دالبندین ءَ آرت، شکر ءُ دگہ شئے آنی وتگڑیں نیستی ءِ بگیرءَ زھرشانی کنگ بیتگ۔
تیل کمیٹی،انجمن تاجران ءِ بگیر ءَ دالبندین بازار ءَ یک زھرشانی روانک ءِ کشگ بیتگ، درانگازی کنوکاں پلے کارڈز دستءَ بیتگ اَنت ءُ جتاھیں دگانی سرءَ گردان ءَ پد بنجاھی چارراہ ءِ مُچ بیتگ اَنت۔
اے نیام ءَ درانگازی کنوکاں وتی لوٹانی ھق ءَ اوگام جتگ، زھرشانی روانک ءِ بھرزیروکاں گوں تحریک نوجوانان اتحاد دالبندین ءِ چئیرمین حماد اللہ، جنرل سیکرٹری عطاءالرحمن، لطیف ریکی، شمس ناروئی ،انجمن تاجران دالبندین ءِ جنرل سیکرٹری ٹکری نوراحمد ساسولی ءُ دگہ ترانکاراں تران کنان ءَ گُشتگ کہ یک ھاسیں مافیاء ءِ دالبندین بازار ءِ تہءَ آرت ءُ شکر ءِ نیستی ودی کنگ ءَ اَنت کہ اِشاں دمگی واکداراں ھوار انجمن تاجران دالبندین ءِ سرجمی ءَ کمک ءُ مستری ھست اِنت۔
ترانکاراں گُشتگ کہ اپسوزءَ گوں گُشگ کپیت کہ نزیکیں دمگانی تہءَ آرت ءِ 50 کلو ءِ گونی 6500 روپیہ ءَ اِنت بلے دالبندین ءَ ھمے آرت 11500 ءَ بگر داں 12000 ءَ بھا کنگ بئیگ ءَ اِنت ھمے پئیم سرجمیں پرگینگ ءَ شکر 170 روپیہ یک کلو ءِ ھساب ءَ بھر بئیگ ءَ اِنت وھدیکہ دالبندین ءَ 200روپیہ ءَ بھا بئیگ ءَ اِنت اے کجام اِنساپ اِنت؟
آیاں گُشتگ کہ مزنیں شھراں چہ ٹرکانی ھساب ءَ آرت ءُ شکر دالبندین ءَ آرگ بئینت بلے ھاسیں مافی گِداماں پُر کنگ ءُ اوگانستان ءَ دیم دئیگ ءَ اِنت کہ اشی سرءَ واکدار ءُ انجمن تاجران دالبندین ءَ چم بستگ اَنت ءُ اِشی گرانی ءَ مھلوک سگگ ءَ اِنت دالبندین ءِ مھلوک ءِ سرءَ وتگڑیں گرانی لڈگ بیتگ لس مھلوک ءِ کس ھال گروگ نیست اِنتُ ءُ مھلوک گرانی ءِ سوب ءَ سک تنگ اَنت پرائس کنٹرول کمیٹی ءِ کارکرد سک باز اپسوزیگی اِنت۔
نوجوانان اتحاد دالبندین ءِ رھشوناں گُشتگ کہ دالبندین شھر ءَ ودوکیں آرت ءُ شکر ءِ نیستی ءِ ذمہ وارانی تہءَ انجمن تاجران دالبندین پئیمیں گل ھم ھوار اَنت کہ نپ وروکیں دکاندارانی مستری ءَ کنگ ءَ اِنت۔ وتی گلءِ جیڑھانی گیوار کنگ ءَ ابید لس مھلوکانی سرءَ گرانی کنگ ءِ سوب جوڑ بئیگ ءَ اِنت ادءِ مھلوک چُشیں مپاد دوست ءُ بندیں کوٹیانی تہءَ پیسلہ کنوکیں کجام ھم گل ءَ برداش نہ کن اَنت۔