سرباز: تیل باپار کنوکیں چار کس دگ ءِ وئیل ءُ بیران ءُ زدگ بیتگ اَنت

گوستگیں روچ ءَ دو تیل کشیں گاڑی وئیل ءِ آماچ بیتگ اَنت ءُ چریشی ءَ دو کس بیران ءُ دو زدگ بیتگ اَنت-

گیشیں ھالانی رد ءَ روکپتی بلوچستان ءِ دمگ سرباز ءُ پھرہ ءِ راہ ءَ کھیری ءِ ھند ءَ تیل کشیں گاڑی وئیل ءِ آماچ بیتگ اَنت ءُ چریشی ءَ چہ گاڑیاں آس کپتگ ءُ گاڑی ستکگ ءُ پُر بیتگ ءُ گاڑیاں سواریں دو کس بیران ءُ دو زدگ بیتگ اَنت-

زدگ بیتگیں مردم ایرانشھر ءَ نادراہ جاہ ءَ برگ بیتگ اَنت کہ اود ءَ آیانی جاور ناگیگ گوشگ بوگ ءَ اِنت-

بیران بیتگیں مردمانی پجار داں انگت ءَ دیم ءَ نیتکگ اَنت ءُ نانکہ آیانی بارو ءَ انتزامیہ ءِ نیمگ ءَ دگہ گپ دیم ءَ اتکگ بیتگ اَنت-

روکپتی بلوچستان ءَ تیل کشی مرگ ارجانیں کارے ءِ دروشم ءَ پجارگ بیت اِنت کہ اود ءَ ھمک ھپتگ چار ءُ پنچ کس مرگ ءِ ارجان بنت ءُ مر اَنت –

روکپتی بلوچستان ءَ روزگار ءِ ھاسیں گر ءُ داری ءِ نہ بوگ ءَ اود ءَ گیشتریں مھلوک ءِ زری مال سیمسرانی سر ءَ تیل کشی اِنت بلے اے تیل کشی ھم آیاں آسودگی ءَ نہ رس ایت یا اود ءَ تیل کش دگ ءِ وئیل آماچ بنت ءُ مر اَنت یا اود ءَ ایرانی پھزدارانی تیرانی آماچ بنت ءُ مر اَنت-

گوستگیں ھپتگ ءَ ھم ھمے وڑ ءَ زر آباد ءَ یک تیل کشیں ورنایے دگ ءِ وئیل ءِ آماچ بیتگ ات ءُ چریشی ءَ چہ آ بیران بیتگ ات، چد ءُ پیسر چھبار ءَ ایرانی واکدارانی تیرگواری ءَ ڈرائیور ءِ دست ءَ گاڑی لگوشتگ ات ءُ گاڑی کپتگ ات ءُ گاڑی ءَ آس کپگ ءِ سبب ءَ گاڑی ءِ ڈرائیور بیران بیتگ ات-