منی رھشون ماہ رنگ
نبشتہ کار: فوزیہ بلوچ شاشانی
دی بلوچستان پوسٹ
منی رھشون ! درت ءُ دراھبات ئے گوں گُلیں راج ءَ ، درستاں چہ پیسر من وت ءَ دنیا ءِ توک ءَ وش بھتیں مردمے سرپد باں کہ من وتی زندگی ءِ لھتے ساھت ترا گوں ھور گوازینتگ انت ، اے منی زندگی ءِ زیبا تریں روچ زانگ بیت ، من وھدیکہ ترا اولی رند ءَ دیست گُڑا بس کمو ھبر ءُ ھال بوت، وانگ ءُ زانگ ءِ بابت ءَ تو جُست ءُ پُرس کُت، بلوچ نودربرانی سیاست ءِ بابت ءَ کمو گپ بوت ، ھما روچ ءَ من ءَ تئی چمانی توک ءَ پہ زمین ءُ راج ءِ واستا مھر ءِ پرشانیں رژن گندگ ءَ کپت ، بلے من ترا شَریں وڑے ءَ نہ زانتگ اَت بس کدی کدی گند ءُ نند، بلے دل ءَ ھر روچ لوٹ اِت کہ تئی دیوان ءَ بہ ننداں ءُ تئی بچکنداں بہ گنداں ترا گوش بداراں ، ترا بزاناں-
ھمے وڑ ءَ زندگی روان بوت گلامی ءِ سانکل روچ پہ روچ مُھر بوان بوت انت، ھمے گلامی ءِ سانکلانی سندگ ءَ پہ جُھد گیش بوان بوت ، ھمے جُھد ءُ بلوچ ءِگھگیری ءِ برورد ءَ ما پد ءَ دوچار کپتیں مھرانی دیاریں شال ءِ دگانی سر ءَ سریاب ءِ ھما سارتیں زمین ءِ سر ءَ کہ اے سردی ءَ مُرگ دار ءِ سر ءَ ھُشک بوگ ءَ ات انت بلے بلوچ دگانی سر ءَ نشتگ اَت پہ وتی راج ءَ ، وھدیکہ سرگپتیں پہ اسلام آباد ءَ گُڑا سنگتاں گُشت کہ نوں شُمئے رھشونی ءَ ڈاکٹر ماہ رنگ کنت من یک برے کمو پریشان بوتاں ءُ دل ءَ جیڑ اِت کہ من ڈاکٹر ءِ کِرّ ءَ گپ جت نہ کن آں ، اگاں راہ ءَ جیڑھے ،جنجالے بہ بیت باریں چے بیت من پیسر ءَ کدی ھم گوں ترا سپر نہ کُتگ اَت ، اے اولی سپر اَت ، ما کہ در کپت ایں گُڑا گیش موکہ رس ات کہ ترا بہ زاناں ، اے راہ ءِ اڈ ءُ جنجال ھمنچو باز بوت اَنت کہ گُشگ نہ باں بلے ھمے درستیں جیڑہ تو گوں وتی زانتکاری ءُ پُر مِھریں جُھد ءَ توجیل کنان کُت اَنت، تو اے درستیں میتگاں مھر ءُ گھگیری ءِ پُل کَل کنان کُت ءُ اسلام آباد ءَ سر بوت اِیں –
سر بوگ ءَ ھور اے ناشریں ریاست ءَ لٹ ءُ کُٹ بندات کُت ھمدا چہ ما یک پہ یک ءَ گاڑی ءَ کنگ بوت ایں ءُ پولیس ءِ بندی جاہ ءَ بند کنگ بوت ایں، اے دو شپ ءُ روچ ءَ کہ ما پولیس اسٹیشن ءَ بندیگ ات ایں اود ءَ ھم تو بے توار نہ بوت ئے پہ وتی راج ءُ سنگتاں گھگیری کنگ ءَ ات ئے کہ منی راج ءِ مات ءُ گْوھاراں چِد ءُ گیش بزگ مہ کن اِت مارا مئے سنگتانی بابت ءَ ھم بہ گُش اِت کہ چون اَنت، بلے اے ھما بے زبانین ریاست ات کُجا سر پد بیت-
