہ کُت کہ آ ھون ات اَنت یا ھِید ریچگ ءَ ات اَنت، بلے یکے ءَ ھبر دات کہ ایشی ءِ ھوناں ساپ کن ات سک نازُرک اِنت یک شھماتے بارے لگیتگ ئے یا انّا پیسر ءَ ایشی ءِ ھون تالان اَنت بلے کس ءَ آئی ءِ ریتکگیں ھون ساپ نہ کُت اَنت توار کن وتی سرمچاراں بلّے ترا بچّارین اَنت، دگہ یکے ءَ گوں ترندی ءَ گُشت دانکہ ھپت روچ ءَ آیاں اُزیر واب ءَ نیشت گارڈاں وتی شپ ءُ روچ ءِ شِپٹنگ بدل کُت اَنت بلے اُزیر آگاہ ات اگاں چہ بازیں ژندی ءَ آئی ءِ سر جُکّ ات، گڑا بزاں لَٹّے آئی ءِ سر ءَ لگ ات۔ آگاں اُزیر سرجمی ءَ ھاموش بوگ ءِ جُھد ءَ کنت، چہ آیانی لَٹّانی بچّگ ءِ اوست ءَ، آ ایشی ءِ مُوداں ژپ اَنت تو زندگ ئے؟ تو پرچا نہ سُرّگ ءَ ئے؟ آئی ءِ دست انگہ تک آئی ءِ پُشتہ ءَ بستگ ات اَنت چہ بازیں کُونڈانی سر ءِ اوشتگ ءَ آئی ءِ کونڈ ٹپّ ات اَنت۔ اے رسترانی دست ءَ کپگ ءَ پیسر کسّے وت ءَ وت بہ کُش ایت شرتر اِنت، اُزیر ءَ گُشت اگاں منی کِرّ ءَ تیزیں بلڈے بوتیں گڑا من وت ءَ را وت کُشتگ ات یک روچے آیاں ایشی ءِ سر گوں دیوال ءَ جَت آئی ءِ دیم ءَ ھون ریچگ ءَ ات کموکیں دیرانی وست ءَ آئی ءَ آسودگی مار ات “گڈی ءَ من مِر آں۔” بلے مَرگ نیاتک یکے ءَ آئی ءَ ڈاکٹر ءِ برگ ءِ پرمان دات تُرے بلّے آئی ءِ اردو نیزور ات بلے آئی ءَ پرمان پھم ات آئی ءَ بلوچی ءَ کُکّار کُت ”ڈاکٹر انّا–من ءَ مِرگ ءَ بِل” آیاں کند ات۔ آیاں اے پد ءَ جت ءُ گِرّان کُت ڈاکٹر ءَ بُرت ءُ داکٹر ءَ آئی ءِ ٹپ ملم ءُ پٹی کُرت اَنت۔ پد ءَ آئی ءَ تھاریں کوٹی ءِ تہ ءَ بُرت دوئیں اُزیر ءُ عبدالرھمن جُتائیں کولی ءِ تہ ءَ بند ات اَنت۔ آیاں یک ءُ دومی ءَ بھ نہ دیست، بلے جُست ءُ پُرس کنوکاں سِتک ات کہ ایشانی ازیت یک ءُ دومئیگ ءَ ھمگرنچ اَنت۔ اُزیر ءِ پیسر ءَ دْراھیں چیز گُشتگ اَنت، آئی ءَ گُشتگ تو ایپ سی ءِ گاڈی ءِ چیر ءَ بمب کَنڈ کُتگ، آیاں عبدالرھمن جُست گیپت۔ بلے آیاں اُزیر ھم گشت کہ عبدالرھمن ءَ دْراھیں چیز منّیتگ اَنت۔ تو اے کُتگ، آیاں گُشت۔ بلے آ دوئینانی تہ ءَ کس ءَ بمب کل نہ کُتگ ات۔ آیاں زانتگ ات ھمے ڈول ءَ آیاں بے سریں ازیت اوپار کُت۔ بس تو بہ من، بگش کہ تو کُتگ ءُ اے کیس ھَمدا چہ ھتم بیت۔ وھدے کہ اُزیر انکار کنت گڑا پشتہ چہ پلّوھاں لگت جنگ بیت یاکہ لِنگاں لَٹ جنگ بیت۔ یا آئی ءِ گْوات گپتگیں دیم ءِ سر ءَ ھاک جنگ بیت۔ عبدالرھمن ءَ ھم ھمے یکیں اَزاب دیگ بوت۔ لھتے شپاں آیاں چہ دیوالاں نیزوریں گریوگ اِش کُت کُت، ھر کس بے سِتک ات کہ گشے آ دومی زندانیگ ءَ چہ اتکگ اَنت یا دگہ زندانیگ ءَ چہ۔
