روکپتی بلوچستان ءِ جتا جتائیں دمگاں پیش اتکگیں وئیلاں دو مردم بیران ءُ دو زدگ بیتگ اَنت-
وئیل روکپتی بلوچستان ءِ دمگ راسک ءُ ھاش ءَ پیش اتکگ اَنت کہ راسک ءَ ایرانی لشکر ءَ گاڑی یے سر ءَ تیرگواری کتگ ءُ یک مردمے کشتگ ءُ یکے زدگ کتگ ءُ ھاش ءَ دو گاڑیانی ٹکر ورگ ءَ یک مردمے بیران ءُ یکے زدگ بیتگ-
گیشیں اھوالانی رد ءَ روکپتی بلوچستان ءِ دمگ راسک ءَ ایرانی لشکر ءَ یک لینڈ کروز گاڑی ءِ سر ءَ تیرگواری کتگ ءُ چریشی ءَ گاڑی ءَ سواریں دوازدہ سالی ئیں ورنایے بیران بیتگ-
وئیل ءَ بیران بیتگیں ورنا ءِ پجار اھسان آسکانی ء مندوست ءُ زدگ بیتگین ءِ پجار سلمان آسکانی ء میردوست ءِ نام ءَ زانگ بیتگ ءُ ھردوک جکیگور ءِ جھمنند انت ءُ ھردوک ناکوزتک اَنت-
اھوالانی رد ءَ راسک ءَ درخشان پمپ ءِ نزیک ءَ لس گاڑی ءَ سواریں ایرانی لشکر ءَ اے گاڑی ءِ سر ءَ تیرگواری کتگ ءُ پد ءَ تتکگ ءُ مھلوک آئی ءِ رند ءَ کپتگ گاڑی داں لشکر ءِ بنجل ءَ سر بیتگ –
ھمے ڈول ھاش ءَ دو گاڑیانی ٹکر ورگ ءَ یک مردمے بیران ءُ یکے زدگ بیتگ-
ھالانی تہ ءَ گوشگ بیتگ وئیل ءَ یک تیل کش ءُ یک سواری گاڑی ءَ ٹکر وارتگ ءُ چریشی ءَ ھردوکیں گاڑیاں آس کپتگ ءُ ستکگ اَنت ءُ یک مردمے بیران بیتگ-