زورانسری آوار جنگ بوتگیں نودربر فرید بلوچ زاھر کنگ بوتگ

پنجاپ شھدربر جاہ ءَ زورانسری آوار جنگ ءُ بیگواہ کنگ بوتگیں فرید بلوچ ءِ دزگیری زاھر کنگ بوتگ –

مروچی آدینگ ءِ روچ ءَ لاھور ءِ پنجاپ شھدربرجاہ ءَ ماسٹرز ءِ نودربر فرید بلوچ لس پوشاک گور ایں چیریں ادارھانی کارمنداں آوار جتگ ءُ بیگواہ کتگ کہ پدا رند ءَ لاھور ءِ پولیس دست ءَ داتگ –

پولیس ءِ دست ءَ دیگ ءِ ھبر آئی ءِ نزیکیں مردمے ءَ راست کُتگ – آئی ءِ سنگتانی رِد ءَ فرید بلوچ گارڈن ڈاؤن پولیس گِس ءَ آرگ بوتگ بلے تنی وھدی پولیس واکداراں فرید ءِ بگیری ءِ ھچ وڈیں ارزی پیش نہ داشتگ –

فرید بلوچ ءِ زورانسری آوار جنی نودربر ءُ سیاسی گلاں ترندی ءَ گوں ایر جتگ –

انسانی ھکانی گلاں ھوار بلوچ سیاسی ءُ نودربر گلاں چہ لاھور ءَ نودربر ءِ زورانسری آوار جنی ترندی ءَ گوں ایرجتگ ءُ آئی ءِ یل کنگ ءِ لوٹ کتگ-

ہیومن رائٹس کمیشن آف پاکستان ءَ چاگردی ترامجاہ ءَ شنگ کرتگیں درشانے ءِ تہ ءَ گوشتگ کہ گوستگیں بازیں روچاں ایچ آر سی پی ءَ ھمے ھال سربوگ ءَ انت کہ لاھور ءِ شھدربرجاہ ءَ چیریں ادارھانی کارمند بلوچ ءُ پشتون نودربراں تُرسینگ ءَ انت، ءُ کم چہ کم دو نودربر زورانسری آوار جنگ ءُ بیگواہ کنگ بوتگ انت – بلوچستان ءُ کے پی کے ءِ نودربر پنجاپ ءِ تہ ءَ پھریز نہ انت –

گل ءَ گوشتگ کہ نودربرانی پروفائلنگ کنگ ھلاس کنگ بہ بیت، درسیں نودربر بید ترس ءُ زورانسری آوارجنی ءِ ترس ءَ وانگ ءِ موکل دیگ بہ بنت –

نیشنل پاٹی ءِ سروک ءُ بلوچستان ءِ گوستگیں سر وزیر مالک بلوچ ءَ ایکس ءِ تہ ءَ نبشتگ کہ بلوچ نودربرانی ماں شھدربرجاہ ءَ زورانسری آوار جنی ءَ ترندی ءَ گوں ایرجن ایں ءُ ھمے لوٹ ءَ کن ایں کہ فرید بلوچ یل کنگ بہ بیت –

نودربر فرید بلوچ ءِ سنگت ءِ گوشگ انت کہ فرید بلوچ پاکستان ءِ چیریں ادارھانی کارمنداں آوار جتگ ءُ بیگواہ کتگ بلے مردمانی ھما دمان ءَ توار چست کنگ ءِ سوب ءَ بید کتکاری یا ارزی ءَ پولیس ءِ دست ءَ دیگ بوتگ –

فرید بلوچ بُنکی ءَ بلوچستان ءِ بنجاھی شھر شال ءِ نندوک انت ءُ ھنو لاھور ءِ پنجاپ شھدربر جاہ ءَ وانگ ءَ بوتگ ءُ ماسٹرز ءِ نودربر ئے – آئی ءِ سنگتانی رِد ءَ فرید بلوچ ءِ اے وڈیں زورانسری آوار جنی ءَ شھدربر جاہ ءِ سیکورٹی چیف ءِ دست مان انت –

نودربرانی گوشگ انت کہ گوستگیں بازیں روچ ءِ بیت کہ لاھور ءِ وانگجاھاں وانوکیں بلوچ ءُ پشتون نودربر ترسینگ بوگ ءَ انت، نودربرانی گوشگ انت کہ باز سال بیت پروفائلنگ درچ برجاہ انت نوں روچ رھمانی کیمریانی دیم ءَ نودربر آوار جنگ بوگ ءَ انت –

نودربر گلاں پاکستانی پولیس ءَ ھوار پھازگی لشکر ءِ ادارھ دلگوش گور کُتگ گوشتگ انت پنجاپ ءِ تہ ءَ پہ وانگ ءَ اتکگیِ نودربرانی پروفائلنگ کنگ بند بہ بیت اگاں ناں ما لاچار بہ ایں کہ ترندیں زھرشانی بہ کن ایں –