زندانیگیں اُزیر ءِ گشگ اِنت وھدے کہ آ زندان ءَ ات، گڑا ایپ سی والاھاں چہ ایشی ءَ نوید ءِ بابت ءَ ھم جُست گیپتگ۔ آئی ءَ چے کُتگ ءُ کجا نشتگ۔ من کِشت ءُ کشاری کناں ءُ آ ھر وھد ءَ مئے کرّ ءَ بوتگ، اُزیر ءَ دْرّائینت۔ عائشہ ءَ یک برے ھم یات نہ بیت کہ وھدے کہ میتگ ءَ ایپ سی ءِ سر ءِ اُرش ءَ پد دومی روچ یا شپ ءَ گِلی ءَ پوجیاں ایشی ءِ گِس بیڑ نہ بُرتگ۔ ایشی ءِ پنچ چُک اَنت، دْراہ یک یک برے زورانسری بیگواہ کُرتگ اَنت، لھتیں یک ءَ گیش رند ءَ بیگواہ کُرتگ۔ ازیت داتگ اَنت ءُ پد ءَ آجو کُتگ اَنت بس ھمے ھاتر ءَ کہ آ دْراہ پد ءَ کیمپ ءَ چکر بہ جن اَنت۔ من ءَ سِتک انت کہ ماں گِلی بلیدہ ءَ دہ سال ءَ بُرز ءِ ھر گوانڈل کم چہ کم یک رندے بیگواہ کنگ بیتگ، ایپ سی ءِ سِپارت (کسٹاڈی) ءَ کنگ بیتگ، یا کیمپ ءِ تہ ءَ آیاں اوشتارینگ بیتگ، کس بکشگ نہ بوتگ، آیاں گشت۔ عائشہ ءَ گُشت کہ منی بْرات حمید بگر سوب ءَ دو رند ءَ آیانی سِپارت ءِ تہ ءَ بوتگ۔ آ کا اَنت ءُ گُش اَنت کہ بر ایں لھتے جست ءُ پُرس بچیتگ۔ اللہ ءِ شکر اِنت حمید یلہ اش دات، آئی ءَ گوں گریوگ ءَ گُشت۔ ازیر انگت نوکیں گاڑی، اناگہ رُژنائی، یاکہ درآمدیں مردماں بہ گند ایت، گڑا کُکّار کَنت۔ وھدے کہ آ واتر بوت گڑا آئی ءِ تیوگیں اندام سُھر ءُ ٹپّاں چہ پُر اَت، ٹپّاں چہ پوشیتگ ات، ءُ آئی ءِ کونڈ ترک اتگ ات اَنت۔ آئی ءَ شریں وڑے ءَ نشت کُت نہ کُت ءُ اگاں کھول ءِ مردماں بگر دگہ ھر کس اتکگ گڑا کُکّار ئے کُت۔ آیاں منی مھروانیں چُک ءِ گوم ءَ چے کُت؟ بلے ما ھچ گشت کُت نہ کُت، پرچاکہ آیاں مئے زھگ آجو کُت بازیناں اے موہ نہ رس اتگ، عائشہ ءَ گُشت۔ عائشہ ءَ یات اِنت کہ اگست 2024 ءَ آئی دو دگہ چُک ءُ براتزک چیتو زورانسری بیگواہ کنگ بوت اَنت۔ سال ءِ دوازدھمی ماہ ات کہ ایپ سی آئی ءِ زھگ نزیر، کہ ڈگار ءَ سر ءَ کار ءَ ات، آئی ءَ گِْران کن اَنت ڈنّ ءَ کار انت ءُ لوگ ءَ بُر اَنت۔ اود ءَ آئی ءِ سیمی چُک حنیف ءُ نوید ءِ برات ولید ءَ زورانسری بیگواہ کن اَنت نوید ءِ 17 سالی ئیں گوھار دُرّاتون ایپ سی ءِ گاڈی ءِ پُشتہ تتک ءُ کُکّار کُکّار ءَ پِریات ءَ ات کہ منی برات ءُ ناکوزتک ءَ آجو کن ات۔ یک سپائیگے ءَ کند ات ءُ آئی ءِ دست ءَ بمبے ات۔“ بس کن“ ھاموش بو اگاں ناں من اے بمب ءَ تئی دپ ءِ تہ ءَ چگل دیاں بلے آئی ءَ پشتہ کِنزگ ءَ انکار کُت آئی ءَ بلوچی ءَ کُکّار ءَ گشت کہ من بے توار نہ باں۔ آئی ءَ سِنگے چِست کُت ءُ گاڈی ءِ نیمگ ءَ چگل دات۔ دنز چِست بوت اَنت، آئی ءِ چم جِک جنگ ءَ ات اَنت وھدے ایپ سی گاڈی گوں تیزی ءَ شت اَنت۔ ایپ سی ءِ سپائیگاں نزیک ءَ یک زمیاد گاڈی یے دیست۔ اے کئیگ اِنت، آیاں گُشت۔ لوگ ءِ مردماں گُشت اے نوید ئیگ اِنت۔ نوید یک پسّے ءِ شوھاز ءَ در کپتگ ات کہ پس چہ آئی ءِ ڈگار ءَ گار ات۔ بلے آئی ءِ ناکو میران، کہ نشہ ءِ ھِیلداری ءَ وتی وڑ ءَ کُتگ ات، ءُ ایشی ءِ 15 سالی ئیں بچک رحیم جان ھم بیگواہ کرت۔

