سوڈان ءَ ترندیں جنگ ءُ چوپ، ھورانی دیمپانی، انٹرنیٹ سروس بند

سوڈان ءِ بنجاھی شھر خرطوم ءَ پوج ءُ نیم پوجیانی میان ءَ جنگ ءُ چوپ یک رندے پد ءَ ترندی ءَ برانزگپتگ ءُ چریشی ءِ سبب ءَ انٹرنیٹ سروس بند بیتگ ءُ رھوتی اھوال ھم سستگ اَنت ءُ انسانی ھکانی ادارھاں گیش جاورانی ناگیگی ءِ گمان داتگ-

ھال سرکنوکیں ادارہ اے ایف پی ءَ خرطوم ءَ جاڑیگیں سروس ءِ درور دیان ءَ گوشتگ کہ آدینگ ءِ روچ ءَ تراکانی توار اشکنگ بیتگ اَنت ءُ چریشی ءَ پد انٹرنیٹ ءِ سروس ءُ موبائل سروس بند بیتگ اَنت ءُ آدینگ ءِ روچ ءَ شھر ءِ زرباری دمگ ءَ ھوار ھوات آرمی ھیڈکوارٹر ءِ نزیک ءَ دوت چست بوگ ءَ گندگ بیتگ اَنت-

سورس ءِ رد ءَ پوج ءُ نیم پوجی ادارھانی نیمگ ءَ یک ءِ دومی ءَ اُرشانی وھد ءَ ھرچ دابیں سلاھانی کارمردی بیتگ، ھمے وڑ ءَ دریائے نیل ءِ لمب ءَ ھستیں شھر اومڈرمن ءَ جنگی جھاز ءُ ڈرونز ھم بال ءَ گندگ بیتگ اَنت-

15 اپریل ءَ چہ سوڈان ءِ پوج ءُ نیم پوجیابی میان ءَ جنگ ءُ چوپ برجاہ اِنت – سوڈانی پوج ءِ نیمگ ءَ آرمی چیف عبدالفتاح البرھان ءُ ھمے داب ءَ نیم پوجی ءِ کمانڈ ءُ ھماھی ءِ بیوکیں نائب مھمد ھمداب ڈاجیو کنگ ءَ اِنت-

جنگ ءُ چوپانی وھد ءَ داں انگت ءَ کساس سَے ھزار مردم مرتگ اَنت ایشانی توک ءَ خرطوم ءُ رودراتکی شھراں ترندیں جنگ ءُ چوپ بیتگ اَنت-

میان اُستمان ءَ گوشتگ کہ بنجاھی شھر ءَ دَہ لک ءُ ھپتتاد ھزار مردماں گیش لڈ ءُ بار کتگ-

پرچاکہ اے وھد ءَ برزی جنگ ھم برجاہ اِنت ءُ ٹینک دمک ءُ دراں تران اَنت ءُ اے وھد ءَ گمان ھمے بیت اِنت دزی ءُ دازیانی گمان بوگ ءِ سبب اِنت-

لڈ ءُ بار کرتگیں مردم وتی بنکی اثدری چیزانی واستا انٹرنیٹ ءِ کارمردی ءَ کنگ ءَ اَنت – میان اُستمانی جانسلامتی ءِ اگدودار رک برینن ءَ آدینگ ءِ روچ ءَ گوشتگ کہ بیست ءُ چل ھزار ءَ گیش ءَ مردم وتی ڈیھ ءِ توک ءَ اَنت بلے بے لوگ اَنت ھما دمگاں آ جاڑیگ اَنت اود ءَ مھپوز نہ اَنت ءُ اود ءَ ساز ءُ سامانانی رسگ ھم کم اِنت-

زانگ بہ بیت سعودی عرب ءُ امریکہ ءِ جد ءُ جھداں ھردوکانی میان ءَ جنگ بندی ءِ مسام ھم بیتگ بلے نی ایشی ءِ لگتمالی بوگ ءَ اِنت-