بلوچ یکجھتی کمیٹی ءِ برجم زورانسری آوار جنی ءِ ھلاپ ءَ زھرشانی درچ، چاگی ءَ سیمی زھرشانی

بے تواری پروش : زورانسری آوار جنی ءِ ھلاپ ءَ اوشتگ ” ءِ سرھال ءَ چہ بلوچستان ءِ جتاجتائیں دمگاں زھرشانی ءِ درچ برجاہ –

بلوچ یکجھتی کمیٹی ءِ رِد ءَ بی وائی سی چاگی زوم نیمگ ءَ چہ بلوچ راج سر ءَ زُلم، بلوچ چُکچینی ءُ زورانسری آوار جنیانی ھلاپ ءَ زھرشانی ئیں روانک کش اِتگ ءُ زھرشانی نکش کنائینتگ-

بی وائی سی رِد ءَ اے روانک بلوچ راج ءَ دیمپان ریاستی زوراکی ءُ زلم ءِ دیم آرگ ءِ ھاتر ءَ برجاھیں مھم ” بے تواری پروشگ ءُ زورانسری آوار جنی ءِ ھلاپ ءَ اوشتگ ءِ سرھال بھر اِنت-

بلوچ یکجھتی کمیٹی نیمگ ءَ چہ چاگی ءَ اے سیمی زھرشانی اِنت اشی ءَ ساری شھریانی نیمگ ءَ چہ زورانسری آوار جنیانی ھلاپ ءَ چاگی شھر ءُ نوکنڈی ءَ زھرشانی نکش کنائینتگ کہ اود ءَ مزنیں کچے ءَ شھری ءُ زورانسری آوار جنی نشانگ کنگ بیتگیں مردم کھول ھمگرنچ بیتگ اَنت ءُ زھرشانی نکش کنائینتگ اَنت-

بلوچ یکجھتی کمیٹی ءِ مھم ” بے تواری پروشگ : زورانسری آوار جنی ءِ ھلاپ ءَ اوشتاتگ ” ءِ سرھال ءَ چہ بلوچستان ءِ جتاجتائیں دمگاں زھرشانی کنگ بیگ ءَ اِنت کہ اود ءَ اشی ءَ ساری کراچی، ھب چوکی، ھُزدار، تربت، پنجگور، ھاران، شال، نوشکی، دالبندین چاگی شھر ءَ زھرشانی نکش کنگ بیتگ اَنت-

بلوچ یکجھتی کمیٹی نیمگ ءَ چہ زھرشانیانی جار جتگ ھمے ماہ ءَ چہ بلوچستان ءَ زورانسری آوار جنی ءِ وئیل تہ ءَ گیشی ءُ تُرندی ھلاپ ءَ کنگ بیگ ءَ اِنت-