عائشہ ءَ انگت یات کنت کہ رحیم جان ءِ گوھار، مھناز، دھشت ءِ تہ ءَ کُکّار کنگ ءَ ات، ءُ آئی ءَ اے زانگ لوٹ ات کہ آ ایشی ءِ بْرات ءَ چی ءِ واستہ برگ ءَ اَنت۔ یک ایپ سی والایے آئی ءِ نیمگ ءَ شت۔ آ جِنک ءَ منی کرّ ءَ بیار ات۔ چہ ترس ءَ آ لوگ ءِ تہ ءَ تتک کپت ءُ بے ھوش بوت۔ ایپ سی ءَ آئی ءِ رنگیری نہ کُت۔

داں روزرد ءَ میران ءُ رحیم جان آجو کنگ بوت اَنت بلے نزیر، حنیف ءُ ولید انگت بیگواہ ات اَنت۔ ایشی ءَ ابید چہ پہ آیاں 16 روچ ءِ اَزاب اَت۔ حنیف، نزیر ءُ ولید ءِ سر ءَ بمب کل کنگ ءِ بھتام لگیتگ ات۔ سپائیاں آیانی چم پٹی بست اَنت ءُ گِْرّان کُت اَنت اش جُتائیں کولیانی تہ ءَ بُرت اَنت اش، ءُ چہ واب ءَ زِبَھر کُت اَنت اش۔ ھر کس ءَ گُشت کہ آیاں وتی گُناہ منّیتگ اَنت۔ وھدے کہ آ آجو اش کُت اَنت گڑا چہ بازیں لَٹّانی ءُ سواسانی ٹپّاں آیانی جان ءِ پوست گشے لاگشتگ ات اَنت ءُ آیانی جانانی سر ءَ لَٹانی ٹپ ایر ات اَنت۔

گِلّی ءَ زندگی:

