بلوچ ورنا زیت دمبرگ ءُ ارزانی ءَ دلجم بیگ ءِ جاہ ءَ یکشلیں جھدءِ پلسپہ ءَ مھکم بہ کن اَنت ءُ نودربر سیاست ءِ مھکم کنگ ءَ وتی کاملیں زوراں بہ جن اَنت۔ شبیر بلوچ
بلوچ اسٹوڈنٹس ایکشن کمیٹی ءِ سیمی بنجاھی کمیٹی ءِ دیوان کماش شبیر بلوچ ءِ سروکی ءَ دو روچ ءَ دلجمی ءَ گوں برجم دارگ بیتگ۔ دو روچی دیوان ءِ تہ ءَ مزن کارگشاد ءِ بنجاھی اھوال کہ آھانی تہ ءَ کُلیں کمیٹیانی اھوال، نگدکاری، گَل کاری، ہندی ءُ میان استمانی سیاسی جاورال ءُ آوکیں گامگیج ھوار بیتگ اَنت۔ دیوان ءَ سرجمیں بنگپانی سرءَ دلجمی ءَ گوں گپ ءُ تران ءَ پد آوکیں گامگیج ءِ تہ ءَ جتا جتائیں پیسلہ زیرگ بیتگ اَنت۔
دیوان ءِ اولی روچ ءِ بندات چہ بنجاھی کماش ءِ اجازت ءَ کنگ بوتگ، اولی روچ ءِ بنداتی بھرءَ گوستگیں بنجاھی اھوال کہ دیوان ءِ دیم ءَ پیش کنگ بیت اَنت کہ آھانی تہ ءَ گل ءِ کُلیں کمیٹیانی اھوالاں ھوار ایدگہ مزن مزنیں مراگش، صباء لٹریری فیسٹیول ءِ مراگشانی اھوال، بلوچستان کتاب کاروان ءُ بلوچ لٹریسی کیمپئین ءِ اھوال ءَ ھوار گل ءِ کُلیں کارکردگی دیوان ءِ دیم ءَ پیش کنگ بیتگ اَنت۔
بنجاھی دیوان ءِ دومی بھرنگدکاری اَت کہ آئی ءِ تہ ءَ سنگتاں گوستگیں گل ءِ کارکردگی سرءَ چمشانک دیان ءَ کسان ءُ مزنیں نزوری شون دیان ءَ نگد کُت ءُ پہ کارانی گھترءُ شرتر کنگ ءَ جتاجتائیں شورءُ سلاہ دات۔ نگد ءِ سر ءَ سنگتاں تران کنان ءَ گوْشت کہ نگد ھما سلاہ اِنت کہ آئی ءَ چہ یک سیاسی جھدکارے وتی سیاسی کِرد ءَ تراش ایت ءُ گل ءَ چہ کُلیں رد سیاسی روشت ءُ املاں چہ رکین ایت۔ شئوری ءُ سنجیدگیں نگداں چہ گل وت ءَ روچ پہ روچ مھکمتر کنان ءَ وتی مکسد ءِ سوبمندی نیمگ ءَ جُنزان کنت۔ مئے جھدکار نگد ءَ چہ مہ تُرس اَنت بلکیں آئی ءَ وش اتک بہ کن اَنت کہ آئی ءِ سرءَ نگد بیگ اِنت، بزاں آ جہدکار ءُ گل امل ءَ اِنت کہ نگد بیگ اِنت۔ نگد ءَ چہ تچوکیں جھدکار نزوریں سیاسی سِنچ ءِ واھُند بنت ءُ نزوریں سوچ ءَ چہ بلوچ نودربر سیاست گھترءُ دیمروئی کُت نہ کنت۔
دیوان ءِ دومی روچ ءِ اولی بھر گل کاری اَت کہ آئی ءِ تہ ءَ بنجاھی سنگتاں ءَ تران کنان ءَ گوْشت کہ گل مرچی جتا جتائیں پروگرام ءُ پالیسیانی وسیلہ ءَ نہ تھنا تنظیم کاری کنگ اِنت بلکیں گل وت ءَ مھکم کنان ءَ کیڈرسازی ءِ امل ءَ ھم اولی سرپ ءَ اوشتاتگ۔ اے سنگتانی شپ ءُ روچی ئیں امل ءِ برورد اِنت کہ بلوچ نودربر سیاست روچ پہ روچ مھکمترءُ شاھگان بیان اِنت، بلے چوشکہ سیاست مٹ بیوکیں املے داں وھدیکہ ما وتی سوچ ءُ پِگرءِ تہ ءَ دیمروئی ءُ آشوب میار ایں گڈا مئے سیاسی امل روایتی ءُ ھوادگ بنت چیاکہ سیاست ءِ تہ ءَ ھچ چیز دیوال ءِ سر ءَ نبشتگیں لبزنگ اَنت کہ کائم ءُ دائم بنت بلکیں بلوچ ورناھاں مرچیگیں دور ءِ کچ ءَ وتی سوچ ءُ پِگر توانا کنگی اَنت ءُ وتی سرجمیں زِند ءُ عمل گوں راجی جہد ءَ بندوک کنگی اَنت ءُ ہرچ ڈولیں ترندیں جاورانی دیم ءَ مھکمی ءَ اوشتگی اِنت۔
