بلوچستان ءِ دمگ ھرنائی، کولواہ ءُ پنجگور ءَ پاکستانی پوج ءِ بنجل، مڈی بروکیں گاڑی ءُ چوکی ءِ سرءَ دستی بمب اُرش ءِ زمہ واری بلوچ سلاہ بندیں آجوئی لوٹوکیں گل بلوچ لبریشن آرمی ءُ بلوچستان لبریشن فرنٹ ءَ زرتگ اَنت۔
بلوچ لبریشن آرمی ءِ جارکش جیئند بلوچ ءَ وتی شنگ کُتگیں درشانے تہءَ گُشتگ کہ بی ایل اے ءِ سرمچاراں دو جتاھیں اُرشانی تہءَ کولواہ ءَ قوضہ گیریں پاکستانی پوج ءِ بنجل ءُ ھرنائی ءَ مڈی بروکیں گاڑی نشانگ کُتگ، کہ اِشانی تہءَ دژمن ءِ سئے کارندہ ءُ گاڑی تباہ بیتگ۔
آئی ءَ سرجمیں اھوال دیان ءَ گُشتگ کہ بی ایل اے ءِ سرمچاراں مروچی سھب ءَ ادار پنچ ءِ نزیک ءَ کیچ ءِ ھند کولواہ ءَ رودکان ءَ ‘گٹ ءِ دپ’ ءِ ھند ءَ قوضہ گیریں پاکستانی پوج ءِ بنجل ءِ سرءَ دو نیمگ ءَ چہ اُرش کُتگ، پانزدہ دمان ءَ برجاھیں اَے اُرش ءِ تہءَ سرمچاراں راکٹ لانچر ءُ دگہ مزنیں سلاہ کارمرز کُتگ اَنت، کہ چریشی ءَ سئے دژمنیں کارندہ ھما دمان ءَ مُرتگ اَنت وھدیکہ بازینے ٹپی ھم بیتگ۔
“اُرش ءَ پد زورگیریں پوج ءَ ھمے دمگءَ لس آبادی ءِ سرءَ چم مُچیں تیر گواری کُتگ، البت بلوچ سرمچار مھکمیں شوربندیانی ردءَ وتی پھازیتگیں ھنداں سر بیتگ اَنت۔”
جیئند بلوچ ءَ دیمتر ءَ گُشتگ کہ دومی اُرش سرمچاراں مروچی سھب ءَ ادار نھ ءِ نزیک ءَ ھرنائی ءِ ھنکین شاہرگ ءَ ‘چپر لیٹ’ ءِ ھندءَ قوضہ گیریں پاکستانی پوج ءِ ھاترءَ اڈ بیوکیں یک پوسٹے ءِ ھاترءَ مڈی بروکیں ٹریکٹر آئی ای ڈی ءِ تراک ءَ نشانگ کُتگ، کہ اِشی آسر ءَ ٹریکٹر تباہ بیتگ۔
آئی ءَ گُشتگ کہ بلوچ لبریشن آرمی اے اُرشانی زمہ واریاں من اِیت۔ ما اے اھد ءَ نوک کنیں کہ دژمنیں پوجءِ سرجمی ءَ در آیگ ءَ داں مئے اُرش برجاہ مان اَنت۔
دومی نیمگ ءَ بلوچستان لبریشن فرنٹ ءِ جارکش میجر گھرام بلوچ ءَ رسانکدرءَ شنگ کُتگیں درشانے تہءَ گُشتگ کہ بی ایل ایف ءِ سرمچاراں پنجگور ءِ قلم چوک ءِ سرءَ بستگیں پوجی چوکی ءِ سرءَ دستی بمب ءَ گوں اُرش کُتگ۔ سرمچاراں 13 مارچ دو شمبے ءِ شپ ءِ ادار ھشت ءُ بیست دمان ءَ قلم چوک ءِ سرءَ بستگیں پوجی چوکی ءِ سرءَ دستی بمب دور داتگ کہ پوجی کارندھانی نیام ءَ کپتگ کہ چریشی ءَ آودہ جریدگیں پوجی کارندہ ٹپی بیتگ اَنت۔
جارکش ءَ گُشتگ کہ بلوچستان لبریشن فرنٹ اے اُرش ءِ زمہ واری ءَ من اِیت۔ زور گپتگیں بلوچستان ءِ آجوئی ءَ داں قوضہ گیریں دژمنیں لشکریانی سرءَ اُرش برجاہ مان اَنت۔