عائشہ ءَ اے ریجن ءِ تہ ءِ زندگی ءِ ھر روچیگیں جھد ءِ بابت ءَ گُشت کہ اِد ءَ دگ، نادْراھجاہ، وانگجاہ، لئین، ءُ روزگار ءِ موہ نیست۔ برے برے یک پسے مئے ڈگار ءِ تہ ءَ کیت ءُ مئے کِشاراں وارت یا پُلانی کِشگ ءِ عمل ءَ اڑاند پیداک کنت۔ نادْراھجاہ ءِ نہ بوگ ءِ سبب ءَ ما کسانیں نادْراھی ءَ چہ مُرت کُت کنیں۔ نشہ مئے مردماں تباہ کنگ ءَ اِنت۔ ما یک دگے ءِ واستا جھد کنگ ءَ ایں کہ مئے زالبول نادْراھی ءِ وھد ءَ راہ ءِ نیم ءَ مہ مِر ایت۔ دگانی کمی ءِ سبب ءَ بازیں جنینانی مِرگ یک المیھے کہ اے ما منّیتگ۔ اے ھر روچیگیں جنجالی مارا مدان مدان ءَ تباہ کنگ ءَ اِنت۔ بلے ما ایشاں اوپار کنیں، آئی ءَ گُشت۔ بلے وھدے کہ پاکستانی لشکر مئے گِسانی تہ ءَ پُترِت، مئے زھگاں مئے دیم ءَ گِْرّان کنت ءُ بارت، ءُ آیاں ٹارچر کنت۔ آیاں مجبور کنت کہ بمب شما کل کُتگ، بلّے تُرے ھر چیز بیت۔ اے پیمیں ریاستی جَلّادی ءَ چیتو من ایں؟ آ مئے زھگاں مئے دیم بر اَنت ءُ ما آیانی منّت ءَ گر ایں، بلے آ مارا گوش نہ دار اَنت۔ رند ءَ آ ھمے گُش اَنت ما کس نہ برتگ۔ وھدے کہ ما وت چمدیستیں گْواہ ایں گڑا آ ایشی ءَ چیتو انکار کن اَنت؟ عائشہ ءَ انگت یات اِنت کہ وھدے کہ اُزیر ءَ برگ ءَ ات اَنت گڑا نوید اُزیر ءَ باور کنائینگ ءَ ات کہ من ءَ بلیدہ ءِ کرنل ءِ گوم ءَ ھال ءُ اھوال ھست اگاں ھچ نہ بوت گڑا ما دگ ءَ بند کنیں۔ انو من اُزیر ءَ گِنداں من ءَ گیشتر درد بیت۔ نوید آئی ءِ واستا بے سبر ات، آ وتی ھر ممکنیں جھد ءَ کنگ ءَ ات بلے انگت اُزیر ایپ سی ءَ نوید ءِ کوش ءَ پد آجو کُت۔ گِلی بلیدہ ءِ دگہ نندوکے ھاتون ءَ گُشت کہ آئی ءِ کسانیں چُک اَنت، ءُ آ ھر شپ پاد کیت آیاں اوتاک ءِ تہ ءَ چار ایت۔ ھمے گِندگ ءِ واستہ کہ آ ھَمود ءَ اَنت یا برگ بوتگ اَنت۔ ما یکشلیں تْرس ءِ تہ ءَ ایں کہ مئے زھگ مرچی باندا بیگواہ بوت کُت کن اَنت۔ ما وتی سولر ءِ لئیٹ ءَ بگر وپت کُت نہ کنیں ھمے تْرس ءَ کہ پاکستانی لشکر تھاری ءَ کیت۔ گرماگ ءَ ماں بلیدہ ءَ لئین ءِ نہ بوگ ءِ سبب ءَ ما اوتاگانی ڈنّ ءَ وپس ایں بلے زالبولانی ھچ اِھوت (پرائیویسی) نیست۔ ایپ سی کجام ھم وھد ءَ مئے چپ ءُ چاگرد ءَ گَشت کُت کنت۔

سوبمندیں آپریشن:

