بلوچستان ءِ دمگ کیچ ءَ پاکستانی پوج ءِ دست ءَ یکے بیگواہ کنگ بیتگ ءُ یکے آجو بیتگ-
گیشیں ھالانی رِد ءَ کیچ ءِ بُنجاھی شھر تربت ءِ ھند آبسر ءَ پاکستانی پوج ءُ گوستگیں شپ ءِ ساھت یک ءَ بیڑبرتگ ءُ یک ورنایے آوار جتگ ءُ ناشناسیں جاھے ءَ برتگ-
آوار جنگ بیتگیں ورنا ئے پجّار بالاچ ء مولابخش نام ءَ چہ بیتگ-
اِھوالکارانی گوشگ اِنت کہ ورناہ یک تنگدستیں کھولے ءَ گوں سیادی دار اِیت ءُ ورناہ درزی کار ءَ کنگ ءَ بیتگ وتی لوگ ءَ لاپ دیگ ءَ بیتگ-
ھمے وڑ تربت ءِ دمگ چہ آبسر ءَ چار روچ ءَ ساری پاکستانی پوج ءَ یک ورنایے نواب حاصل بلوچ زورانسری آوار جنی ءِ نشانگ کتگ-
نواب حاصل ءِ کھول ءَ مروچی تربت ءَ زھرشانی ءِ جار جتگ اَنت بلے گوستگیں شپ ءَ نواب ءِ واتری ءَ پد کھول ءَ زھرشانی ءِ جار واتر زرتگ-
دمگی اِھوالکارانی رِد ءَ نواب حاصل گوستگیں شپ ءِ یک ءَ وتی لوگ ءَ سر ءَ بیتگ-
زانگ بہ بیت چار روچ ءَ ساری تربت ءِ جتاجتائیں دمگاں چہ نواب حاصل ءَ ھوار چار ورناہ زورانسری آوار جنی ءِ نشانگ کنگ بیتگ اَنت ،آ دگہ سئیں ورناہ انگت بیگواہ اَنت-
دومی نیمگ ءَ بلوچ وائس فار جسٹس ءَ رحیم زھری ءِ یل کنائینگ ءِ لوٹ کتگ-
بلوچ وائس فار جسٹس ءَ چہ گیشکوری ٹاؤن شال ءَ سے فروری 2023 ءِ زورانسری بیگواہ کنگ بیتگیں رحیم زھری ءِ یل کنائینگ ءِ لوٹ کتگ گْوشتگ کہ انسانی ھکانی گل رحیم زھری ءَ پہ سلامتی یل کنائینگ ءِ ھاتر ءَ توار چست بکن اَنت-
درشان ءِ تہ ءَ گْوشگ بیتگ کہ رحیم زھری آئی ءِ لوگ بانُک ، پیرزالیں مات ءُ کسانوکیں چُکانی ھمراھی ءَ چہ لوگ ءَ پاکستانی پوج ءَ زورانسری آوار جنی ءِ نشانگ کتگ اِت اَنت ، آئی ءِ لوگ بانُک یازدہ روچ ءَ پد یل کتگ ، مات ءُ چُک یل کنگ بیتگ اَنت بلے رحیم زھری انگت بیگواہ ءَ اِنت-
آئی ءَ گوشتگ کہ آئی ءِ یک سیادے تابش بلوچ ءُ لیاقت زھری نُھ جون 2021 ءُ چہ علی نادُراھجاہ ھُزدار ءَ آوار جتگ ءُ بیگواہ کتگ اِت اَنت، لیاقت زھری اپریل 2023 ءَ آجو بیتگ بلے آئی ءِ ھمراھی ءَ زورانسری بیگواہ کنگ بیتگیں ناکوزتک تابش زھری 17 اکتوبر 2022 ھاران ءَ سی ٹی ڈی ءَ یک دروگیں میڑے ءَ شھید کنگ بیتگ اَت-
درشان ءِ تہ ءَ دیمتر ءَ گوشگ بیتگ کہ بلوچستان ءَ زورانسری آوار جنی ءِ دْرچ یکشلہ برجاہ ءَ اِنت وھدے کہ سی ٹی ڈی ءُ دگہ ریاستی پوج بندیگیں مردماں ناشرکار گوش اَنت ءُ دروگیں میڑاں کُش اَنت، رحیم زھری ءَ ھوار دگہ زورانسری بیگواہ کنگ بیتگیں مردمانی زند ھترہ ءِ تہ ءَ اَنت، انسانی ھکانی گل رحیم زھری ءِ ءَ ھوار دگہ بیگواھیں مردمانی زندماناں پھازگ ءُ آیانی پہ سلامتی یل کنائینگ ءِ ھاتر ءَ وتی کرد ءَ پیلو بکنت-