کلات ءَ لشمینیا ءِ نادراھی ءِ تیزی ءَ گوں شنگ بوان انت

بلوچستان ءِ دمگ کلات ءَ لشمینیا ءِ نادراھی سک باز گیش بوتگ، ھر اُمر ءِ مردم اے نادراھی ءِ آماچ بوان انت –

دمگی جانسلامتی ءِ اپسر ڈاکٹر نصراللہ لانگو ءِ رِد ءَ شش سد ءَ گیش کیس نبشتہ کنگ بوتگ – نادراھی ءِ آماچ بوتگیں مردمانی گیش بوگ ءِ سوب ءَ انجیکشن ھلاس بوتگ انت –

دمگی مردماں گیشتر انجیکشن ءِ لوٹ کتگ –

گیشیں ھالانی رِد ءَ ڈاکٹر نصراللہ ءَ اھوالکاراں گوں تران کنان ءَ گوشتگ کہ گوستگیں سال ءِ ھئور ھارانی آیگ ءَ پد سینڈ فلائی ورگ ءَ پد لشمینیا ءِ نادراھی تیزی ءَ گوں شنگ بوتگ اے وھدی مئے گور ءَ شش سد ءَ گیش نادراھ ھست انت –

ھپتاد ءَ گیش نادراھ بیست یا سِی انجیکشن جتگ ءُ آھانی نادراھی کنٹرول کتگ ءُ آ پارگ کتگ انت –

یونیسیف ڈبلیو ایچ او ءَ مئے کمک کتگ ءُ دوھزار ءُ پنچ سد انجیکشن مارا داتگ بلے نادراھی ءِ آماچ بوتگیں مردمانی کچ ھمینچو باز انت کہ بس نہ بنت – یک نادراھی ءَ لشمینیا ءِ بیست یا سِی انجیکشن لگ ایت – اے نادراھی ءِ گر ءُدار ءِ ھاتر ءَ آھاں چہ جانسلامتی ءِ واکدار ءُ ڈونرزاں گوں لوٹ کتگ آ لشمینیا ءَ چدوگیشتر شنگ بوگ ءَ دارگ ءَ پہ مئے کمک ءَ بہ کن انت اگاں ناں گڈا اے نادراھی ایندگہ دمگاں ھم شنگ بوت کنت –