آزاتی ءَ گوں ھیالانی درشان کنگ ءِ بنگپ ءِ سر ءَ تربت ءَ مراگش

انسانی ھکانی کمیشن پاکستان ءِ چیردستی ءَ “مکران ءَ آزاتی ءَ گوں وتی ھیالانی درشان کنگ ءِ جاور ھال ” بنگپ ءِ سر ءَ ماں تربت پریس کلب ءَ مراگش ءِ برجم دارگ بوتگ، کہ اودا سیاسی، چاگردی، لبزانکی ءُ دینی مردماں مزنیں کچے ءَ بھر زرتگ –

ایچ آر سی پی ءِ ریجنل کوآرڈینیٹر ءُ نامداریں لبزانت پروفیسر غنی پرواز ءَ مراگش ءَ تران کنان ءَ گوشتگ کہ آزاتی ءَ گوں ھیالانی درشان کنگ ءِ مول مراد زبان، نبشتانک، گوشتانک ءُ آرٹ ءِ دروشم ءَ وتی ھیالاں اخلاقی دائرہ ءِ تہ ءَ درشان کنگ، اشی ءِ شری ایش انت کہ یک ءُ دومی ءِ پگر ءُ ھیال ءِ زانگ ءَ کمک رسیت، اشی وتی گوستانک ءِ ھست، گوستگیں زمانگ ءَ آزاتی ءَ گوں وتی ھیالانی درشان کنگ ءِ سر ءَ ھچ وڈیں بندش نہ بوتگ –

آئی ءَ گوشتگ کہ گلام دارگ ءِ چاگرد ءِ جوڈ کنگ ءَ پد اشی ءِ سر ءَ بندش جنگ بوتگ، ھاکماں لس مردمانی درشان ءِ سر ءَ بندش جتگ بلے پدا ھم بازیں وھداں اوپار کنگ ءَ بد چاگرد ءَ گھیگری کتگ وتی آزاتی ءِ ھاتر ءَ دیمھونی دیگ ءِ دراجیں درچ ءِ بندات کتگ ، اسپارٹکس، سقراط، برونو، منصور حلاج، جون آف آرک، قرہ العین، ابراہیم لنکن، مہاتما گاندھی، اندرا گاندھی، نوروز خان، لالا عثمان کاکڑ ءِ وڈیں پھتویں مردماں وتی جانانی دیمھونی داتگ –

آئی ءَ گوشتگ کہ پاکستان ءِ تہ ءَ بس یک سالے ءِ میان ءَچِل ءُ شش اھوالکار شھید کنگ بوتگ، ھژدہ زدگ کنگ بوتگ ءُ چار بیگواہ کنگ بوتگ انت ءُ اے جنگ ھنگت برجاہ انت، دیمروئی کنوک ءُ زانتکاریں چاگرداں چہ اے دیمھونیاں بازیں دیمروئی ءِ کتگ بلے ھما جاہ ءَ کہ دیمروئی گام سست بوتگ انت اود ءِ جاور ھنگت ھما انت ھچ شر نہ بوتگ انت کہ آھانی تہ ءَ پاکستان ھم ھوار انت – یورپ ءُ امریکہ ءَ بگیر ایشیا ءِ تہ ءَ ھم بازیں ڈیھاں چہ ایشی ءَ پائدگ چست کتگ ءُ سیکولر جمہوری نزام جوڈ کتگ ءُ سیاسی، چاگردی ءُ دودمان ءَ دیمروئی کتگ –

بی این پی عوامی ءِ بنجاھی رھشون خان محمد جان گچکی ءُ سوشل ورکر ڈاکٹر سمی بلوچ ءَ گوشتگ کہ مئے ملک ءِ تہ ءَ آزاتی بس یک نامے، اے وھدی کہ اھوالکاری ھما جاورانی تہ ءَ انت ھچبر نہ بوتگ، کانود ءِ سھارہ زورگ بوتگ ءُ ٹی وی ءُ رسانکدرانی سر ءَ بندش جنگ بوتگ، بازیں اھوالکار ءِ بندیگ انت وھدیکہ پوجی زوراکی ءِ وھد ءَ اھوالکار جنگ بوتگ انت، چہ تربت ءَ رزاق گُل ءُ الیاس نظر شھید کنگ بوتگ انت کہ آ اھوالکار بوتگ انت –

ڈپٹی ڈائریکٹر سوشل ویلفئیر قدیر لقمان ءَ تران کنان ءَ گوشتگ کہ برتانیہ ءِ کالونی ھیسیت ءَ ھاکمانی بگیری ءَ درشان دیگ بندش بوتگ، مروچی ھم جھان ءِ تہ ءَ آزاتی مھدود انت انسان ءَ اے ھک نیست کہ ھرچی آئی ءِ دل ءَ کئیت دومی ءِ دلچل بہ کنت – ھک ءُ پرز ءِ میان ءَ ھما لکیر ھست انت آ پھمگ بہ بیت ءُ وتی ھک کارمرز کنگ بہ بیت –

چاگردی باسک شگراللہ یوسف ءَ ھوار مکران بار ایسوسیشن ءِ رھشون رستم جان گچکی، ماجد صمد، عبدالمجید ایڈوکیٹ دشتی ءَ وتی ھیال درشان کتگ ءُ گوشتگ کہ ھر وھد ءَ ھر چاگرد ءِ تہ ءَ مردماں وتی ھیالانی درشان کنگ ءَ اڈاند یا دلسیاھیانی دیمپانی کنگ کپیت گڈا انسانی ھک ءُ چاگردی زانت مھدود بیت، اودا پریس سلف سنسر شپ ءِ جنگ ءَ لاچاری بیت –

شگراللہ ءَ گوشتگ کہ مکران ءَ انسانی ھک ءُ آزاتی ءَ گوں ھیالانی درشان کنگ ءِ بندش وشیں گپ ءِ نہ انت –