بلوچ راج ءِ تہ ءَ زُبان دوست؟
نبشتہ کار: ھانی بلوچ
دی بلوچستان پوسٹ
گْوش اَنت کہ زُبان ھر راج ءِ بُندری پجار اِنت، زُبان بھر ءُ بانگیں راجاں یکجاہ ءُ یکمُشت کنت پمیشکا بلوچ راج ءِ زُبانزانت واجہ ناگُمان بلوچ گْوش ایت ’داں کہ کَسے زُبان دوست مہ بیت آ راجدوست بیت نہ کنت‘-
بزانکہ ھمے زُبان اِنت کہ راج ءِ لس مھلوک ءَ نزیک کار ایت ءُ راج ءِ تہ ءَ تباکی ءُ ھمدستی یے ودی کنت۔ بے زُبان دوستی ءَ تو راجدوستے بیت نہ کن ئے ءُ بے زُبان ءَ ترا کَس پجّانیار ایت کہ تو کَے ئے؟ پمیشکا گْوش اَنت کہ زُبان زِندگیں راجانی پجّار اِنت ءُ زُبان ءِ گاری سرجمیں راج ءِ گار ءُ بیگواھی اِنت۔ بلے ما گِندگ ءَ ایں کہ بلوچ راج ءِ تہ ءَ زُبان دوستی نیست، مرچاں ماں شوشل میڈیا ءَ ھر بلوچ وانِندھے راجی زُبان براھوئی ءُ بلوچی ءَ ڈالچار کنان ءَ وتی پوسٹ ءُ نبشتانکاں ماں اردو ءُ پارسی ءَ نبیسّ ایت۔ زاناں شُما سرپد اِت پرچا؟ ما پرچا ھمے زورگریں دُژمن ءِ زُباناں ءَ وان ایں ءُ نبیسّ ایں کہ ھمے زُباناں مئے جِند ءِ راجی زُباناں تاوان داتگ داں روچ مرچیگ ءَ یکشل ءَ مئے زُبانان تاوان دیگ ءَ اَنت؟ پرچا اردو مئے سر ءَ ازاب بوتگ اَنت؟-
پرچا کہ مارا چہ در کَسانی ءَ ماں وانگجاھاں بلوچی وانینگ نہ بوگ ءَ اِنت چمیشکا راج ءِ تہ ءَ راجدوستی ءُ زُبان دوستی ودی نہ بوتگ۔ مارا ماں وانگجاھاں دُژمن ءِ وزبت، ستاشانی ءُ آئی ءِ دْروگیں کِسھاں وانینگ بوگ ءَ اَنت گُڑا ما چون زُبان دوست ءُ راجدوست بَہ ایں؟ ما چون وتی گُلامی ءُ ایردستی ءَ مار ایں؟-
گِند ئے ما وَ مجگی گُلام جوڑ بوتگ ایں۔ انی ما بچار ایں کہ بلوچ راج یک گلامیں راجے پمیشکا بلوچی ماں وانگجاھاں وانینگ نہ بیت۔ البت ما دلپروش مہ بَہ ایں، اشتاپ مہ کن ایں پرچاکہ ما دْراہ جْوان سرپد ایں کہ مرچیگیں زمانگ انٹرنٹ ءِ زمانگ اِنت۔ گُڑا باید اِنت ما مرچیگیں انٹرنٹ ءِ پیسبوکْ ءُ وٹس ایپی وانگجاھاں ھوار بَہ این ءُ وتی دزھُورکی ءَ وتی راجی زُبان ءِ وانگ ءُ راست نبیسّگ ءَ ھیل بکن ایں۔ ما اول بلوچی دَرونت ءُ زُبان دوستی نبشتانکاں وان ایں، بلوچی زُبان، گالوار، بُنرھبند(گرائمر) ءُ نبشتہ رھبند ءَ سرپد بوگ ءِ جُھد بہ کن ایں۔
چوناھا شُما وت بلوچ اِت پمیشکا اگاں شما ماں وانگجاھاں پارسی ءُ ھِندی گوں اربی سْیاھگ ءَ ونتگ گُڑا شُما بلوچی ونت کن اِت۔ گِند ئے بلوچی وانگ ءُ سرپد بوگ اِے ھم پہ ما گنج اِنت۔ گُڑا بلوچی دَرونتاں وانان ءَ مئے یک ھپتگے ءِ تہ ءَ وتی راجی زُبان ءِ راست نبیسّگ ءَ ھیل کُت کن ایں۔ گُڑا گوں شما دزبندی اِنت کہ مُدام وتی شوشل میڈیائی گپ ءُ رپی کلوہ، پوسٹ ءُ نبشتانکاں ماں بلوچی ءَ نبیسّ اِت بِل اِت رَد بہ بنت، چہ دَرونتانی وانگ ءَ ما کم کم ءَ دربر ایں ءُ مئے رَدی گار ءُ ھلاس بنت۔ گِند ئے انی مارا مُدام وتی جِند ءِ زُباناں راجدوستی، آشوبی ءُ گُلامی ءِ ھلاپ ءَ نبشتانک ءُ شائِری نبیسّگی اِنت کہ راج ءِ تہ ءَ دُژمن ءِ سر ءَ زھر ءُ نپرت بہ بیت۔ پرچا کہ جِند ءِ زُبان ءَ وانگ ءُ نبیسّگ راجانی تہ ءَ زُبان دوستی ءُ راجدوستی ودی کنت۔
سلامت بات اِت، بلوچی وت بوان اِت ءُ وٹس ایپی وانگجاھاں اڈ کنان ءَ راج ءَ ھم بلوچی بوانین اِت۔ شالا شما ھر کس راجی زُبان ءِ بلاھیں جُھدکار، نبشتہ کار ءُ شائِر جوڑ بہ بات اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