7 دسمبر ءِ سھب ءَ نوید ءِ کھول ءَ آئی ءِ ھون مِچلیں جون چہ آئی ءِ گاڈی ءَ دست کپت۔ ایشی ءَ ابید چہ آئی ایس آئی ءِ پیسبک پیج، کل آئی ءِ پالور 385،000 اَنت، یک گراپِک پوسٹے ماں رسانکدر ءَ دنت ءُ آئی ءِ یک نیمگے نوید ءِ اکسے ات ءُ دومی نیمگ ءَ پاکستانی پوج ءِ اکس ات۔ اردو کِپشن ءَ ھمے نبشتہ ات، ” سیکیورٹی فورسز کا کامیاب آپریشن – دہشت گرد کمانڈر نوید کو اس کی قسمت میں بھیج دیا گیا ہے۔”بلے دگہ ھچ بیان نیست ات۔

کِشارانی ءُ کیمپانی میان ءَ:

نوید ءِ پِت ءَ بے تواری ءَ گشت۔ شمے کِرّ ءَ (ایپ سی) کوھانی تہ ءَ بازیں کیمپ بیت، کئیمرا جتگیں کیمپ بیت۔ نوید ھَمِدا شمے دیم ءَ ات۔ آ گوں ھچ اِے وڑیں چیزاں ھوار نہ بوتگ چہ آئی ءَ نوید ناھکی کوش ءِ سبب بہ بیت۔ آیاں گُشت کہ ماں بلیدہ ءَ کِشت ءُ کِشاری ءُ سیمسری پابار مئے زندگ بوگ ءِ واستا اولی ءُ آکری وسیلہ اِنت، بلے پاکستان ءِ پوج ءَ اے دوئیں وتی پنجگ ءَ کُتگ اَنت۔ وھدے کہ ما وتی زمین ءِ سر ءَ کِشت ءُ کِشاری کنیں، پاکستان ءِ لشکر سرجمی ءَ ھمود ءَ کیت، مئے ٹریکٹرانی توارانی سر ءَ جست چِست کن اَنت۔ باز براں آ مارا دارگ ءِ پرمان ءَ دے اَنت، باز براں مارا کار کنگ ءِ اجازت دے اَنت۔ مارا وتی زمین ءِ سر ءَ آیانی اجازت زُرگ کپ ایت۔

حمید ءِ لِھجہ دمبرتگ ات بلے پُرزور ءُ تکڑا ات۔ ما ھر روچ زلیل ءُ کوار ایں۔ اد ءَ لئین نیست ءُ نادْراھجاہ ھم، بلے پوجی آپریشن، زوربیگواھی، کشگ ءُ دار دیگ ھساب نہ بنت۔ بلے ما کجا برو ایں؟ بلیدہ مئے گِس اِنت، مئے زمین اِنت۔ وھدے من اد ءَ چاول کِش آں ءُ ما ایشاں ور ایں گڑا گوں شان ءَ ھمے ڈول کنیں، ھمے زانگ ءَ ایں اے چہ مئے زمین ءِ ھاک ءَ اتکگ اَنت۔ ما گیشتر کِشت ءُ کِشاری کنیں، وتی زمین ءِ سر ءَ بھا ھم کنیں، ءُ پہ باپار ءَ سیمسرانی سر ءَ نہ رو ایں بلے انگت مارا نئیل اَنت۔

شپ ءِ گُڈی ساھت ءَ پوج گشت کنت، بگر سبب ءَ مئے گِساں پٹ ایت، مئے ساماناں شینگ ءُ شانگ کنت، ءُ پد ءَ رو اَنت۔ انچو سرد اِنت کہ آپ بد اَنت، بلے انگت مئے کرّ ءَ ھیٹر نیست لئین نیست۔ گرمی ءَ بگر پنکا ءَ گرمی اوپار کنگ نہ بیت۔ اد ءَ نیٹورک نیست، انٹرنیٹ نیست ءُ نئیکہ نادْراھجاہ۔ بس ترس ءُ تھنائی۔