دیوان ءَ گل ءِ بنجاھی کماش ءَ تران کنان ءَ گوْشت کہ مئے ورنا وتی جِند ءُ اے اھد ءِ کدرءُ ارزشت ءَ بہ زان اَنت ءُ وتی مکام ءَ پجاہ بیار اَنت کہ آ چنچو مزن مزنیں کار کُت کن اَنت، پمیشکا آھاں وتی بودناکی ءُ لائکی زوال کنگ ءِ جاہ ءَ راجی گھتری ءِ ھاترءَ کار بندگی اَنت۔ اے وھد ءَ یک بلوچ ورنایے ءَ شیوار ءُ ھساس بیگی اِنت ءُ وت ءَ چہ در سیاسی روشت ءُ نادُراھیاں رکینگی اِنت پرچاکہ مئے نپری تاوان سرجم ءَ راجی تاوان ءِ کالب ءَ کیت ءُ راج ءَ تاوان دات کنت۔ بلوچ ورنا زیت دمبرگ ءُ ارزانی ءَ دلجم بیگ ءِ جاہ ءَ یکشلیں جھد ءِ پلسپہ ءَ مھکم بہ کن اَنت ءُ نودربر سیاست ءِ مھکم کنگ ءَ وتی کاملیں زوراں بہ جن اَنت۔
دیوان ءِ چارمی بہر ہندی ءُ میان استمانی سیاسی جاورال اَت کہ آئی ءِ تہ ءَ بنجاھی سنگتاں تران کُت ءُ گوْشت کہ میان استمانی سیاست ھما پِڑ اِنت کہ سرزاھر ءَ بگندئے بے توارءُ میزان ءَ جُنزان اِنت بلے اشی ءِ پُشت ءَ مزن مزنیں جنگ ءُ جدل جنزگ ءَ اَنت۔ میان استمانی سیاست ءِ تہ ءَ اناگت یک ویلے سیاسی منتر نامہ ءَ مٹ کنت بلے چوش نہ اِنت کہ سرجم ءَ ھمے ویل سیاست ءَ سُرین ایت بلکیں ایشی ءِ پُشت ءَ جنزوکیں زمینی، راجی، دینی، ماشی ءُ ایدگہ جیڑہ اَنت کہ یکبر ءَ یک ویلے ایشاں
ترانز(چنگاری) دنت ءُ اِش پاھار بنت درکائینت ءُ دیمتر ءَ اِے جنگ ءِ دروشم ءَ دنیا ءِ سیاست ءَ مٹ کن اَنت۔ دنیا ءِ تہ ءَ ھمے ڈولیں ویل میاں استمانی سیاست ءِ سرءَ سانمند بنت بلے مرچی دنیا ءِ تہ ءَ سدانی کچ ءَ سیاسی جیڑہ ھست کہ دنیا آیانی نیمگ ءَ آ کچ ءَ دلگوش گوْر نہ کنت ءُ دومی نیمگ ءَ دنیا کہ ملٹی پولرءِ نیمگ ءَ شُتگ ءُ ھرچ استان ءَ وتی نپ ءُ سیت یک استانے ءَ گیش بازاستان ءَ گوں بندوک کُتگ اَنت ءُ چوشکہ دنیا ءِ ھرچ استان ءِ وتی جیڑہ ءُ جنجال بازاَنت پمیشکا باز سیاسی جیڑہ یا جنگ دنیا ءَ بازیں مُلکاں دلگوش گور کنگ نہ بنت۔
دیوان ءِ سرجمیں بھرانی سر ءَ دلجمی ءَ گوں گپ ءُ ھبرءَ چہ پد گُڈی بن گپ آوکیں گامگیج ءِ تہ ءَ پہ گیشیں کارءُ گل ءِ مھکم ءُ دیم ءَ کنگ ءِ ھاترءَ جتاجتائیں پالیسی ٹھیگ بوتگ ءُ پیسلہ زیرگ بوتگ کہ چو اے ڈول ءَ اَنت، اے میان ءَ گل ءِ سرجمیں ھنکیناں لیڈرشپ ورکشاپ اڈ دیگ بیت، نمیرانیں کمانچر بلوچ ءِ یات ءَ لیاری ءَ لیاری آرٹس اِگزیبیشن اڈ دیگ بیت، کیچ، ملیرءُ ڈی جی خان ءَ صباء لٹریری فیسٹیول برجم دارگ بیت، بلوچ لٹریسی کیمپئین ءِ وسیلہ ءَ پہ نودربراں کیرئیر کونسلنگ ءِ کتابُکے چاپ ءُ شِنگ کنگ بیت، ڈیجیٹل لٹریچر ءِ درْچ ءَ ڈیجیٹل لکچر جوڈ کنگ بیت کہ آئی ءِ تہ ءَ نوْشت لکچر ہم ہوار اَنت، اے کُلیں پیسلھاں ھوار دگہ کسان ءُ مزنیں پیسلہ زیرگ بیت اَنت ءُ گل ءِ ہنکینانی مھکم کنگ ءِ ھاتر ءَ پالیسی ٹھینگ بوتگ۔
دیوان ءِ سرجمیں بھرانی سر ءَ دلجمی ءَ گوں گپ ءُ تران ءُ آوکیں گامگیج ءِ تہ ءَ جتا جتائیں پیسلہ زیرگ ءَ پد سیمی بنجاھی دیوان دو روچ ءِ دیوان ءَ پد چہ بنجاھی کماش ءِ رزا ءَ آسر کنگ بیتگ۔