کیچ ءَ ھوار گوادر ءَ مردمانی بیگواھی ءُ پوج ءِ زوراکیانی ھلاپ ءَ زھرشانی شھدگ بند

کیچ ءِ بنجاھی شھر تربت تجابان ءَ سیادی داروکیں نودربر خداداد سراج ءِ بیگواھی ءِ ھلاپ ءَ آئی ءِ کھول ءَ دوبر تجابان کرکی ءِ ھند ءَ سی پیک دگ ءِ سر ءَ زھرشانی نندانک جتگ ءُ دگ بند کتگ-

کھول ءِ گوشگ اِنت گوستگیں روچ ءَ ما ھمے واستا دگ یل داتگ ءُ زھرشانی ھلاس کتگ کہ شمئے مردم یل دیگ بیت اِنت کہ آیانی وھدانی پژدر ءَ داں مئے مردم یل نہ بیتگ کہ چریشی ءِ پژدر ءَ دوبر وتی زھرشانی برجاہ داشتگ-

کھول ءِ گوشگ اِنت خداداد سراج سرگودھا میڈیکل کالج ءِ پیتھالوجی لیب سائنسز ءِ نودربرے کہ آ ھچ مارچ ءِ شپ ءِ ساھت ھشت ءُ نیم ءَ یک اسپیت رنگیں گاڑی ءَ الرشیس ھسپتال سرگودھا ءَ ظفر اللہ چوک ءَ آوار جتگ ءُ برتگ-

نودربر خداداد ءِ کھول ءَ آئی ءِ بیگواھی ءِ ھلاپ ءَ گوستگیں پشمبے ءَ ایم ایٹ تجابان کرکی ءِ ھند ءَ بند کتگ بیتگ ات کہ پد ءَ دمگداد ءِ سدکی ءَ پد کھول ءَ زھرشانی ھلاس کتگ ات-

زھرشانی ءِ سبب ءَ ھردوکیں نیمگاں دگ بند اَنت ءُ روکیں مساپراں جنجالانی دیمپانی اِنت-

دومی نیمگ ءَ گوستگیں شپ ءَ تربت آسکانی بازار ءَ دو ورنایانی آوار جنی ءِ ھلاپ ءَ دگ بند کنگ بیتگ-

اھوالانی رد ءَ گوستگیں شپ ءَ آسکانی بازار آپسر ءَ دو ورنا زورانسری آوار جنگ ءُ برگ بیتگ اَنت-

زورانسری آوار جنی ءِ ھلاپ ءَ مروچی آیانی کھول ءَ ڈاکی بازار آپ درک ءِ ھند ءَ زھرشانی کنان ءَ دگ بند کتگ –

ھمے وڑ ءَ ھوشاپ ءَ ایم ایٹ شھدگ ءَ زالبولاں زھرشانی کنان ءَ دگ بند کتگ-

زالبولانی گوشگ اِنت گوستگیں شپ ءَ سِھری ءِ وھد ءَ پوج ءَ ھوشاپ ءِ سربازی بازار ءَ امیر بخش سربازی ءِ لوگ ءِ سر ءَ بیڑ برتگ ءُ سَے ورنایاں ابید ءِ وارنٹ ءَ دزگیر کنگ ءِ جھد ءَ بیتگ بلے زھگ ءُ زالبولاں گھگیری کنان ءَ ورنا آوار جنگ ءَ نئیشتگ اَنت-

کھول ءِ گوشگ اِنت کہ پوج ءَ مئے سر ءَ زوراکی کتگ ءُ زھگ ءُ زالبول جتگ انت ءُ ابید وارنٹ ءَ مئے لوگ ءِ دود لگمتال کتگ اَنت-

وئیل ءِ ھلاپ ءَ زھگ ءُ زالبولاں بازیں کچے ءَ ھوشاپ سربازی بازار ءِ ھند ےَ دگ بند کتگ ءُ روانی مھتل کتگ اَنت-

مروچی کیچ ءِ جتا جتائیں جاھاں کھولانی زھرشانی نندانک برجاہ اَنت ھمے وڑ تجابان ءُ آپسر آسکانی بازار ءَ ھم زھرشانی بوگ ءَ اَنت-

ھمے وڑ ءَ گوادر ءَ زاکر عبدالرزاق ءُ لالا رفیق بیگواھی ءِ ھلاپ ءَ آیانی کھولاں کوسٹل ھائی وے گوستگیں بیست ءُ چار ساھتانی گوزگ ءَ پد ھم پچ نہ کتگ-

گوادر ءِ جھمنند لالا رفیق ءُ کپر نلینٹ ءِ جھمنند زاکر عبدالرزاق ءِ کھول ءَ وتی مردمانی یل نہ کنگ ءِ ھلاپ ءَ شانزدہ مارچ ءِ سھب ءَ نلینٹ زیروپوائنٹ ءَ مکران کوسٹل ھائی وے بند کتگ –

گوستگیں بیست ءُ چار ادارانی توک ءَ اے شھدگ پچ کنگ نہ بیتگ ءُ چریشی ءِ سبب ءَ کراچی ءُ مکران ءَ روک ءُ آیوکیں گاڑیانی کتار لگ اتگ اَنت-