بیگواھیں مردمانی یل کنگ ءِ ھاتر ءَ جوڈ کنگ بوتگیں کمیشن پراڈے

پاکستان ءِ نامداریں اھوالکار حامد میر ءَ ماں چاگردی ترامجاہ ٹوئیٹر ءَ بیگواھیں راشد حسین مات ءِ پہ بیگواھیں مردمانی کمیشن ءِ درگت ءَ داتگیں تامر ءِ سر ءَ نبشتگ کہ سال دوھزار یانزدہ ءَ بیگواھیں مردمانی یل کنائینگ ءِ ھاتر ءَ جسٹس (ر) جاوید اقبال ءِ سروکی ءَ جوڈ کنگ بوتگیں کمیشن پراڈیں کمیشنے اشی ءِ بائیکاٹ کنگ لوٹیت –

آئی ءَ دیمتر ءَ نبشتگ کہ پرچاکہ ایش جیڑھاں گیشگیوار نہ کنت بلکنہ اے جیڑھانی بھرے جوڈ بوتگ – اے کمیشن ءِ مول مراد بس ھمیش انت کہ ریاستی ادارھانی مردم ریٹائری ءَ پد ھم کار ءَ دارگ بہ بنت –

زانگ بہ بیت بلوچستان ءَ زورانسری آوار جنیانی درگت ءَ جوڈ کنگ بوتگیں کمیشن ءِ جج ءَ شنوائی ءِ میان ءَ بیگواھیں مردمانی کھولانی گوم ءَ در انسانی رویش داشتگ –

ھمے زوتاں اے درگت ءَ ماں چاگردی ترامجاھاں بیگواھیں بلوچ باسک راشد حسین گھار فریدہ ءَ بلوچ ءَ گوشتگ کہ گوستگیں روچ ءَ ماں شال ءَ بیگواھیں مردمانی کمیشن ءَ زورانسری آوار جنگ بوتگیں آئی ءِ برات ءِ درگت ءَ آئی ءِ مات ءِ پیشی بوتگ بلے پدا ھم کمیشن ءِ جج فضل الرحمان ءَ اے میان ءَ کیس ءِ گوشدارگ ءِ بدل ءَ آئی مات ءِ گوم ءَ در کانودی ءُ در آمیدگسی رویش داشتگ ءُ آ گوشنداشتگ –

آئی ءَ گوشتگ کہ کمیشن ءِ جج فضل الرحمان ءَ راشد حسین ءِ کیس ءَ باز رند ءَ آئی ایس آئی والا آمیدگس ءَ لوٹاریں اِتگ انت ءُ منی مات بیھار داتگ –

زانگ بہ بیت چدوپیسر ھم بیگواھیں مردمانی کمیشن ءِ گوں بیگواھیں مردمانی کھولاں گوں اے وڈیں رویش دارگ ءِ رپورٹ اتکگ انت کہ اودا بلوچ زالبول ترسینگ بوتگ انت ءُ اے ھم گوشگ بوتگ انت کہ وتی دیم ءَ چادر ءَ دور بہ کن ات –

بلے پدا ھم اے وئیلانی رپورٹ بوگ ءَ ابید ھم ھچ وڈیں گامگیج زورگ نہ بوتگ –