بلوچی زبان ءِ نامداریں شائر مبارک قاضی بیران: مبارک قاضی ءِ بابت ءَ لھتیں سرپدی -ٹی بی پی ستاشانی

بلوچی زبان ءِ نامداریں شائر مبارک قاضی 24 دسمبر 1956 ءَ بلوچستان ءِ تیاب دپی دمگ پسنی ءَ کھدہ امان اللہ ءِ لوگ ءَ ودی بیتگ۔

مبارک قاضی ءَ بنداتی وانگ چہ پسنی ھائی اسکول ءَ 1972 ءَ سرجم کُتگ ءُ گیشتری وانگ ءِ ھاتر ءَ کراچی ءِ سندھ مسلم کالج ءَ شُتگ، بلے مالی ناگیگیانی سوب ءَ آئی ءَ وتی وانگ نیم راہ ءَ یل کُتگ ءُ پد ءَ وتی بنکی ھنکین ءَ واتر بیتگ۔ آ 1978 ءَ پہ بی اے ءِ ھاتر ءَ دوبر کراچی ءَ شُتگ ءُ اردو آرٹس کالج ءَ وتی وانگ برجاہ داشتگ ئے۔ ءُ پد ءَ پہ ماسٹرز (ایم اے) ءِ ھاتر ءَ آ بلوچستان شھدربرجاہ شال ءَ شُتگ، کہ چہ اود ءَ آئی ءَ انٹرنیشنل ریلیشنز (آئی آر) ءِ تہ ءَ ڈگری گپتگ۔

مبارک کازی ءُ بلوچستان ءِ زرمبشت ءِ سرھیل نواب ھیر بکش مری ءِ گون ءَ یک یاتکاری اکسے ءَ گندگ کیت –

مبارک کازی ءُ بیگواھیں ڈاکٹر دین مھمد ءِ جنک سمی دین ءَ وتی کتاب ءَ سوگات کنگ ءَ گندگ کیت اِنت-

پہ بلوچی زبان ءِ تالانی ءُ دیمروی ءَ مبارک قاضی ءَ مزنیں کردے گوں وتی شائری ءَ پیلو کُتگ، مبارک قاضی ءِ شئر بلوچ، بلوچی ءُ بلوچستان ءِ جھگیر بیتگ اَنت۔ مبارک قاضی ءِ شئرانی تہ ءَ نہ تھنا ازم ءُ ھیالانی درشانی گوں جوانی ءَ گندگ بیتگ بلکیں گوں زمین، زُبان ءُ راج ءَ مھر ءِ درشان ھم پلگاریں رنگ ءَ گندگ ءَ اَتکگ انت۔

مبارک قاضی ءَ چہ ورنائی ءَ شائری ءِ نیمگ ءَ دلگوش گور کُتگ ءُ کساس 1977 ءَ آئی ءَ شائری نبشتہ کنگ بندات کُتگ۔ مبارک قاضی ءِ شائری آئی ءِ جند ءِ تاکبنداں ابید، روتاک، ماھتاک، ءُ دگہ جاھاں ھم شنگ ءُ تالان بیتگ اَنت۔

مبارک شئیری ازم ءِ ھواری ءَ چاگردی ازم ءَ ھم گندگ کیت اِنت –

مبارک کازی ھمود ءَ شئیر نبشتگ کنت ھمود ءَ آ بیگواھیں مردمانی درداں ھوار گندگ کیت –

بلوچی زبان ءِ مھر ءُ وتی آشوبی شئرانی سوب ءَ مبارک قاضی دزگیر ھم کنگ بیتگ، بیھار ھم دیگ بیتگ بلے مبارک قاضی ءَ اے بیھار ءُ دزگیریاں ابید ھم وتی آشوبی شئر برجاہ داشتگ اَنت ءُ راج سکین داتگ کہ پہ وتی باندات، پہ وتی آجوئی، پہ وتی وشھالی، پہ وتی زبان، راج ءُ ڈیھہ ءَ وتی جھد ءَ برجاہ بہ دار اَنت۔

مبارک قاضی ءِ شِنگ بیتگیں شائری دپترانی نام

1. زرنوشت
2. چولاں دریا یل داتگ
3. منی اھدءِ گم ءِ کسہ
4. مُرگ پہ کدوھاں رپتگ اَنت
5. جَنگل چنچو زیبا اِنت
6. شاگ ماں سبزیں ساوڑءَ
7. آپ سَمّاک ءَ جتگ
8. ھانی منی ماتیں وتن

ھمے وڑ ءَ مبارک قاضی ءِ نبشتگیں نبشتانکانی ھم یک دپتر ءِ شنگ بیتگ کہ آئی نام اِنت:

باریں منی باریگ کجام اِنت

مبارک کازی ءِ اکس ماں بلوچستان ءِ نامی ئیں اکسکار کمانچر بلوچ ءِ اکسانی پریمانی تہ ءَ گندگ کیت اِنت-

بلوچی زبان ءِ نامداریں شائر مبارک قاضی

مبارک قاضی مروچی بزاں 16 ستمبر 2023 ءَ ماں تُربت ءَ بیران بیتگ۔ مبارک قاضی ءِ بیرانی ءَ گوں بلوچی شائری، بلوچ زبان دوستی ءُ لبزانک ءِ یک مزنیں اھدے آسر بیتگ۔

ٹی بی پی بلوچی ءِ درستیں ٹیم بلوچی زبان ءِ مزن نامیں شائر مبارک قاضی ءَ آئی ءِ جندے اے دوبنداں گوں یات کنت ءُ ستاشانی پیش کنت کہ:

“چُشیں قاضی یے کہ مبارک اِنت”
“پدا مشکل اِنت کہ ودی بہ بیت”