درملک ءَ نشتگیں بلوچ سیاسی باسک یکجاہ بہ بنت – ماما قدیر بلوچ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ماں شال ءِ پریس کلب ءِ دیم ءَ برجاہ، زھرشانی بنجل ءَ مروچی پنچ ھزار ءُ یک سد ءُ شش روچ سرجم بوتگ انت – مروچی بی ایس او ءِ بنجاھی رھشون صمند بلوچ، کبیر بلوچ، اسرار بلوچ ءُ دگہ مردماں بنجل ءَ اتکگ ءُ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ گوستگیں بازیں ماھے بیت کہ ریاستی ادارھانی سُرپُر ءُ پارلیمانی پاٹیانی درشاناں چہ ھمے گندگ بیت کہ پاکستانی پوج ھمے زوتاں بلوچستان ءِ تہ ءَ مزنیں لشکرکشی ءَ دلمانگ انت – جولائی ماھے بنداتی روچاں سوبائی سرکار ءِ چیردستی ءَ یک مزنیں دیوان ءِ بوتگ کہ اودا بلوچستان ءَ لشکر کشی ءِ شور جنگ بوتگ –

ماما قدیر بلوچ ءَ گوشتگ چوناھا چہ سال دوھزار چار ءَ لشکر کشی ءُ بلوچ ءں چکچینی برجاہ انت بلے اے لشکر کشی بلوچ راجداریں جھد کار ءُ نودربر گلانی بگیری ءَ آؤکیں گچین کاریانی راہ ءَ.تچک کنگ ءِ اشارھے ھم بوت کنت کہ آئی تیاری ءَ پوج ءُ ایف سی کنگ ءَ انت – اگاں پاکستان مالی جاور انچو شر نہ انت کہ آ سرجمیں بلوچستان ءَ یکیں وھد ءَ انچو مزنیں لشکر کشی ءِ بہ کنت بلے چیزے ھست کہ آ چیردیگ بوگ ءَ انت بوت کنت لھتے ھند ءُ دمگ ھاسکر مکران ءُ جھالوان ءَ وتی ٹارگٹ بہ کن انت –

ماما قدیر بلوچ ءَ گوشتگ مروچی بلوچ جھان ءِ ھر کنڈ ءَ کہ نشتگ انت بید چہ سیاسی رھبندانی رِد ءَ بلے راجی زرمبشت ءِ منوگر انت نوں المی ایش انت کہ دری دراھیں بلوچ یکجاہ بہ بنت منی رِد ءَ اے زمہ واری ءَ راستیگیں جھدکارانی انت کہ درساں یکجاہ بہ کن انت ءُ یک مھکمیں رھبندے ءِ رِد ءَ زرمبشت ءَ جھان ءِ تہ ءَ گیشتر مھکم بہ ہن انت پرچاکہ یک شریں وھدے ءِ تہ ءَ جوانیں شور ءُ سلاہ پائدگ مند بنت –

آئی ءَ گوشتگ نوں گپ کہ کئیت مارشت ءَ زبھریں بلوچانی گڈا اشی ءِ ھاتر ءَ شمارا بلوچستان ءَ آھگی انت پاکستان ءِ کپتگیں مالی جاورانی سر ءَ زور دیگی انت چہ مارشت ءَ زبھریں بلوچ ھنچوش ھم گیشتر شمے دربار ءِ چاہ ءُ آپی بنت –