ھب چوکی: زورانسری بیگواھیں اھوالکار زبیر یل بیتگ

زورانسری بیگواھی ءِ آماچیں اھوالکار زبیر بلوچ یل کنگ بیتگ-

گیشیں اھوالانی رد ءَ بلوچستان ءِ واپاری شھر ھب چوکی ءَ زورانسری بیگواھی ءِ آماچیں اھوالکار ءُ نودربر زبیر بلوچ یل بیتگ-

زبیر بلوچ ءِ یل بوگ ءِ ھال آئی ءِ کھول ءَ راست کتگ-

زانگ بہ بیت زبیر بلوچ گوستگیں شپ ءَ ھب چوکی ءَ دارو ھوٹل ءِ نزیک ءَ چہ لوگ ءَ پاکستانی لشکر ءَ دزگیر کتگ ءُ ناشناسیں جاھے ءَ برتگ کہ پد ءَ بیگواہ بیتگ-

اھوالکار ءِ یل کنگ ءِ ھاتر ءَ آئی ءِ کھول ءُ بلوچ یکجھتی کمیٹی ءِ نیمگ ءَ ھب چوکی ءَ زھرشانی بیتگ ءُ ھمے وڑ کیچ ءَ سی پیک دگ ھم بند بیتگ-

ھب چوکی ءَ زھرشانی ءِ وھد ءَ پولیس ءَ زھرشانی کنوک لٹ ءُ کٹ کتگ انت ءُ زھرشانی بنجل ءَ یک دگہ ورنایے جمال بلوچ پولیس دزگیر کتگ کہ انگت ءَ یل نہ بیتگ-

بی وائی سی ءَ گوشتگ ھب ءِ بنجاھی شھدگ ھما وھد ءَ پچ بیت جمال یل کنگ بیت اِنت-