چہ کراچی ءَ بلوچ پولیس کارندھے ءَ ھوار نودربرے بیگواہ

کراچی ایئرپورٹ ءِ سیکورٹی ءَ بندوکیں پولیس کارمند ءُ نودربرے چہ جند ءِ لوگ ءَ بیگواہ کنگ بیتگ اَنت-

پاکستانی پوج ءَ کراچی ءِ دمگ گلشن اقبال ءَ دو مردم دزگیر کنگ ءَ پد ناشناسیں جاھاں برتگ اَنت کہ چریشی ءَ پد ھردوکیں ورناہ دیم ءَ آرگ نہ بیتگ اَنت-

زورانسری بیگواھی ءِ آماچیں مردمانی توک ءَ ایس ایم لاء کالج کراچی ءِ نودربر ھاتم بزنجو ءُ ایئرپورٹ سیکیورٹی پورس ءِ اے ایس آئی دلوش بلوچ ھوار اَنت-

آیانی نزیکیں مردمانی رد ءَ ھردوکیں مردم لس پوشاکی گدانی کارمنداں کراچی گلشن اقبال ءَ یک لوگے ءَ آوار جتگ انت ءُ ابید چہ گپے ءَ گون وت برتگ اَنت – آیانی کھولاں زورانسری بیگواھی ءِ ھلاپ ءَ توار چِست کنگ ءِ دزبندی کتگ-

کھول ءِ رد ءَ آیاں وئیل ءِ ھلاپ ءَ دمگی پولیس ءِ گور ءَ ایف آئی آر ءِ نبشتگ کنگ ءَ شتگ انت بلے پولیس ءَ ایف آئی آر نبشتگ نہ کتگ-

زانگ بہ بیت لھتے ماھانی توک ءَ بلوچستان ءُ دگہ ھنداں زورانسری بیگواھی ءِ وئیل یکشل ءَ گیش بوان اَنت گوستگیں کچ ءُ کساسنی توک ےَ ھمے سال ءِ اکتوبر ءَ بلوچستان ءَ ھوار جتا جتائیں جاھاں 110 ءَ گیش مردم زورانسری بیگواہ کنگ بیتگ اَنت ءُ ھمے وڑ ھمے ماہ نومبر ءَ داں انگت ءَ 90 مردمانی زورانسری بیگواھی ءِ اھوال رپورٹس بیتگ اَنت-

ھمے سال ءَ بلوچ لبریشن آرمی ءِ اُرشانی توک ءَ ترندی آیگ ءَ پد پاکستانی سرکار ءَ سرجمی ءَ بلوچستان ءَ پوجی آپریشن کنگ ءِ پیسلہ کتگ – گچینی رنگ ءَ گوستگیں ماہ ءَ کراچی ایئرپورٹ ءِ نزیک ءَ چینی انجینئرز ءُ زرکارانی کاروان ءِ سر ءَ وتکش تراک ءَ پد پاکستانی پورس ءَ بلوچ دمگاں وتی کاروائی ترند کتگ اَنت-

آپریشن ءِ وھد ءَ بلوچستان ءِ جتا جتائیں جاھاں مردم زورانسری آوار جنی ءِ آماچ کنگ بیتگ اَنت-

ھمے ماہ ءَ بلوچستان ءِ جتا جتائیں جاھاں پوجی آپریشنانی وھد ءَ کلات ءَ 40 مردم ءُ نوشکی ءَ 8 مردم دزگیر کنگ ءُ ناشناسیں جاھاں برگ بیتگ اَنت ءُ کھولانی رد ءَ آیانی بارو ءَ ھچ اھوال نیست اَنت-

گیش اھوالاں بلوچستان ءِ دمگ کیچ ءُ کش ءُ گوری ھنداں پوجی آپریشن ءُ زورانسری بیگواھیانی بازیں ھال دیم ءَ اتکگ اَنت ءُ داں انگت ءَ بلوچستان ءِ بازیں جاھاں آپریشن برجاہ اَنت-

بلوچستان ءِ ھستیں سیاسی ءُ انسانی ھکانی گلاں پیش ءَ ھم گمان کتگ کہ پاکستان ءِ سرکار ءُ ادارہ آپریشن ءِ نام ءَ جھلانکداریں سزا ءِ درچ ءَ لس شھریاں نشانگ کن اَنت آیاں میان اُستمان ءُ ادارھاں گوں دزبندی کتگ کہ آ اے وئیلانی سر ءَ گامگیج بہ زیر ایت ءُ پاکستان ءِ ھلاپ ءَ کاروائی بہ کنت اِنت-