خیبر پختونخوا ءِ زرباری دمگ ڈیرہ اسماعیل خان ءَ سیکورٹی پورسز ءِ چیک پوسٹ ءِ سر ءَ ھواریں جنگولانی اُرش ءَ کم چہ کم 10 کارندہ مرتت ءُ بازینے ٹپیگ بوتگ اَنت۔
ڈی آئی خان ءُ سول انتظامیہ ءِ کارندھانی رد ءَ پنچ شمبے ءِ شپ ءَ درازندہ ءَ فرنٹیئر کانسٹیبلری ءِ زام چیک پوسٹ ءَ را جنگولاں نشانگ جوڑ کتگ۔ ایف سی ءِ مھسود اسکاؤٹس ءِ کارندہ چیک پوسٹ ءَ جاڑیگ بیتگ اَنت-
پولیس ءِ کارندھانی گشگ انت کہ جنگولانی اُرش انچو ترند بوتگ کہ گیشتریں کارندہ جاہ ءَ بیران بوتگ انت۔ یک جونیئر کمیشن افسرے ھم بیران بوتگیں مردمانی تہ ءَ ھوار اِنت۔
اے اُرش ءِ تہ ءَ ٹپیگ بوتگیں مردمانی کساس ءِ بابت ءَ جتا جتائیں ھال آیگ ءَ انت۔ البت تاں انوگ ءَ واکداراں سئے ٹپیگیں مردمانی نام داتگ اَنت۔
دمگی مردمانی گشگ انت کہ زام ءِ چیک پوسٹ امان ملا گراؤنڈ ءِ کش ءُ گور ءِ دمگ ءَ انت۔
انٹر سروسز پبلک ریلیشنز ءَ انگت ءَ اے وئیل ءِ بابت ءَ بیان شنگ نہ کتگ ءُ نہ کہ ھچ جنگولی گل یا جنگولے ءَ اے وئیل ءِ زمہ واری زرتگ۔
واکدارانی گشگ انت کہ اے آپریشن ءِ سر ءَ بندش جتگیں تحریک طالبان پاکستان ءُ آئی ءَ گوں ھمگرنچیں دگہ گلاں کتگ۔
خیبر پختونخوا ءِ سر وزیر سردار علی امین گنڈا پور ءَ ایف سی ءِ کارندھانی نرگ سر ءَ رنج ءُ گم ءِ درشان کنان ءَ اے اُرش ءِ ایرجنی کتگ۔ آئی ءَ وتی سرکاری بیان ءَ چہ پولیس ءِ مزنیں کارندھاں اے وئیل ءِ رپورٹ لوٹ اِتگ۔
بنجاھی وزیر ءَ گوشت کہ چیک پوسٹ ءِ سر ءَ اُرش سکیں بزدلی ئیں کارے بوتگ۔ اے وڑیں اُرشاں چہ سیکورٹی پورسز ءِ زور ھلاس نہ بیت۔
دومی نیمگ ءَ پشاور ءِ کش ءُ گور ءِ خیبر قبائلی دمگ ءِ نزیک ءَ مالاگوری ءَ پولیس اسٹیشن ءَ تیرگواری ءَ ھواریں جنگولاں کشتگ ءُ بانو ءِ زرباری دمگ ءَ پولیس کارندہاں جنگولانی اُرش ءَ را دیم ءَ بے سوب کتگ۔
بنو ءَ اے اُرش پنچ شمبے ءِ شپ ءَ گوریچانی وزیرستان ءِ کش ءُ گور ءِ دمگ باکاخیل پولیس اسٹیشن ءَ بوتگ ءُ پولیس ءِ مردمانی پسو ءِ تیرگواری ءِ سبب ءَ اُرش کنوک چہ اودا درکپگ ءَ لاچار بوتگ اَنت۔