روچ ھمے وڑ ءَ روان اِت اَنت ، کاروان جُنزان اَت ، تئی ءُ سنگتانی مھروانی اَت یکے دومی ءِ ھِمت اَت تاکت اَت پولیس ءِ کار ءُ کارپد ھرچ دو ادار ءِ سر ءَ بدل بوان ات اَنت گیش ءَ چہ گیش پریشان کنگ ءِ جُھد ءَ کنگ ءَ ات بلے تو درستیں جیڑھانی دیمپانی ءَ کنگ ءَ اِت ئے ، شپ ءِ 12 بج کہ بوت نوں ، پولیس ءَ بسے آورت کہ شُمارا دوبر شال ءَ راہ دے آں تو اے جیڑھانی دیم ءِ دارگ ءَ پیسر ءَ تیار اَت ئے ، وتی ھمراھی ءَ کُلیں سنگت ھم تیار کُتگ ات اَنت کہ گھگیری المی اِنت ، ھچ وڑ ءَ پُشت کنزگی نہ اِنت دژمن کہ سر ءَ کپتگ ما اگاں دگہ چیزے کُت نہ کن اِیں بلے گھگیری کنگی اِنت انچو ارزانی ءَ روگی نہ اِنت دوبر شال ءَ وھدے پولیس ءَ لٹ ءُ کُٹ بندات کُت ھمد ءَ ما اَچ تو جِتا کنگ بوت انت زورانسری بس ءَ سوار کنگ بوت ایں ، تو ھمدا ھم گوں دژمناں گھگیری کنگ ءَ اِت ئے پہ وتی ھک ءَ-
بوت کنت کہ ھرچ رھشون اے وڑ نہ بوتگ بلے تو پہ راج ءَ چہ ھرکس ءَ جِتا ءُ یکیں دانگ بوتگ ئے ، ھمدا ما بس ءِ توک ءَ برگ بوت ایں گُڑا پولیس ءَ بس بند ما جُھد کنگ ءَ اِت ایں کہ ما جھل ءَ ایر بہ کپ انت بلے پولیس ءَ گیٹ بند کتگ ات ءُ تررا اَچ ما جتا کت ھمے پولیس والایاں چہ یک پولیس والاھے ءَ دست بس ءِ دروازگ ءَ سک کت ھمیشی ءِ سزا ھم ترا دیگ بوت کہ تو وتی راج ءِ پُسگ انچو گھگیری سوج داتگ اَنت، چار پنچ ادار ءَ تاں ما بس ءِ توک ءَ بند بوت ایں ءُ تو پولیس اسٹیشن ءَ ، دگہ چیزے ھم گستگ اَت کہ پولیس اتکگ اَت تئی نام ءِ سر ءَ مارا گُشگ ءَ اَت کہ ڈاکٹر ءَ گُشتگ کہ شُما برو اِت شال ءَ بلے ما زانت کہ دروگیں گپ اَنت تو اے گپ ءَ نہ کن ئے باز جُھد کُت ریاستی مشینری ءَ بلے چہ سنگتاں گیش ھمے مات مُھکَم تر اَت اَنت کہ دانکہ مئے رھشون وت نہ ایت مارا نہ گُشی ما چو کسی گپ ءَ یکین نہ کن ایں انچو جیڑہ ءُ تکلیپ ءَ رند تو وھدے اتکے بس ءَ سوار بوت ئے درستیں راج ءِ دل ءَ ھمنچو گیش ھِمت ءُ تُوکل اتک تو اتکگے نو مارا کس پروش دات نہ کنت ، ما اِدا چہ آجو کنگ بوت ایں ، شپ شُتگ اَت-
دگہ سُھبے بوت ، کاروان وتی ھما جاگہ ءَ رس ات کہ روگی بوتگ اَت ، مئے زھرشانی برجاہ اَت ، مارا روچے ھزاراں داستان رس ات چہ اے کیمپ ءَ چہ تئی وڑیں رھشونے ءَ ما باز دربُرت ،،، تو ھرچ سُھب ءَ مردم سوج ءُ سر کُت اَنت کہ ما ادا کہ اتکگ ایں مارا ھرچ جیڑھانیگیش ءُ گیوار زانگی اِنت ، ھرچ وھد ءَ وت ءَ تیار بہ کن اِت اے ھما دژمن اِنت ھرچی کُت کنت ءُ مارا ھم چو کوہ ءَ مِک بوگی اِنت اے دژمن ءِ دیم ءَ ، روچ ھمئے وڑ ءَ گوں ترا روان ات اَنت ، اے مات ءُ گُوھار ءُ پیر ءُ کماش درست چہ ترا مھر ءُ راج دوستی ءِ درس ءَ در براں ات اَنت ، یکے دومی ءَ گوں گیش مھروان بوان اَت اَنت ، ما سکیں وش کسمتیں مردم اَت اِیں کہ ترا گوں ھوار اِت اِنت اے گرانیں ساھتاں ، ھرچ روچ ریاست یک پندلے