اگاں اناگہ بلیدہ ءَ پوج ءِ سر ءَ اُرش بہ بیت گڑا دومی روچ ءَ آ ھَمِد ءِ جھمنندانی سر ءَ اُرش کنت۔ آ مارا کیمپ ءَ آیگ ءَ گُش اَنت۔ ڈیتھ اسکواڈز، پاکستان ءِ داشتگیں جھمنندیں مردماں، ءِ وسیلہ ءَ توار کنگ بیت، ءُ اگاں ما انکار بکن ایں گڑا بزاں آ مئے ٹوکناں بند کن اَنت۔ آ مارا مجبور کن اَنت۔ اگاں کسّے کیمپ ءِ کش ءَ گوازگ ءَ اِنت گڑا سیمنٹ یا سِنگ ءِ چِست کنگ ءِ پرمان ءَ دے اَنت۔ اگاں کسّے ءَ تیل ءِ بارے گون گڑا آئی ءِ تیلاں ایر کنگ ءِ پرمان ءَ دنت ءُ پد ءَ دوبار ءَ تیلانی چِست کنگ ءِ اجازت ءَ چہ پیسر ءَ آیاں ھمے گشگ بیت کہ کوھانی تہ ءَ آیانی راشناں کیمپاں سر کنگ ءَ مجبور کن اَنت۔

منی زھگ ءَ بھ سرکاری مردم نہ کشتگ، بھ کوھاں نہ شتگ، بھ گوں ڈیتھ اسکواڑاں ھوار نہ بوتگ، شاھد ھمے ھاتر ءَ آ کشگ بوت۔

یک توارے دائمی ءَ ھاموش کنگ بوت: نوید 2018 ءَ چہ دبئی ءَ پاکستان ءَ واتر کنگ ءَ چہ پد آئی ءَ وتی پِت ءُ پیرکی زمین ءِ سر ءَ کِشت ءُ کِشاری کُت۔ نادْراھی ءَ نوید دبئی ءَ مزدوری ءَ نیشت۔ آئی ءَ بلیدہ ءَ ننداگ ءَ پیسر کراچی ءَ ھلاج کنگ ءِ جھد کُت، وتی پِت ءُ پیرُکی زمین ءِ سر ءَ کِشت ءُ کِشاری کنگ وتی کھول ءِ روزی ءِ وسیلہ کتگ ات۔ آئی ءَ گلّہ، چاول، ءُ سبزی کِشت ءُ وتی ڈگار ءِ شر ءَ کنگ ءَ باز جھد کت، ءُ سیمسری باپار ءِ تہ ءَ زرّ ءِ گیش کنگ ءَ زمیاد ڈلاور ءِ ھساب ءَ گَٹ ات۔ 2021 ءَ پوج ءَ باڈر ءِ دست ءَ کنگ ءِ ھاتر ءَ ٹوکن سسٹم دیم ءَ آؤرت۔ ھما کہ تیل ءِ باپار کنگ ءَ ات ھاسکر ھما کہ 2000 زمیاد ءُ ٹویوٹا گاڈیانی مالِک ات اَنت ٹوکن شناکتی کارڈ ءِ وسیلہ ءَ دیگ بوت اَنت ءُ آ ماھے یک رندے ءُ بیست ءُ چار ساھت ءِ تہ ءَ شُت کنت۔ وھیل ءِ دیمپان بوگ ءِ ریسک، دُزّانی دمکیانی ترس، ایرانی گجرانی تُرس ءَ ابید چہ باڈر ءِ باپار بلیدہ ءِ تہ ءَ روزیگ ءِ واستا یک مزنیں وسیلھے۔

ھژدہ سال ءِ اُمر ءَ آئی ءِ یک سیادے ءَ ماں دبئی ءَ نوید ءَ را کارے ءِ شوھازگ ءَ کمک کت۔ چہ آئی ءِ مھنت ءَ آئی ءِ پِت، یک دھکانے، یک لوگے ءِ بندگ ءَ لائک کُت۔ بلے کِشت ءُ کِشاری آیانی روزیگ ءِ مرکز ات، ءُ نوید ءَ مدام وتی زمین ءِ سر ءَ کار کنگ ءَ شان کُت۔

