کلات: پوج ءِ بنجل ءِ سر ءَ سلاہ بندیں مردماں اُرش کتگ

پاکستانی پوج ءِ بنجل ءِ سر ءَ سلاہ بندیں مردماں راکٹ ءُ دگہ سلاھانی گون ءَ اُرش کتگ ءُ پشت مانداتگ ءُ شتگ انت-

بلوچستان ءِ دمگ کلات ءِ ھند جوھان ءَ شاہ مردان ءَ ھستیں پاکستانی پوج ءِ بنجل ءِ سر ءَ سلاہ بندیں مردماں مزنیں کچے ءَ گوستگیں شپ ءَ اُرش کتگ-

دمگی مردمانی رد ءَ پوج ءِ بنجل ءِ سر ءَ جتا جتائیں نیمگاں راکٹ ءُ دگہ سلاھانی گون ءَ اُرش بیتگ-

واکداراں اُرش ءِ درگت ءَ تاوانانی بارو ءَ دگہ اھوال نہ کتگ انت ءُ بلے بنجل ءِ کش ءُ گوراں پوج تر ءُ تاب ءَ گندگ بیتگ-

بلوچستان ءِ دگہ ھندانی ڈول ءَ کلات ءَ ھم بلوچ آجوئی دوستیں گل پرکار اَنت کہ اود ءَ پوج ءِ سر ءَ جتا جتائیں دروشماں اُرشانی دیمپانی کنگ کپگ ءَ اِنت-

ھمے ماہ ءَ کلات جوھان ءَ سلاہ بندیں مردماں پاکستانی پوج ءِ دو کارندہ ھما وھد ءَ نشانگ کنگ ءُ کشگ بیتگ ات اَنت آ بازار ءَ درمان ءُ دگہ چیزانی گرگ ءَ پد پرپٹ ءِ گون ءَ وتی بنجل ءَ روگ ءَ بیتگ اَنت-

اے اُرش ءِ زمہ واری بلوچ لبریشن آرمی ءَ پہ وت زرتگ ات کہ گل ءِ جارکش جیئند بلوچ ءَ درشان ءَ گشتگ ات کہ اے کارندہ جوھاب بنجل ءِ سر ءَ بی ایل اے ءِ اُرش ءَ زدگ بیتگیں کارندھانی واستا درمان برگ ءَ بیتگ انت ءُ ھال ءِ سر بوگ ءَ سرمچاراں اُرش کتگ بیتگ-

مروچی بیتگیں اُرش ءِ زمہ واری کس ءَ پہ وت ءَ نہ زرتگ-