بساک ءِ کتاب کاروان ءِ پرچا زوراکی؟-چیدہ بلوچ

بساک ءِ کتاب کاروان ءِ پرچا زوراکی؟

نبشتہ کار : چیدہ بلوچ

دی بلوچستان پوسٹ

مرچی وھدے کہ بساک کتاب کاروان ءِ بابت ءٙ یک پوسٹے دیست کہ اِستانی اُرش ءِ ھلاپ ءٙ یک سیمینار اڈ دیگ ءٙ انت ۔ اے استانی ارش بلوچستان ءِ مزنیں شھر ءُ وتگڑیں دیمروئی چیدگ گوادر ءُ ایندگہ شھرانی تہ ءٙ برجاہ بیت ۔ بلئے ھمے دمان ءٙ دیم ءِ پوسٹ دیست کہ ھمے گوادر ءٙ کتب میلہ برجاہ انت گڑا زھن ءٙ سک باز ھیال اتک کہ یکیں شھر ءِ دو جُتائیں بیانیہ وجود دارگ ءٙ انت-

وھدے کہ بلوچ وانندہ گل بساک بک اسٹال ءٙ جنت گڑا پولیس چیریں ادارہانی وسیلہ ءٙ کتابانی سر ءَ ارش کنت ءُ کتاباں گوں سنگتاں بارت انت۔

سنگت ایف آئی آر بنت ءُ روچے ءَ پد سنگت یلہ بنت بلئے ابکہ ءِ گپ ایش انت کہ کتاب بندیگ انت ۔ بلوچستان ءِ تہ ءٙ کتاب وانگ ءِ سرا ءٙ اُرش ءِ جند بازیں وھد ءِ جنزگ ءٙ انت بلئے چیزیں مجگی نہ پترگ ءٙ انت کہ اے میان ءٙ زانتکارانی کرد کجا روہگ ءٙ انت ۔ ھمے شہرانی تہ ءٙ لکھانی کتاب بھا بئیگ ءٙ انت ، ادبی مردمانی کساس سک باز بنت ، سک ٹوھیں ڈیبیٹ بنت بلئے چیز ھما جاہ ءٙ کئیت انت ءُ اوشت انت کہ پرویکٹیکلی کارانی میار اوشت ءِ آماچ انت ۔ بزاں مئے زانتکار انگت ھمے ورنایانی پلامرزی کنگ ءٙ نہ انت کہ راج ءٙ ھمک کوچگ ءٙ کتاب سر کنگ ءِ جھد ءٙ انت ۔ دومی نیمگ ءٙ زاھر بیت کہ ھمے زانتکار کہ وتگڑیں کتاب میلہ ءٙ روگ ءٙ انت ءُ اودا سرھالانی جند چوں اے ڈول ءٙ انت کہ ” کتب بینی سے بے رخی اور نئی نسل ” ءُ ھمے ایم پی ، ڈی سی ڈولیں کتاب وانگ ءِ ارزشت ءِ سر ءَ مھوک ءٙ پوھ کنگ ءٙ انت-

بلوچستان ءِ تہ ءٙ سک باز انچیں ورناہ ھست انت کہ بلوچستان ءِ جاورھالانی سر ءٙ جوانیں داب ءٙ باوست کت کن انت بلئے ایشاں مرگ بستگ کہ لھتیں اردو دان ءٙ منت لیلاں کنان ءٙ گوادر ءٙ سر کنان ءٙ لھتیں وتگڑیں ھیال دیم ءٙ آرگ بئیگ ءٙ انت ۔

ھمے دمان ءٙ زہن ءٙ ایندگہ ھیال چکرگ ءٙ انت کہ ماں راجانی زانتکارانی بابت ءٙ ونتگ کہ ایش مھلوک ءٙ سرپدی دے انت بلئے چیزانی پریکٹیکلی گندگ ءٙ ماراں نئیت ۔۔ مردم کئی کئی گپ ءٙ بہ کنت ءُ کئی گوں گلگ بہ کنت۔ آپ چہ جھل ءٙ لُرد انت ۔اگاں ھمے میان ءٙ رسانکدار ءٙ اگاں ھمے نام نھادیں زانتکارانی سر ءٙ نگدی پوسٹ دئیگ بہ بیت گڑا ایشانی مریدانی زاہ ءُ بد آزمان ءٙ سر بنت انت-

گڈ سر ءٙ بس ھمے امیت داراں کہ ورناء کہ کتاب کوچگ کوچگ ءٙ رسینگ ءِ یک پروگرامے ءَ گون انت ۔ ھمے کلوہ ءٙ گون انت الم یکروچے ھمے زانتکار وتی کرد ءٙ پشل بنت انت ءُ دو تل ءُ دو پوستی ءِ جاہ ءٙ وتی کاروان ءِ راھی کن انت ۔