بلوچ یکجھتی کمیٹی لاھور ءِ نیمگ ءَ ڈیرہ بگٹی ءَ برجاھیں نارواھیں پوجی بیڑ، لیاری ءَ گینگ وار ءِ نام ءَ برجاھیں بلوچ نسل کشی ءُ سی۔ٹی۔ڈی ءِ نیمگءَ زورانسری بیگواھی ءِ آماچ کنگ ءَ پد دروگیں میڑ ءَ شھید کنگ بیتگیں قلات ءِ فٹبال ءِ لئیبی اعجاز بلوچ ءِ کوش ءِ بگیرءَ لبرٹی چوک لاھور ءَ زھرشانی کنگ بیتگ۔
زھرشانی کنوکانی گُشتگ کہ چہ ریاست ءِ نیمگ ءَ یک مزنیں مدتے بیت کہ بلوچ نسل کشی شدت ءَ گوں برجاہ اِنت۔ گوستگیں دو ھپتگاں چہ ڈیرہ بگٹی ریاستی پوج ءِ انگر ءَ اِنت، کہ آودہ سرزاھریءَ کدی بلوچانی لوگ ماندراگ بئیگ ءَ اَنت ءُ کدی آ بیگواہ کنگ بنت۔ ھما، کہ آیانی ڈبہ مئے پھازگ اَت، ھما مئے کوش ءِ ذمہ وار اَنت۔ یات بہ بیت کہ داں انگت ڈیرہ بگٹی ءَ دامگی ءُ رھوت ءِ درستیں راہ بند اَنت، کہ اشی ءِ سوب ءَ برجاھیں زلم ءُ زوراکی ءِ راستیں اندازگ جنگ باوری نہ اِنت۔
اعجاز بلوچ ءِ کوش ءِ بابت ءَ زھرشانی کنوکانی گُشگ اَت کہ اے والی وئیل نہ اِنت کہ وھدے سی۔ٹی۔ڈی ءَ زورانسری بیگواہ کتگیں بلوچ دروگیں میڑ ءَ شھید کُتگ۔ ریاست ءِ نیمگ ءَ چہ سی۔ٹی۔ڈی ءِ دستءَ بلوچ نسل کشی کنگ آئی ءِ نوکتریں اوزار اِنت۔
لیاری، بلوچانی ھما زمین اِنت، کہ آ ادب ءُ ازم ءِ ردءَ مدام اولی سرپ ءَ بیتگ، بلے شوربندی ءَ گوں لیاری ءِ مھلوک ءَ چہ بلوچستان ءَ جتا کنگ ءِ ھاترءَ گینگ وار ءِ درچ پدءَ بندات کنگ بئیگ ءَ اِنت، کہ اشی یکیں مکسد پہ لیاری ءُ بلوچ مھلوک ءَ تباھی اِنت۔
گُڈسرءَ زھرشانی کنوکانی گُشگ اَت کہ ریاست ھواریں دروشم ءَ بلوچ نسل کشی ءَ ھوار اِنت۔ ڈیرہ جات ءَ بگر داں لیاری ءَ، بلوچ کجا ھم چہ اے ریاست ءِ زوراکیں پالیسیاں چہ نہ رکیتگ۔ وھد ءِ زلورت ھمیش اِنت کہ اے ھواریں زوراکی ءِ بگیری ءَ بلوچ مھلوک یکجاہ بہ بیت ءُ ھواریں گھگیری بہ کنت۔اگں نہ بحیثیت بلوچ مئے پجار ءُ مئے ھستی دوھیں نہ رکنت۔