بلوچ نودربر رھشون شبیر بلوچ ءِ زورانسری آوار جنی ءَ ھپت سال سرجم بوتگ انت ، کھول ءِ نیمگ ءَ زھرشانی روانک ءِ کشگ بوتگ –
درنگاز کنوکاں آرٹس کونسل کراچی ءَ بگر تاں پریس کلب ءِ دیم ءَ روانک کش اِتگ – اے زھرشانی روانک ءَ زھگ ءُ زالبولاں ھوار مزنیں کچے ءَ مردماں بھر زرتگ –
شبیر بلوچ چار اکتوبر سال دوھزار شانزدہ ءَ ماں تربت ءِ دمگ گورکوپ ءَ پاکستانی پوج ءَ دگہ بیست مردمانی ھمراھی ءَ زورانسری آوار جتگ ءُ بیگواہ کتگ، دو ھپتگ ءَ پد آدگہ ھمراہ یل کنگ بوتگ انت بلے شبیر بلوچ ءِ ھنگت ھچ ھال اھوال نیست –
مروچی چار شمبے ءِ روچ ءَ کراچی پریس کلب ءِ دیم ءَ بوتگیں زھرشانی روانک ءَ شبیر بلوچ ءِ گھار سیما بلوچ ءَ تران کنان ءَ گوشتگ کہ ما شبیر بلوچ ءِ زورانسری آوار جنی ءُ آئی ءِ یل نہ کنگ ءِ بگیری ءَ یکشل ءَ زھرشانی کنگ ءَ ایں، روانک، شدکشیں زھرشانیاں ھوار شال ءُ اسلام آباد ءَ نندانک جتگ ءُ نشتگ انت ، سوبائی ءُ وفاقی وزیرانی باور کنائینگ ءَ پد ھم مئے برات ءِ ھچ ھال اھوال نیست، دو سال ساری ملک ءِ گوستگیں مزن وزیر عمران خان ءَ کول کتگ ءُ مارا باور کنائیں اِتگ کہ آ منی برات ءَ ھوار ایندگہ بیگواھیں مردمانی یل کنائینگے ھاتر ےَ ملک ءِ ادرھاں گوں گپ جنت –
” ما پہ انساپ ءِ ھاتر ءَ دراہ کتگ، وڈ وڈا زھرشانی کتگ بلے ھنچوش سما بیت کہ اے ملک ءِ تہ ءَ مئے گوشداروک نیست – شبیر بلوچ ءِ زورانسری آوار جنی ءب درگت ءَ ملکی ءُ میان استمانی انسانی ھکانی ادارھاں ھم چہ ریاستی ادارھاں جست گپتگ بلے ھچ وڈیں پسو نہ رستگ “
کھول ءِ زھرشانی ءَ بیگواھیں متدمانی پانکجنیں گل وائس فار بلوچ مسنگ پرسنز ءُ بلوچ یکجھتی کمیٹی کراچی ءِ پلامرزی ھم گون بوتگ –
ھمے وھد ءَ سمی دین بلوچ، آمنہ بلوچ، وہاب بلوچ، سعیدہ حمید زھری، سعید بلوچ ءَ ھوار دگہ مردماں تران کتگ ءُ گوشتگ کہ ما چہ ملک ءِ واکداراں یکرندے پدا لوٹ کن ایں کہ شبیر بلوچ ءَ زاھر بہ کن انت ءُ آئی ءَ انساپ بہ دئینت اگاں آئی ءِ سر ءَ الزام ءِ ھست گڈا ملک ءِ آمیدگس ءَ پیش کنگ بہ بیت اگاں آ کتکار بوت گڈا سزا دیگ بہ بیت، بلے اے وڈ بید جرم ءَ سالاں سال بیگواہ کنگ ءُ ازیت دیگ ءَ مئے سرا زوراکی کنگ مہ بیت – مئے مروچیگیں زھرشانی مول ملک ءِ ادارھاں چہ انساپ ءِ لوٹگ انت – ما اے ریاستءِ جھمنند آئین ءُ کانودانی رِد ھَ وتی دوستیگیں مردمانی وش ءُ سلامتی یل کنگ ءِ لوٹ کن ایں –