روس ءَ سلاہ بندیں گھگیری: ایشیا ءَ تیل ءِ نھادانی توک ءَ گیشی

روس ءَ نیم پوجی ءِ نام ءَ زانوکیں ویگنر نامیں ٹولی ءِ گھگیری باگی بوگ ءَ پد ایشیا ءِ منڈیاں تیل ءِ نھادانی توک ءَ گیشی گندگ ءَ اتکگ-

برتانیہ ءِ ھال سرکنوکیں روئٹرز ءِ رد ءَ تیل ءِ مزنیں پیداک کنوکیں ڈیھ روس ءَ گوستگیں ھپتگ ءَ ودگ بوتگیں جاورھالانی تہ ءَ سیاسی گر ءُ داری ءَ ابید تیل ءِ سر کنگانی توک ءَ بازیں سانمندی کپتگ اَنت –

یکشمبے ءِ روچ ءَ برینٹ لس تیل ءِ نھاد ءَ نود ءُ پنچ سینٹس یا یک اشاریہ ءَ سَے درسد گیش بیتگ اَنت چریشی ءَ پد یک بیرلے ءِ نھاد ھپتاد ءُ چار اشاریہ ھشتاد ڈالر ءَ داں سر بوتگ-

ھمے داب ءَ امریکہ، روکپتی ٹیکساس انٹرمیڈیٹ ( ڈبلیو ٹی آئی) ءَ لس تیل ءِ نھاد ءَ ھپتاد ءُ چار اشاریہ ءِ چار ڈالر یک بیرلے ءَ گیش بوتگ کہ اے وھد ءُ ھشتاد ءُ ھشت سینٹس ءُ یک اشاریہ ءَ سَے درسد گیشی اتکگ بیتگ-

زانگ بہ بیت گوستگیں ھپتگ ءَ روس ءَ نیم پوجی ءِ نام ءَ زانوک بیتگیں ٹولی ویگنر ءَ روس ءِ پتر ءِ ھلاپ ءَ گھگیری کنگ ءِ جار جتگ بیتگ چریشی ءَ پد سروک ولاددیمیر پوتن ءَ اژدریانی توک ءَ پریس کانفرنس کنان ءَ گوشتگ کہ روس لشکر ءِ ھلاپ ءَ سلاہ چست کنوک سزا دیگ بنت اِنت –

روسی لشکر ءُ نیم پوجی ویگنر ءِ میان ءَ یکشمبے ءِ شپ ءَ مسام بندی بیتگ چریشی ءَ پد ھردوکانی توک ءَ ترس ءِ گمان ود اتگ-

ایشی ءَ پیش ویگنر ءَ ھواریں سلاہ بنداں یوکرین ءَ ھستیں کیمپس ءَ داں ماسکو ءِ نیمگ ءَ پیش گامی کنگ بندات کتگ –

روس ءِ سروک ولادیمیر پوتن ءَ ویگنر ءِ کارمندانی گامگیج راجدروھی گوشان ءَ گوشتگ کہ ایشانی واستا ترندیں سزا بندگ بیت اِنت –

پد ءَ ھمساھگیض ڈیھ بیلاروس ءِ جھداں پد گپ ءُ ترانی بندات بیتگ ءُ روس ءِ نیمگ ءَ ویگنر ءِ سروک ءُ آئی ءَ ھواریں پوجیانی ھلاپ ءَ ترند کشی کنگ ءِ جار واتر زورگ بیتگ –