کراچی ءَ عبدالحمید زھری ءِ زورانسری آوار جنی ءِ بگیری ءَ زھرشانی

چہ کراچی ءَ سندھ پولیس ءُ پاکستانی چیریں ادارھانی دست ءَ زورانسری آوار جنگ بوتگیں عبدالحمید زھری ءِ آوار جنی ءَ دو سال سرجم بوتگ انت، چہ کھول، سیاسی ءُ چاگردی باسکانی نیمگ ءَ کراچی ءَ زھرشانی کنگ بوتگ –

بیگواھیں عبدالحمید زھری ءِ کھول ءِ نیمگ ءَ مروچی یکشمبے ءِ روچ ءَ کراچی آرٹ کونسل ءَ بگر تاں کراچی پریس کلب ءَ زھرشانی روانک ءِ کشگ بوتگ کہ اودا بلوچ ءُ سندھی سیاسی ءُ نودربر گلانی باسکاں ھوار ھر تک ءُ پھناتاں سیادی داروکیں مردماں بھر زرتگ ءُ عبدالحمید زھری ءُ ایندگہ بیگواھیں مردمانی یل کنگ ءِ لوٹ کتگ –

زھرشانی ءَ تران کنان ءَ عبدالحمید زھری ءِ زھگ سعیدہ حمید ءَ گوشتگ کہ دو سال پرگوستگ انت ھمے ودار ءَ مئے پت واتر کئیت بلے اے دراجیں وھد ءِ پرگوزگ ءَ ابید ھم مارا تنی وھدی سرپدی نیست کہ مئے پت کجا انت؟ ءُ کجام کتکاریانی سوب ءَ بیگواہ کنگ بوتگ – ھمک روچی زھرشانی ءُ آمیدگسانی روگ ءَ ابید ھم مارا انساپ دیگ بوگ ءَ نہ انت –

“دو سالانی ودار دردیگ بوتگ انت ق ما نہ زانیں مئے پت کجام ھال ءِ تہ ءَ انت – آ یک پُرایمنیں شھری ءِ بوتگ – چہ ریاست ءُ آئی ءِ آمیدگساں منی جست ایش انت کہ منی پت کدی یل کنگ بیت –

سعیدہ حمید ءَ گوشتگ کہ دو سال ساری منی پت عبدالحمید زھری چہ کراچی ءَ مئے چمانی دیم ءَ سندھ پولیس ءِ ھمراھی ءَ آوار جنگ بوتگ – پت ءِ آوار جنی ءَ پد مئے سرجمیں زند سانمند بوتگ وھدیکہ بیگواھیں مردمانی کھول زھرشانی کن انت گڈا آوار جنی ءَ ھواریں پولیس آھانی دیم ءِ اڈاند جوڈ بیت –

زانگ بہ بیت ھزدار ءِ دمگ زھری ءِ جھمنند عبدالحمید زھری دھ اپریل سال دوھزار بیست ءُ یک ءَ چہ کراچی ءَ زورانسری آوار جنگ ءُ بیگواہ کنگ بوتگ – عبدالحمید ءِ کھول ءِ رِد ءَ آ چیریں ادارھانی کارمنداں سندھ پولیس ءِ ھمراھی ءَ چہ گلستان جوھر کراچی ءَ جند ءِ گس ءَ دزگیر کتگ ءُ گوں وت برتگ –

عبدالحمید ءِ زھگ سعیدہ حمید ءَ گوستگیں دو سال انت کہ وتی پت ءِ ھاتر ءَ زھرشانی کنگ ءَ انت – سعیدہ حمید ءَ چہ سندھ ءِ سرکار ءُ انسانی ھکانی ادارھاں گوں لوٹ کتگ کہ پت ءِ یل کنائینگ ءَ وتی کرد ءَ پیلو بہ کن انت –