کمانچر بلوچ پہ بلوچستان ءَ درپشوکیں اِستالے اَت
نبشتہ کار: سعودنؔاز
دی بلوچستان پوسٹ
ما مدامی کہ چمانی شانک دے ایں گُڑا بلوچستان ءِ زیبائی ءِ مارا سما کپ ایت کہ چینچو زیراپ ءُ سبزاوگیں زمینے ، ھمے زیبائیں ھاک ءَ چہ درتکگیں لھتیں اَنچیں کارسِت ودی بنت کہ بلوچستان ءِ چھرگ ءَ جَن اَنت ، آیانی بچکند آیانی گپانی شِرکنی پہ ڈگار ءَ آیانی مِھر بے کد ءُ کِساس بیت ، مند ءَ ودی بیتگیں ورناہ کمانچر بلوچ اوں ھمے سرڈگار ءِ زیبدار تِریں کارستاں چہ یکے اَت ، اگاں ما اِزم ءُ ھُنر ءِ گپ ءَ بہ کناں گُڑا واجو مُکملیں ءُ ایمانداریں یک اِزمکار ءِ گندگ ءَ کیت کہ کسانیں مُدتّے ءِ توک ءَ آئی ءَ گوں وتی لاگریں جان ءَ پہ بلوچستان ءِ زیبائی ءِ اَکس کَنگ ءَ چینچو پد بُرّیتگ ، اِزم کار وَ سک ءَ باز اِنت دنیا ءَ بلئے ھما اِزمکار کہ پہ دل ءُ سِتک وتی ازم ءَ پہ وتی راج ءُ پہ وتی زمین ءَ کار بِہ بند ایت نی یکے چہ کرناں ودی بیت اِنت ، واجو ھمے ھاک ءَ رُستگ ءُ مزن بوتگ اَت بلئے وتی اَکسکاری ءَ گوں سرجمیں بلوچستان ءُ راجدپتر ءِ دل ءِ کٹّ اِتگ اَت ، کمانچر بلوچ ءِ اَرچ ھمک اَکس ءِ توک ءَ ترا بلوچستان ءِ زیبائی ءُ بلوچستان ءِ سرا بوھوکیں زوراکی گندگ ءَ اَتکگ اَت کہ اَکسانی توک ءَ سرجمیں بلوچ ڈیھ ءِ پلگار کُتگ اَت ، کمانچر بلوچ ءَ من واجو ءِ نام ءَ پمیشکا توار کناں کہ مئے دیوان ءُ نندانکاں ما بِھ نام ءَ توار نہ کُتگ چہ دوستی ءَ ما درستاں واجو یا ناکو ءِ نام ءَ توار کُتگ اَت ءُ مدام دپ ءِ چہ کندگے پُر اَت ، اَنچیں مِھروانیں ءُ راج دوستیں اِنسانے اَت کہ منی واستا یک راھشونے درور بوتگ ، ھردیں کہ مردم ءَ دیستگ تہ زانتگ کہ گوں نادراھی ءَ جنگ کنگ ءَ اَنت بلئے اَنگت دم بَرگ ءِ نام ءَ نزانتگ ات کندگ ءَ اِنت ءُ کارا اِنت سپر ءَ اِنت ، بلوچستان ءَ سپر کَنگ ءَ اِنت-
رمزان ءِ ماہ ءِ بندات بوھگ ءَ کمو پیسر کہ واجو چہ بھرین ءَ واتر شال ءَ اَتکگ اَت تاں من سک ءَ گل اِتاں کہ ڈاکٹر ءَ نام گِپتگ کہ مرچی کمانچر ءُ آعظم پیداک اَنت گڑا شپ ءِ سھت ءَ ناکو گوں وتی سپری بیگ ءَ اَتک ءُ بی ایم سی ءَ سر بوت سلام ءُ ھال پُرسی ءَ پد پد ءَ ھما ھر روچیں کندگ ، کَلاگ گِرگ ، واجو ءَ مارا مند ءِ کِسہ کُت ءُ دات اَنت ، بھرین ءِ کِسہ ، سپرانی کِسّہ ، سر ءُ سوج گُشے زاناں اَنت بازیں سپر ءِ دلمانگ اَت اَنگت دل ءَ اَت کہ بلوچستان ءَ من پریم ءَ بہ کناں یک روچے من گِلّہ کُت کہ ناکو تو ھرجاہ سپر ءَ روے اَکسکاری کن ئے زاناں بلیدہ سُتکگ ءُ پلار اِنت کہ تو مئے میتگ ءَ سرے نہ جن ئے کند اِت ءُ گُشتے دیمے رندا المی ءَ کایاں ھودا اَکسکاری کناں ، واجو ءِ داتگیں پریم اَنگت مئے کلنڈیں اوتاک ءَ دِرنجیتگ اَنت ، من ھردیں کہ چم دیوال ءَ شانک داتگ اَنت تاں من سما کُتگ کہ اے کوٹی ءَ اَنگت ناکو کمانچر ءِ بوہ زندگ اِنت ، چُشیں مِھروانیں سرانی روگ اِنسان ءَ چہ بازیں درداں تَھ پُروش کنت یکیں سال اِنت ھما اِنت کہ بندات بوتگ چونیں چونیں تاوان بلوچستان ءَ وارتگ گوں چُشیں سرانی روگ ءَ ، ما گوں واجو ءَ یکجاہ کسانیں مُدتے گوازینت لھتیں شپ داشتے ھمدا ءُ پد ءَ کراچی ءَ درکپت پہ الاج ءَ گُڑا گُشتگ اَت ئِے کہ من سُھب ءَ مھلا رواں شما وتی واب ءَ ھراب مکن اِت ، گُڑا ھما کراچی ءِ روْگ ءِ گوں روْگ ءَ بوت ئے وتی واتری ءِ آھگ ءِ اِکرار ءِ پروشت ءُ پہ مدامی اَبدمان بوت-
ارواہ من اِینچو اوں لاھک نیاں کہ پہ تئی اِزم ءُ راجدوستی ءَ نبشتہ کُت بکناں بلئے تو وَ منی ھال ءَ شر سرپد ئے منی دست ءَ دگہ چے بیت بکول ءِ تئیگ ءَ منی کار وَ لچّہ ءِ نویسگ اِنت ، یار من کجام ساھتانی گپ ءَ بکناں دل پچ لرزیت وھدے مردم گُش انت کہ ناکو کمانچر رُکست بوتگ ، من مدام ودار ءَ بوتگاں کہ کدی اَعظم من ءَ گُش ایت کہ شَیر ءِ بوان ءُ تئی دیوان ءَ من ءَ شَیر ءِ وانگ ءِ موہ رس ایت ارواہ من زاناں کہ مردم کہ گِسر کپ اَنت تاں پُشت ءَ ھچبر چکّ نہ جن اَنت بلئے تئی چُشیں ناگتیں روگ ءَ مارا سک تکانسر کُتگ من گوستگیں ھپتگ ءَ اعظم گُشتگ اَت کہ تئی جان سلامت اِنت ءُ ما کایاں پد ءَ ھوار بہ ایں گڑا مرچی پرچی من ءَ چُش سما بوھگ ءَ اِنت کہ تو نوں واتر نہ بہ ئے ، ناکو یار نوں تئی دگہ توار بند نہ ایت ،نوں تئی نوکیں اَکس نہ ایت نوں کس نہ گُش ایت کمانچر ءِ اَکسانی مراگش اِنت ارواہ من ترا بس یکیں گپ ءَ ھال دیگ لوٹاں کہ تئی درستیں بیل ءُ ھمبل تو تُش تُش کُت اَنت شنکوں ، نوں من زاناں درستیں دیوان ھوادگ بنت بس کِسہ ، یات،گیر پَشت کپنت مرچی من تئی گِسر بوھگ ءَ سرجمیں بلوچستان ءِ چماں کہ اَرس بوھگ ءَ گنداں تاں سما بیت کہ بلوچستان چہ چونیں راج دوستیں سرئے ءَ زِبھر بوت ، وتی ھاک وتی اِزم وتی ھُنرءَ گوں ایماندار ءُ پُھتہ بوھگ ترا چہ یکے در بہ بارت واجو تو سرجمیں بلوچے اَت ئے ، تو راجدپتر ءَ پہ مدامی نمیرانے ، کوہ ءِ سلیمان ءِ کوھانی شرنگی گواھی دے اَنت کہ زمین ءِ مھراں یک مھروانیں کمانچر ئے ءَ چینچو تراولیں پند بُریتگ ، شال ءِ برپیں دلبند شاھد اِنت کہ بلوچ ءِ ایردستی تو وتی اَکسانی توک ءَ چو کید ءُ بند کُتگ ءُ دنیا ءِ دیما آوْرتگ ، مکُران ءِ کَوش گواھی دنت کہ تئی وڑیں بلوچے ءَ چوں وتی بلوچ بوھگ ءِ ھک اَدا کُتگ ءُ وتی ازم پہ وتی راج ءُ پہ وتی سرڈگار ءَ کارمرز کُتگ ءُ اَبدمان بوتگ ،ارواھیں واجو جان داں بلوچستان ءَ یک بلوچے ءِ نام مانیت تئی اِزمکاری ءُ تئی لاگریں بالاد پہ اَبد نمیران اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