بلوچستان : تیرگواری ءُ دگہ وئیلانی آسر ءَ شش مردم بیران ، دہ ٹپی بیتگ اَنت

بلوچستان ءِ جتاجتائیں دمگاں بیتگیں وئیلانی آسر ءَ زالبولے ءَ ھوات شش مردم بیران وھدے کہ دہ ٹپی بیتگ اَنت-

گیشیں ھالانی رِد ءَ پنجگور ءِ دمگ پروم کپ ءَ ٹائر ترکگ ءَ چہ تیل کشیں زمباد گاڑی یے چپی بیتگ، گاڑی چپ بوگ ءَ چہ آس چست بوتگ-

ھالانی رِد ءَ وئیل ءَ گرمکان ءِ جھمنندیں یک ورنایے سُتکگ ءُ بیران بیتگ وھدے کہ یکے سک ٹپی بیتگ-

دومی نیمگ ءَ قلعہ سیف اللہ ءَ گاڑی ءِ چپ بوگ ءِ سبب ءَ گاڑی ءَ سوار یک مردمے بیران ءُ سے ٹپی بیتگ اَنت- ٹپی دوا درمان کنگ ءِ ھاتر ءَ دمگی نادُراھجاہ ءَ برتگ-

ھمے وڑ لسبیلہ ءِ دمگ بیلہ بلوچی گوٹھ ءَ لوگے ءِ دیوال کپگ ءَ چہ زالبولے بیران وھدے کہ دگہ یک زالبولے ٹپی بیتگ- اود ءَ ٹپی بیتگیں زالبول دوا درمان کنگ ءَ پد کراچی ءَ برگ بیتگ وھدے کہ بیران بیتگیں زالبول لاش گیشیں چار ءُ ٹپاس ءَ پد کھول ءَ داتگ-

ھمے وڑ کلات ءِ دمگ منگچر ءَ زرد غلام جان ءَ لانگو ٹَک ءِ دو ٹولیانی میان ءَ ٹَکی جنگ ءُ چوپ ءَ تیرگواری ءِ آسر ءَ دو مردم بیران سے زالبولاں ھوار پنچ مردم ٹپی بیتگ اَنت-

دومی نیمگ ءَ گوستگیں شپ ءَ شال ءِ دمگ سریاب ءَ ناشناسیں مردمانی تیرگواری ءَ چہ میر عابد بادینی نامیں مردمے بیران بیتگ-