بلوچستان لبریشن فرنٹ ءِ جارکش میجر گوھرام بلوچ ءَ پاکستانی پوج ءِ سوبیدارے ءَ ھوار شش کارمندانی کوش ءِ زمہ واری من اتگ ءُ گوشت سرمچاراں زی جاھو ءَ پاکستانی لشکر ءِ سر ءَ اُرش کُرتگ،شش کارمند کُشتگ ءُ سلاہ ءُ سامان دستیگ کُرتگ اَنت،اے میان ءَ نزیکیں پانگس ءِ سر ءَ ھم راکٹ آس داتگ، اُرش روچ ءِ دو ءَ بیتگ۔
آئی ءَ گوشتگ اے اُرش جاھو ءَ بدرنگ نوندڑہ ءَ پاکستانی لشکر ءِ یک ٹولی یے ءِ سر ءَ کنگ بیتگ۔ پاکستانی لشکر یک کامبیٹ ریپئر ٹیم ( سی آر ٹی ) کوھڑو ءَ برجاھیں پاکستانی لشکر ءِ بُنجل ءَ دیم پہ شریپ بیس ءَ روگ ءَ بیتگ اَنت کہ شور کُرتگیں کارشونی ءِ رد ءَ آیانی سر ءَ اُرش کنگ بیتگ۔
جارکش ءَ گوشتگ بلوچستان لبریشن فرنٹ ءِ دو جتائیں ٹولیانی کمک ءَ شوربندی کنگ بیتگ۔یک ٹولی یے ءَ گوں سوھوی ءَ پاکستانی لشکر ءِ کوھڑو ءَ برجاھیں بنجل ءِ سر ءَ چم سک داتگ اَنت ءُ پاکستانی لشکر ءِ سُر ءُ پُرانی بابت ءَ سرپدی دیگ ءَ بیتگ۔ گوں ھال ءِ سربیگ ءَ دُژمن ءِ سر ءَ اُرش کنگ ءَ بدرنگ ءَ پاکستانی لشکر ءِ راہ ءِ سر ءَ سکا نزیک ءَ سنگر گیپتگ ءُ ودار کُرتگ۔گوں دُژمن ءِ آھگ ءَ آیانی سر انچوش گوں تْرندی ءَ اُرش کنگ بیتگ کہ دُژمن ءَ سُرگ ءِ موہ نہ بیتگ ءُ آئی ءِ شش کارمند ھما جاگہ ءَ مُرتگ انت۔
جارکش ءَ گوشتگ پاکستانی لشکر ءَ چہ مُرتگیں کارمنداں سی ءُ ھپت سالی نائب سوبیدار آسپ اِرپان جھمنند اوکاڑہ پنجاب ءُ بیست ءُ دو سالی ئیں سپاھی ارپان الی جھمنند سرگودھا پنجاب ءِ کشتگ انت۔
آئی ءَ گوشتگ پاکستانی لشکر ءِ رسانکدری تک ( آئی ایس پی آر ) آدگہ کارمندانی مرگ ءِ گپ ءَ چیر دیگ ءَ اِنت۔اے اُرش ءَ پاکستانی لشکر ءِ اے کارمنداں دانگے تیر ھم آس نہ داتگ۔بلوچ سرمچاراں آیان ءَ یک تیرے ءِ آس دیگ ءِ موہ نہ داتگ ءُ اُرش ءَ پد دُژمن ءِ سلاہ ءُ سامان ھم دستیگ کُرتگ ءُ گوں وت بُرتگ اَنت۔ اے میان ءَ ایوک ءَ چہ نزیکیں پانگس ءِ نیمگ ءَ تیرگْواری کنگ بیتگ ، سرمچاراں ھمے پانگس ءِ سر ءَ راکٹ آس داتگ ءُ لشکر ءِ کارمند دیوالانی پُشت ءَ چیر بیگ ءَ لاچار کُرتگ اَنت ءُ اُرش ءَ پد دُرسیں سرمچار پہ سلامتی دراتکگ اَنت۔
آئی ءَ گوشتگ پاکستانی لشکر ءَ اے اُرش منّ اِتگ بلے چو مدامی ئیں وڑ ءَ دروگ بستگ کہ اُرش ءَ دو سرمچار شھید بیتگ۔ آئی ایس پی آر دروگ بند ایت ءُ دُژمن وتی پروش ءُ شرمندگی ءِ چیر دیگ ءِ بےسوبیں جُھدے کنگ ءَ اِنت۔ بی ایل ایف ءَ وتی پیش ءِ درشاناں اے اُرشانی بابت ءَ گْوشتگ ءُ بی ایل ایف ءِ پُشت ماں پُشتی اُرشانی آسر ءَ دُژمن ءَ وتی بازیں پانگس ءُ سنگر یل کُرتگ اَنت۔
آئی ءَ گوشتگ دژمن گوں وتی بازیں کچ ءُ مڈیاں ابید بلوچستان ءَ ھر پَڑ ءَ بےسوب اِنت۔دُژمنیں لشکر ایوک ءَ وتی زور ءَ دست ءُ گوشیں مردمانی کِر ءَ پیشدار ایت ءُ میاربار ءُ سلکاریں مردمانی ٹولی یے جوڑ کُرتگ ءُ بلوچ چاگرد ءِ تہ ءَ اڈاند ودی کنگ ءُ وتی پندلاں سوبین کنگ لوٹ ایت۔ بلوچ راج ءَ اوپار کنگ ءُ سرمچارانی کمک کنگی اِنت داںکہ ما ھواری ءَ دُژمن ءَ چہ وتی سرڈگار ءَ درکنگ ءَ سوبمند بہ بیں۔راج دلجم بہ بیت کہ بی ایل ایپ پہ دُژمن ءَ ھچ جاہ پشت نہ گیج ایت۔بلوچ سرڈگار ءِ سر ءَ دُژمن ءِ سُر ءُ پرانی گِر ءِ دار کنگ ءَ وتی توان ءَ کارمرز کن ایں۔اے اُرش داں بلوچستان ءِ آجوئی ءَ گوں تْرندی ءَ برجاہ بنت اِنت۔