وار ءُ بَزّگی
نبشتہ کار: یسما بلوچ
دی بلوچستان پوسٹ
منی وتن بلوچستان دُنیا ءِ کُلّیں سیر ءُ وَشھالیں ھُلکَھانی وَڑ ءَ مَڈّی چَہ پُرّ اِنت ، بَلَے اَگاں ما وتی بلوچستان ءِ وَشھالی ءِ ھَبر ءَ بِہ کَن اِیں گُڑا مئے زمین ءِ سَر ءَ 0% ھَم وَشھالی گِندگ ءَ نئیت ، اَگاں اِدْ ءِ مردُماں کَسّے بِہ گِندیت نَہ گُش ءِ کہ اے بلوچستان ءِ وَڑیں جاھے ءَ نِندوک اَنت ، کہ آ کُدرتی ساز ءُ سامان ءَ پُرّ اِنت ۔
بلوچستان ءِ توک ءَ ترا بُندری ھَژدَری شئے ھم دِئیگ نَہ بَنت ، پَہ دَروَر ، نَہ لین ، نَہ سَاپیں آپ وَرَگ ءِ واست ءَ نَہ گیس ، کُلّاں چَہ زِبَھر کَنگ بُوتَگ اَنت ، پَرچا کہ ما گُلام اِنت ءُ گُلام ءَ وَشھالی نَہ بَلکیں بَدھالی ءِ تَہ ءَ دور دِئیگ بیت ، کُلّیں چیزاں چَہ پُشت ءَ دور دِئیگ بیت دیمرؤئی ءَ چَہ دُور بَد ھالی ءِ تُوک ءَ دور دِیگ بیت ۔
اے چیزاں چَہ اَبید نَہ بلوچستان ءِ توک ءَ شَرّیں کار ءُ روزگارے ترا دَست کَپیت ، بلوچ اَنچو وار ءُ بَزّگ کَنگ بُوتَگ انت ۔
من ھَردیں کہ لوگ ءَ چَہ گِسَر باں گُڑا من اے چیز ءَ سَکّ ءَ مار آں ، کہ کماش ، کسان سالیں وَرناہ ءُ زَھگ کِشکانی سَر ءَ نِشتَگ اَنت پَہ چُنڈے نان ءِ ھاتر ءَ چنچو بَزّگ اَنت ، ھما کسان سالیں وَرناہ ءُ زَھگ کہ آیانی اُمر وانگجاہ ءِ رَوَگ ئے اِنت آ کِشکانی سَر ءَ نِشتَگ اَنت ءُ بَزّگ اَنت ، چنکَسّ دَرد بیت وتئی کُوم ءَ چو بَزّگی ءَ گِند آں ۔
تَھنا اے نَہ بَلکیں ما دگہ جاھے ءَ رَوئیں گُڑا مارا گِندگ ءَ کئیت کہ پیریں مات ، کسانیں چُک ءُ زالبول کِشکانی سَر ءَ نِشتَگ اَنت ءُ بَزّگ اَنت پَہ وتئی برات ، زَھگ ءُ مردُمانی واست ءَ کہ آ سالانی سال گار ءُ بیگواہ اَنت ریاست ءِ تھاریں کُوٹیانی تَہ ءَ بَند اَنت ۔
منی مات ءُ گوھار ھَروچ ریاستی مردُمانی دَست ءَ دَگانی سَر ءَ زَلیل کَنگ بَنت ، سَریگ دور دِیگ بَنت ، جِند اِش گِرَان کَنگ بَنت ، اَنچو بَزّگ کَنگ بُوھَگ اَنت پَرچاکہ آ بلوچ اَنت ءُ بلوچانی نَسیب ءَ اے ریاست ءَ بَس وار ءُ بَزّگی لِیکیتَگ ۔
دیمرؤئی ھما کُوم کَنت کہ آ یَکّ وَشھال ءُ آسُودگیں کُومے بِہ بیت ، وانگ ءُ زانگ ءَ گوں ھَمگرنچ بِہ بیت ، نہ کہ بلوچ ءِ وَڑیں کُومے کہ آ وار ءُ بَزّگی ءِ آماچ اِنت ، جنگ ءِ آماچ اِنت ءُ مارا اے جنگ ، وار ءُ بَزّگی ءِ آماچ اے ریاست ءَ کُتگ ، گُڑا نُوں مئے سَر ءَ اَلّمی اِنت کہ ما وَت ءَ را اے وار ءُ بَزّگی ءَ چَہ در بِہ کَن اِیں ءُ اے کُلّیں اَڑ ءُ جنجالاں چَہ دَر آھگ ءِ بَس یَکّیں راہ اِنت آ راہ تُوپک ءِ راہ اِنت ، آ راہ جنگ ءِ راہ اِنت ، اَبید ءِ جنگ ءَ ما اے اَڑ ءُ جنجالاں چَہ کَدی ھم دَراَتک نَہ کَن اِیں داں ھما وَھد ءَ کہ ما آزات ءُ وَت وَاجھیں ریاستے وَت جُوڑ نَہ بِہ اِیں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-