برات یل کنائینگ ءِ ھاتر ءَ ما ھرچ دروازگ ٹک اِتگ، مارا انساپ نہ رس اِتگ- ماہ پارہ بلوچ

زورانسری بیگواھیں نودربر نصیب اللہ بادینی ءِ گوھار ماہ پارہ بلوچ ءَ گْوشتگ کہ منی برات نصیب اللہ ء حاجی شوکت بیست پنچ نومبر دوھزار ءُ چاردہ چہ چاگی اسٹاپ نوشکی ءَ منی پت دکان ءَ زورانسری آوار جنی ءِ نشانگ کتگ ءُ آ انگت بیگواہ ءَ اِنت، آئی ءِ یل کنائینگ ھاتر ءَ ما ھرچ وڑیں جُھد کتگ ما ھرچ دروازگ ٹک اِتگ ءُ اسلام آباد نندانک ءَ ھم بھر زرتگ، دہ سال گوزگ ءَ اَبید مارا ھچ جاگہ انساپ ھم نہ رس اِتگ-

ماہ پارہ بلوچ ءَ انسانی ھکانی گلاں چہ دزبندی کتگ کہ آ نصیب اللہ ءُ دگہ بیگواھیں مردمانی یل کنائینگ ءِ ھاتر ءَ توار چست بہ کن اَنت-

آئی ءَ دیمتر ءَ گوشتگ کہ سیزدہ اکتوبر ءَ بلوچ وائس فار جسٹس ءِ نیمگ ءَ چہ زورانسری آوار جنی ءِ ھلاپ ءَ یک آن لائن زھرشانی یے رسانکدر ءَ شپ ھشت ءَ چہ دوازدہ ءَ برجم دارگ بوگ ءَ اِنت-

آئی ءَ گوشتگ کہ سرجمیں سیاسی پارٹیاں، نودربریں گل، انسانی ھکانی باسکاں، اِھوالکاراں ءُ وکیلاں چہ دزبندی کن آں کہ آ اے آن لائن مھم ءِ بھر بہ بنت منی برات نصیب اللہ ءُ دگہ بیگواھیں مردمانی یل کنائینگ ھاتر ءَ توار چست بہ کن اَنت-