سازگ ءَ اَت ءُ تو ھما پندل ءِ گیش ءُ گیوار کنگ ءَ راج ءَ را سرپدی دیگ ءَ اِت ئے ، اے درستیں کسھاں من پمیشکا دیم ءَ آرگ ءَ آں کہ اے نازُرکیں ھالتاں ما چہ ترا باز در بُرتگ ، ریاست ءِ ھرچ پندلے کہ ناکام بوتگ گُڑا اے تئی رھشونی بوتگ کہ راج ساڑی جاڑیگ بوتگ پہ جیڑہ ءِ گیش ءُ گیوار ءَ وھدے کہ سپر وتی گُڈی منزل ءَ رس ات اے وھدا راج تئی مھراں چکار ءُ آشناہ اَت ، ھمئے وڑ ءَ تئی مھر ءُ مھروانیاں گیش یکجاہ ءُ یک مُشت کنگ ءَ اَت راج ءَ را گُڑا اے کاروان تیار بوت دیم پہ بلوچستان ءَ روگ ءَ سک دردناکیں روچے اَت پہ راج ءَ بلے تو گُشت اے تھنا مرچی نہ اِنت دانکہ گلامی ھست درد ءُ رنج گیش بوت کن اَنت کم نہ بنت بس شُما وت ءَ پہ جُھد ساری ءُ جاڑیگ بہ کن اِت ، ما کہ دیم پہ وتی ماتیں دیار ءَ رھادگ بوتیں سرجمیں بلوچستان اتکگ پہ تئی چارگ ءُ گُشدارگ ءَ سرجمیں شال چہ راج دوست ءُ مھروانیں راج ءَ چکار اَت ، اے روچ ھمدا چہ سرجم بوت اَنت بلے تئی مھر ءُ راج دوستی ھر روچ گیش بوان ات ، باز وھد ءَ رند پد ءَ ترا دیست بلے ھر وھد ءَ کہ دیستگ دل ءَ سیر نہ کُتگ تئی چارگ ءَ بازیں جُستانی نیمون تئی گرنچ داتگیں زانت ءَ بندوک امت کہ ترا بہ کن اں راج دوستی، زمین دوستی، مھروانی، زانت کاری کُجام ھم سرھال ءِ سر ءَ بلے ترا کہ وھدے دیستگ گُمان بوتگ کہ بس تئی چمانی توک ءَ بہ بچار دُرستیں جُستانی پسو وت رس ایت ، ترا گوں جُھد ءَ پنتداری ءِ کار ءَ وتی شپ ءُ روچاں یک کنگ ءَ بہ گندے پد ءَ مردم ءَ ھچ جُست کنگ ءِ زلورت نہ بیت ، بس گوں جُھد ءَ ھمگرنچ بوگی اِنت ، ھمے کہ ترا چہ در بُرتگ اَنت کہ وانگی اِنت جُھد کنگی اِنت ، راج دوست بوگی اِنت ، امل کنگی اِنت ، وتی ھک ، وتی کار زانگی انت ءُ بلوچستان ءَ مرچی چے بوگ ءَ اِنت ، ریاست چے کنگ ءَ اِنت گوں ءَ اے درستیں جیڑہ ءُ جنجالانی گیش ءُ گیوار کنگ ءِ واستا گوں راج ءَ ھوار املی درُشم ءَ جُھد کنگی اِنت، تئی زانت ءُ زانگ تئی مھروانی جُھد ءُ پنتداری ءِ بابت ءَ منی کِرّ ءَ لبز نیست کہ من بیان بہ کن آں پہ ترا منی مھروان منی راھشون منی راج ءِ ھستی ، بس ھمے گُشاں تئی ودی بوگ ءِ روچ بلوچ راج ءَ مراد بات مئے راج سکیں وش کِسمتے کہ مارا تئی وڑیں راجدوستیں رھشونے رس اتگ ما وش کسمتیں کہ ما اے وھد ءَ زندگی کنگ ءَ ایں ، من زاناں منی لبز گوں ترا ءُ تئی جُھد ءَ انساپ کُت نہ کن اَنت من ءَ بکش ، بس گڈسر ءَ ھمے گوشاں کہ بلوچستان ءِ آجوئی ءَ بہ گندات ئے ، دائم ءَ زندگ بات ئے گوں راج ءَ ھوار ، تئی جُھد ءَ سلام اِنت منی رھشون ماہ رنگ-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت-