ڈیرہ بگٹی ءَ پاکستانی پوج ءِ سر ءَ بوتگیں اُرشانی زمہ واری بی آر اے ءَ منّ اِتگ اَنت

بلوچ ریپبلکن آرمی ءِ جارکش سرباز بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ گوستگیں روچ ءَ چہ ڈیرہ بگٹی ءِ تھسیل سوئی ءِ دمگاں لنجو، سغاری، رئیس توخ ءُ کچی کینال ءِ کش گوراں پاکستانی پوج نیمگ ءَ چہ دست گوشیں مردمانی سر ءَ شیلنگ ءُ بمبگواری برجاہ ءَ اِنت، چریشی ءِ آسر ءَ سے زالبول ءُ پنچ چک سک ٹپی بیتگ اَنت-

جارکش ءَ گوشتگ کہ مروچی سھب ءَ بلوچ سرمچاراں رئیس توخ ءِ نزیک ءَ پاکستانی پوج ءِ یک کاروانے ءِ سر ءَ سنگر گپتگ ءُ راکٹ ءُ مزنیں سلاھاں چہ اُرش کتگ، چریشی ءَ پوج ءِ بازیں کارمندے مرتگ ءُ ٹپی بیتگ اَنت-

جارکش ءَ گوشتگ اشی ءَ اَبید، سغاری ءُ سے نمبر شاخ ءِ میان ءَ لشکر کشی ءَ دلگوش پوجی کارمندانی سر ءَ بلوچ سرمچاراں وتکاریں سلاھاں چہ اُرش کتگ، چریشی ءِ آسر ءَ دو کارمند مرتگ اَنت-

جارکش سرباز بلوچ ءَ دیمتر ءَ گوشتگ دست گوشیں راج ءِ سر بیوکیں پوجی زوراکی ءَ جوانیں وڑے دیم پہ دیم بہ ایں-