گوستگیں یک سالے ءَ چہ زورانسری بیگواہ مشکے ءِ جھمنندیں ورناہ ممتاز بلوچ ءِ برزاتک بانڑک بلوچ ءَ انسانی ھکانی گلاں چہ وتی ناکو ممتاز بلوچ ء مھمد مراد ءِ یل کنائینگ ءِ ھاتر ءَ کرد ءَ پیلو بکن اِت-
آئی ءَ گْوشتگ کہ منی ناکو ءَ اے سیمی رندیں گیرکانودی زورانسری آوار جنی ءِ نشانگ کنگ بوتگ، اشی ءَ ساری آ دو رند ءَ آوار جتگ ءُ زورانسری آوار جنی ءِ نشانگ کتگ- دوھزار شانزدہ آ بیگواہ کنگ بیتگ ءُ ھپت ماہ ءَ تاں لَٹ ءُ کُٹ کنگ ءَ پد نشانگ کتگ ءُ پد ءَ ھم آئی ءِ سر ءَ ھچ پدر نہ بوتگ پد ءَ دوھزارہ ھپدہ ءَ دوبر چست کتگ ءُ دو سال ءَ تاں ریاستی ادارھانی آزارجاھاں بندیگ بیتگ بلے آئی ءِ بگیر ءَ ھچ وڑیں گیرکانودی پُرکاریاں ھمگرنچ بوگ ءَ پدر نہ بیتگ ءُ آ پد جنوری 2020 ءَ یل کتگ-
آئی ءَ گْوشتگ کہ دو رند ءَ منی ناکو زورانسری آوار جنی ءِ نشانگ کتگ سرجمیں زھنی ءُ جسمی ازیتاں اَبید آئی ءِ سر ءَ ھچ وڑیں چیزے پدر نہ بیتگ ءُ نی سیمی رند ءَ پرچا ءُ کجام ھساب ء بیگواہ کتگ ؟ ءُ مارا یکو مُچی ازیت دیگ ءَ اَنت-
آئی ءَ گْوشتگ کہ اے نا انساپی ءُ زُلم سر ءَ آمیدگس پرچا بے توار اَنت؟ یک میاریں مردمے یکو زورانسری آوار جنی ءِ نشانگ کنگ ءُ کھول ھم زھنی ازیت ءَ چہ یکو گوازینگ ءَ ایں بلے بژن ایں آمیدگس ، رسانکدر، انسانی ھکانی گل بے توار ایں ندارگ چاروک جوڑ بوتگ ءُ مئ بے وسی ءَ چہ لزت گرگ ءَ اَنت-
بانڑی بلوچ ءَ دیمتر ءَ گْوشتگ کہ یک سالے ءَ ساری شش ستمبر 2022 ءَ منی ناکو ممتاز بلوچ ءَ سی ٹی ڈی ءُ دگہ ریاستی ادارھاں ھُزدار ءَ چہ گیرکانودی ءَ آوار جتگ ءُ گوں برتگ تاں انو آئی ءِ درگت ءَ مارا ھچ وڑیں سرپدی دیگ بوگ نہ اِنت کہ آ کجا ءَ اِنت کجام ھال ءِ تہ ءَ اِنت-
بانڑی بلوچ ءَ چیف جسٹس سپریم کورٹ قاضی فائز عیسیٰ ءَ چہ دزبندی کتگ گْوشتگ کہ چیف جسٹس منی ناکو ءِ گیرکانودی زورانسری آوار جنی ءِ درگت ءَ گامگیج بزور اِیت، منی ناکو بے میارے ءُ آئی ءَ زوت یل بکنائین اَنت ءُ مارا اے ازیت ءِ چہ بہ رکین اَنت-
آئی ءَ دیمتر ءَ گْوشتگ کہ منی ناکو ءِ یل کنائینگ ءِ ھاتر ءَ باندا سے اکتوبر 2023 ءَ بلوچ وائس فار جسٹس ءُ کھول نیمگ ءَ چہ ایکس (ٹوئیٹر) ءَ یک کمپینے برجم دارگ بیت سرجمیں انسان دوستیں مردماں گوں دزبندی کن ایں آ مئے ھمراھداری ءَ بکن اَنت ءُ کمپین ءِ بھر بہ بنت ءُ منی ناکو ممتاز بلوچ ءِ پہ سلامتی یل کنائینگ ءَ توار چست بکن اَنت-