بیگواھیں راشد حسین ءِ درگت ءَ مراگش ءَ بھر بہ زوریت ءُ زورانسری آوار جنیانی بگیری ءَ توار چست بہ کن ات – بی وائی سی

بلوچ یکجھتی کمیٹی ءَ بیگواھیں سیاسی باسک راشد حسین زورانسری آوار جنی ءُ کھول ءِ نیمگ ءَ ماں شال ءَ بوؤکیں مراگش ءِ پلامرزی ءَ وتی شنگ کرتگیں درشانے ءِ تہ ءَ گوشتگ کہ راشد حسین مروچیگ ءَ چہ پنچ سال ساری ماں دبئی ءَ در کانودی آوار جنگ بوتگ ءُ پدا پاکستان ءِ دست ءَ دیگ بوتگ وھدیکہ پاکستان ءِ دست ءَ دیگ ءَ پد آئی ءِ ھچ ھال اھوال نیست – آئی ءِ کھول ھچ ءَ سرپد نہ انت کہ آ ھست ءُ سلامت انت یا ناں کہ وت یک کانودی ءِ بگیری دارگ انت – راشد حسین اے وھدی بندیگ ءُ بازیں ازیت ءِ سگگ انت ءُ ریاستی ادارہ آئی زاھر کنگ ءَ نہ انت ءُ درکانودی آ بیگواہ کنگ بوتگ –

جارکش ءَ گوشتگ کہ راشد حسین ءِ زورانسری آوار جنی ءَ نوں کساس پنچ سال سرجم بوتگ انت – اے میان ءَ آئی ءِ کھول ھاسکر آئی ءِ مات ءَ بلوچستان ءَ ھوار سرجمیں پاکستان ءِ تہ ءَ وتی زھرشانی نبشتہ کنائینتگ انت – بلے بژنی گپ ھمیش انت کہ زورانسری آوار جنی ءَ پد ھنگت زاھر کنگ بوگ ءَ نہ انت – زھرشانی ءَ نندانکاں ھوار کھول ءَ آئی ءِ یل کنائینگے ھاتر ءَ درسیں راہ کارمرز کتگ انت، آمیدگس ءِ دروازگ ٹُک اِتگ انت، برزی تبک ءِ واکداراں وتی پریات سرکتگ بلے اے درسیں کانودی راھانی کارمرزی ءَ پد ھم یک بیگناھے مردمے بندیگ انت کہ بلوچستان ءَ انسانی ھکانی لگتمالی ءَ پدر کنت – بیگواھیں مردمانی کھول مدامی ھمے گپ ءَ جنگ ءَ انت کہ آیانی دوستگیں مردم اگاں درکانودی کارے کتگ گڈا آمیدگس ءَ آرگ ءُ سزا دیگ بہ بنت بلے بدبھتی ءَ ریاست زورانسری آوار جنی ءَ وتی سلاہ ءِ کارمرز کنگ ءُ بلوچستان ءَ ھلوچ کنگ ءِ پالیسی ءِ سر ءَ روان انت –

بی وائی سی ءَ وتی درشان ءِ گڈسر ءَ بلوچ راج ءَ گوں لوٹ کتگ کہ ماں شال ءَ بوؤکیں مراگش ءَ بھر بہ زور انت – بیگواھیں راشد حسین ءِ زورانسری آوار جنی ءِ بگیری ءَ آئی ءِ کھول ءِ نیمگ ءَ ھمے ماہ ءِ پانزدہ اکتوبر ءَ ماں شال ءَ پریس کلب ءِ دیم ءَ مراگش ءِ برجم دارگ بوگ ءَ انت کہ اودا راشد حسین زورانسری آوار جنی ءَ ھوار بلوچستان ءَ انسانی ھکانی لگتمالی ءِ بگیری ءَ ھر تک ءُ پھناتاں سیادی داروکیں مردم وتی ھیالانی درشانی ءَ کن انت – درسیں انسان دوست ھاسکر بلوچ راج ءَ گوں دزبندی انت کہ آ بیگواھیں راشد حسین ءِ کھول ءِ جھد ءَ گوں ھمراھداری بہ کن انت ءُ آیانی توار جوڈ بہ بنت –