بلوچی اکیڈمی ءِ شست ءُ پنچمی سالروچ ءَ دیوان

بلوچستان ءِ بنجاھی شھر شال ءَ بلوچ اکیڈمی ءِ شست ءُ پنچمی سالروچ ءِ درگت دیوانے بلوچی اکیڈمی ءِ سرکماش سنگت رفیق ءِ پاگواجھی ءَ برجم دارگ بوتگ – دیوان ءَ اکیڈمی ءِ باسکاں بھر زرتگ ءُ دیوان ءَ بلوچی اکیڈمی ءِ کارگشاد ڈاکٹر بیزن سبا ءَ ھمک سالی کارگزاری ءِ درگت ءَ حال داتگ انت ءُ سال ءَ داشتگیں لبزانکی مراگش ، شنگکاری کارانی باروا سرپدی، اکیڈمی ءِ اے دگہ سُر ءُ پُر ءُ شؤر بندیانی درگت ءَ باسک سرپدی داتگ انت – چہ ایشی ءَ ابید سال ءِ میان ءَ مالی ھرچ ءُ درچ ءِ درگت ءَ حال داتگ ءُ آیانی شور ءُ سلاہ زُرتگ اَنت –

دیوان ءَ اکیڈمی ءِ باسکاں بلوچستان سرکار ءِ سر وزیر میر عبدالقدوس بزنجو ءِ منّت گپتگ کہ آئی ءَ پہ بلوچی زبان ءِ دیمروئی ءَ اکیڈمی ءِ سالانہ گرانٹ ودّینتگ ءُ پنچ کروڑ کُتگ –

بلوچی اکیڈمی ءِ باسکاں اے گپ ءِ سرا بژنی درشان کرتگ کہ سرکاری وانگ جاھاں بلوچی ءِ وانینگ ءُ بلوچی نبشتانک نبیسی ءِ کار دارگ بوتگ – چہ ایشی ءَ ابید باسکاں لوٹ کرتگ کہ وانگ جاھاں بلوچی زبان ءِ استاد دارگ بہ بنت – اکیڈمی ءِ باسکاں اے گپ ءِ سرا زور داتگ کہ بلوچستان ءِ سرکاری کالجاں پہ بلوچی ءِ ھورکیں جاھاں پبلک سروس کمیشن ءِ نیمگ ءَ گچین کرتگیں استاد دارگ بہ بنت داں کہ کالجاں بلوچی وانینگ ءِ کار گھتر بہ بیت –

دیوان ءَ ڈاکٹر بیزن سبا ءَ گوشتگ کہ اکیڈمی ءَ اے سال ءَ پہ بلوچی زبان ءِ ڈیجیٹلائزیشن ءَ یک موبائیل اپیلی کیشن ئے جوڑ کرتگ کہ ایشی ءِ تہ ءَ اکیڈمی ءِ چھاپ کُرتگیں کتاب وانگ بنت۔ ایشی ءَ ابید بلوچستانیات جرنل ءَ دھ کتاب چھاپ ءُ شنگ کرتگ ءُ دگہ دوازدہ کتاب پہ چھاپ ءَ پریس ءَ دیم دیگی انت –

اکیڈمی ءِ دیوان ءَ ھواریں باسکاں کڈن کتگ کہ آ پہ زھگاں وانگی مواد جوڑ بہ کن انت ، دری زبانانی کوٛہنیں ساچشت ماں بلوچی زبان ءَ رجانک کنگ بہ بنت ءُ بلوچی ءِ نامداریں لبزانکی ءُ تاریخی مواداں ماں انگریزی یا دگہ زباناں رجانک کنگ بہ بنت ءُ بلوچی زبان ءِ گالوار ءُ تاریخ ءِ درگت ءَ پولکاری کنگ ءُ کتاب شنگ کنگ بہ بیت –

دیوان ءَ ھواریں باسکاں سر وزیر ءُ بلوچستان اسمبلی ءِ باسکانی دلگوش اے نیمگ ءَ پِرّینتگ کہ آ بلوچی زبان ءَ ھوار بلوچستان ءِ اے دگہ مزنیں زبان براھوئی ءُ پشتو ءِ سرکاری بنداتی وانگ جاھاں وانینگ ءَ گامگیج زورگ ءَ راھبند ٹاھینگ بہ بیت – شست ءُ پنچمی دیوان ءَ باسکاں لوٹ کُتگ کہ گوادر یونیورسٹی ءَ بلوچی ڈیپارٹمنٹ پچ کنگ بہ بیت ءُ ڈیرہ اسماعیل خان یونیورسٹی (گومل) ءَ بلوچی زبان ءِ وانینگ بندات کنگ بہ بیت –

باسکاں بلوچی اکیڈمی ءِ کارانی درگت ءَ باوست کرتگ ءُ گوٛشتگ کہ اکیڈمی ءَ گوستگیں چیزے سالاں پولکاری مراگش کرتگ ، پولکاری ءِ نیمگ ءَ گیشتر دلگوش گور کتگ کہ چہ ایشی ءَ پہ بلوچی زبان ءُ لبزانک ءِ دیمروئی ءَ کمک رسِتگ – ایشی ءَ ابید بلوچی اکیڈمی ءِ جوڑ کرتگیں موبائیل ایپلی کیشن ہم اے کارانی تہ ءَ یک مزنیں گامگیجے –

برجم داشتگیں دیوان ءَ اے کول دیم ءَ آرگ بیتگ کہ بلوچستان ءِ سرکار ءَ ھوار گوں ھمے کار ءِ ادارھاں لوٹ کنگ بیت کہ بلوچستان ءِ کلیں سرکاری بنداتی وانگ جاھاں بلوچی ، پشتو ءُ براھوئی ءِ سرجمی ءَ استاد دارگ بہ بنت ءُ اے زبانانی وانینگ ءِ کار پد ءَ بندات کنگ بہ بیت۔ ریڈیو ، ٹی وی مراگشانی رہبند گھتر کنگ ءَ ابید شنگ کنگ ءِ وھد ھم گیش کنگ بہ بنت – بلوچی زبان ءَ ایپ ایم ریڈیو ءَ مراگش شنگ کنگ بہ بیت –

دیوان ءِ گُڈسر ءَ بلوچی اکیڈمی ءِ سرکماش سنگت رفیق ءَ دیوان ءَ بھر زرتگیں کلیں باسکانی منت گپتگ ءُ گوشتگ کہ بلوچی زبان ، تاریخ ، دودمان ءُ لبزانک ءِ دیمروی ءَ وتی جھداں چد ءُ گیشتر پیلو بہ کن انت –