نوید چوناھا یک بزگرے ءَ گیش ات۔ آئی ءَ وتی چاگِرد ءَ گوں باز نزیکی ھست ات ءُ آزار بیتگیں مردمانی کُمک ءِ ھاتر ءَ مدام ساجو ات۔ بلیدہ ءِ تہ ءَ زوربیگواھی ءُ دروگیں میڑ ءَ کشگ ءُ دور دیگ انگت برجاہ اِنت، ءُ آ گمیگیں کھولانی واستا یک دیوالے ات۔ وھدے کہ کسّے بیگواہ بوتگ گڑا بیگواھیں مردم ءِ کھول زوت ءَ نوید ءِ نیمگ ءَ اتکگ۔ آئی ءَ زھرشانی ءُ پریس کانپریس ءِ ھاتر ءَ تربت شَھر ءِ رسینگ ءَ، ءُ دومئیگاں ناانساپی ءِ ھلاپ ءَ اوشتگ ءُ یکجاھی ءِ کمک ئے کُتگ۔ نوید ءَ وتی چاگِرد ءِ مردمانی گوم ءَ مھر ات ءُ آئی ءَ ھر پیمیں کمک کنگ ءَ ات، آئی ءِ مستریں گوھار ءَ انگت یات اِنت۔ آ مئے کھول ءِ تہ ءَ چہ دْرستاں رھم دلیں انسانے ات۔

پوج ءَ نوید ءِ ھمے پیمیں چِست ءُ ایراں نوید نشانگ کُتگ۔ اگاں مردمانی کمک کنگ نوید ءَ یک کمانڈرے جوڑ کنت، گڑا ما منّ ایں، آئی ءِ گوھار ءَ گوں تھلی ءَ گشت۔ بلے یک کمانڈرے بھ پوجی کیمپ ءَ نہ روت ءُ گوں کرنل ءَ گپ نہ کنت۔ کیمپ ءِ تہ ءَ کئیمرا ھست، ءُ مئے لوگ چہ کیمپ ءَ باز نزیک اِنت۔ آ چون گُشت کنت کہ نوید یک کمانڈرے بوتگ۔ آ ھر وھد ءَ ھمد ءَ موجود بوتگ، ھر کسی دیم ءَ بوتگ، کِشت ءُ کِشاری ئے کُتگ ءُ اُزیر ءِ آجو کنگ ءِ ھاتر ءَ ایپ سی ءِ گوناں ھال ئے ھم کُتگ۔

بلوچ یکھجتی کمیٹی ءَ ماں رسانکدر ءَ نوید ءِ دروگیں میڑ ءَ کُشگ ایر جت ءُ گُشت: نوید وتی بْرات ءُ زوربیگواھیں بلوچانی ھاتر ءَ یک توارے ات۔ آ 28 جولائی بلوچ راجی مُچّی ءَ ھم ھوار ات کار ءَ ات ءُ بلوچ ءِ گم ئے پِر ات۔

جولائی 2024 ءَ چہ بلیدہ ءَ دہ زوربیگواھیں مردمانی کھول تربت ڈپٹی کمشنر ءِ دپتر ءِ دیم ءَ کیمپ جتگ ات۔ نوید کیمپ ءِ کارکنوکانی تہ ءَ یک کارکنوکے ات۔ آئی ءَ کیمپ ءِ کھولانی ھاتر ءَ ورگ ھم اڈ کُرت، عارف ءَ گشت۔ عارف ءِ چُک مسلم ھم زوربیگواھی ءِ آماچ ات ءُ رند ءَ آجو کنگ بوتگ ات۔

نوید ھچ گناہ ءِ بنیات ءَ کُشگ نہ بوتگ۔ آئی ءَ بلیدہ ءِ مردمانی گوم ءَ اوشتگ ءِ سبب ءَ کشگ بوتگ، وھدے کہ آ دگہ مردماں تْرسیتگ، نوید ءَ گپ جتگ، زیبا ءَ گوں وتی ارسیگیں چماں دْرّائینت۔