زاھد بلوچ ءِ نُھ سالاں بیگواھی، میان استمانی ادارھانی ھست بوگ ءِ سر ءَ بازیں جست ءِ ودی کنت – بی ایس او آزاد

بلوچ نودربر گل آزاد (BSO_A)ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ مروچیگ ءَ چہ نُھ سال ساری گل ءِ گوستگیں سرکماش زاھد بلوچ چہ شال ءَ زورانسری آوار جنگ ءُ بیگواہ کنگ بوتگ، میان استمانی انسانی ھکانی ادارھاں گوں دزبندی ءُ بازیں زھرشانیاں ابید ھم زاھد بلوچ روچ مرچی پاکستان ءِ زندانانی تہ ءَ ازیت سگگ انت –

جارکش ءَ گوشتگ کہ زاھد بلوچ ءِ بازیں وھداں اے وڈ زورانسری آوار جنی ءَ پد بیگواھی ءُ آئی ءِ یل نہ کنگ انسانی ھکانی ادارہ ءُ میان استمانی گلانی گیر زمہ داری ءِ کرد ءَ پیش داریت –

آئی ءَ گوشتگ کہ زاھد بلوچ ءِ زورانسری آوار جنی ءِ بگیری ءَ گل ءِ نیمگ ءَ سرجمیں بلوچستان ءَ ھوار دگہ ڈیھاں ھم زھرشانی کنگ بوتگ ءُ ھمے میان ءَ ترندیں گامگیج زورگ بوتگ ءُ شد کشیں زھرشانی ھم نشتگ ایں کہ پدا انسانی ھکانی میان استمانی گلانی باور کنائینگ ءَ پد ھلاس کنگ بوتگ بلے نُھ سالانی گوزگ ءَ پد ھم میان استمانی انسانی ھکانی گلانی نیمگ ءَ ھچ وڈیں گامگیج نہ زورگ ءَ زاھد بلوچ یل کنائینگ ءَ وتی کرد پیلو نہ کنگ انسانی ھکانی ھست بوگ ءِ سر ءَ بازیں جست ءِ ودی کنت – زاھد بلوچ ءِ زورانسری آوار جنی ءِ نُھ سال گوزگ ابید آئی ءِ ھچ وڈیں ھال اھوال نیستی ءِ سوب ءَ آئی ءِ کھول بازیں ازیتانی آماچ انت –

آئی ءَ دیمتر ءَ گوشتگ کہ زاھد بلوچ یک پُرایمنیں راجداریں جھدکار یے، بلوچ نودربر گل آزاد ءِ پلیٹ فارم ءِ سر ءَ بلوچ نودربرانی رھشونی ءَ کنگ ءَ بوتگ – پاکستانی ریاست ءَ سرجمیں بلوچستان ءَ راجکاری کارانی سر ءَ بندش جتگ پاکستانی پوج ءَ ھزارانی کچ ءَ راجداریں باسک آوار جتگ ءُ بیگواہ کتگ انت وھدیکہ سدانی کچ ءَ باسکانی ژانگولیں جون چگل داتگ انت – پاکستانی پوج ءَ گل ءِ گوستگیں کمک سرکماش زاکر بلوچ ھم زورانسری آوار جتگ ءُ بیگواہ کتگ کہ آئی ءَ چاردہ سال پرگوستگ انت کہ ھنگت بیگواہ انت، ھمے وڈ گل ءِ گوستگیں بنجاھی انفارمیشن سکیریٹری شبیر بلوچ ءَ ھوار دگہ سدانی کچ ءَ راجداریں باسک زورانسری آوار جتگ ءُ بیگواہ کتگ انت کہ ھنگت پاکستان ءِ زندانانی تہ ءَ بندیگ انت –

گل ءِ جارکش ءَ وتی درشان ءِ گڈسر ءَ گوشتگ کہ میان استمانی انسانی ھکانی ادارہ وتی کتگیں گپانی سر ءَ بہ اوشت انت ءُ زاھد بلوچ ءِ زورانسری آوار جنی ءِ بگیری ءَ وتی کرد ءَ پیلو بہ کن انت ءُ زاھد بلوچ ءَ ھوار ھزاراں باسکانی یل کنائینگ ءَ پاکستانی ریاست ءِ سر ءَ زور بہ دئینت – جارکش ءَ گوشتگ کہ بلوچ نودربر گل آزاد ھژدہ مارچ دوھزار بیست ءُ سَے زاھد بلوچ ءِ زورانسری آوار جنی ءِ بگیری ءُ آئی ءِ یل کنگ ءِ ھاتر ءَ SaveZahidBaloch# ھیش ٹیگ ءِ سر ءَ چاگردی ترامجاھاں کمپئین کنت، ما چہ درسیں آجوئی لوٹوکیں سیاسی پاٹیاں ھوار ھر تک ءُ پھناتاں سیادی داروکیں مردماں گوں لوٹ کن ایں کہ کمپئن ءِ بھر جوڈ بہ بنت ءُ اشی ءِ سوبمند کنگ ءِ ھاتر ءَ وتی کرد ءَ پیلو بہ کن انت –