بارکھان وئیل: جونانی ھمراھی ءَ سر وزیر سیکرٹریٹ دیم ءَ نندانک

بلوچستان ءِ سوبائی وزیر سردار عبدالرحمان کھیتران ءِ زنداناں بندیگیں ءُ پدا رند ءَ کُشگ بوتگیں مات ءُ زھگانی کوش ءَ پد دمگی مردماں آھانی جون زرتگ ءُ وت ءَ شال ءَ سرکتگ –

بارکھان ءَ دست کپتگیں زالبول ءُ آئی ءِ زھگانی جونانی ھمراھی ءَ مری ٹک ءِ بازیں مردمے چہ بارکھان ءَ شال ءَ اتکگ انت، کھول ءِ مردماں سوبائی وزیر سردار عبدالرحمن کھیتران ءِ بگیری ءَ سروزیر سیکٹریت دیم ءَ جون ایر کتگ انت ءُ نندانک ءَ نشتگ انت –

کُشگ بوتگیں مردمانی نماز جنازہ کوہلو ءِ عیدگاہ ءَ وانگ بوتگ ءُ پدا آھانی جون شال ءَ آرگ بوتگ انت –

درنگاز کنوکاں لوٹ کتگ کہ تاں ھما وھد ءَ مئے زھرشانی نندانک برجاہ بیت وھدیکہ سوبائی وزیر درکنگ ءُ دزگیر کنگ نہ بیت- وھدیکہ زھرشانی ءَ چارگردی ءُ راجداریں گلانی باسک ھم ھوار انت –

گوستگیں روچ ءَ بارکھان حاجی کوٹ ءَ سَے مردمانی جون دست کپتگ انت کہ پدا رند ءَ آھانی پجار کنگ بوتگ کہ آ کوھلو ءِ جھمنند خان محمد مری ءِ لوگبانک گراناز، دو زھگ محمد نواز ءُ عبدالقادر ءِ جون انت – اے مردم سوبائی وزیر سردار عبدالرحمان کھیتران ءِ زندانے ءَ دگہ پنچ وارسانی ھمراھی ءَ بندیگ بوتگ انت –

وئیل ءِ درگت ءَ خان محمد ءِ گوشگ ءَ ات کہ سردار عبدالرحمان کھیتران ءِ گوشگ ءِ پد ءَ منی گِس ءِ ھشت مردم منی لوگبانک گراناز، زھگ فرزانہ، عبدالستار، عبدالغفار، محمد عمران، محمد نواز، عبدالمجید، ءُ عبدالقادر آوار جتگ ءُ حاجی گوٹ بارکھان ءَ وتی زندانے ءَ بندیگ کتگ انت –

گوستگیں شپ ءَ دمگی پولیس ءَ خان محمد مری ءِ لوگبانک ءُ دو زھگانی ژانگولیں جون چہ یک چات ءَ دست کپتگ انت کہ آئی ءَ پد خان محمد ءَ جونانی پجار کتگ ءُ کہ منی لوگبانک ءُ زھگ انت کہ سردار عبدالرحمان ءِ زنداناں بند بوتگ انت –

دومی نیمگ ءَ چاگردی ترامجاھاں جونانی دست کپگ ءِ درگت ءَ سوشل میڈیا ایکٹوسٹ وتی زھرانی درشانی ءَ کنگ ءَ انت ءُ سوبائی وزیر ءِ دزگیر کنگ ءِ لوٹ ءَ کنگ ءَ انت –

وئیل ءِ درگت ءَ مروچی سوبائی اسمبلی ءَ باوست ءِ بوتگ سوبائی وزیر نصیب اللہ مری ءَ چہ اسمبلی ءَ بائیکاٹ کتگ وھدیکہ ثناء بلوچ ءَ وئیل ءَ ھواریں مردمانی آمیدگس ءَ ارگ ءِ لوٹ کتگ –

دومی نیمگ ءَ بارکھان وئیل ءِ درگت ءَ پٹ پول ءِ ھاتر ءَ لورلائی ءِ ڈی آئی جی ءِ چیرمین شال انسٹی گیشن ءِ ایس ایس پی ءُ بارکھان ءِ اسپیشل برانچ ءِ نمائندگانی سروکی ءَ جی آئی ٹی اڈ دیگ بوتگ ءُ وئیل ءِ درگت ءَ سِی روچاں تاں رپورٹ پیش کنگ ءِ ھکم دیگ بوتگ –

دومی نیمگ ءَ عبدالرحمان کھیتران ءَ کوش ءِ الزام رد کتگ انت – آئی ءَ اھوالکاراں گوں تران کنان ءَ گوشتگ کہ منی جند ءِ زندان نیست ءُ مردمانی کشگ ءِ الزام ءَ منی ساک ءَ تاوان دیگ ءِ سازش ءِ بوگ ءَ انت –

آئی ءَ گوشتگ کہ منی گِس ءِ سر ءَ گوستگیں سرکار ءَ پٹ پول کتگ اگاں زندان ءِ بہ بوتیں گڈا زاھر بوتگ انت – اگاں ھنگت کسے ءَ منی سر ءَ باور نہ کنت آ بہ ایت ءُ منی گِس ءَ بچاریت – آئی ءَ اے ھم گوشتگ کہ آئی ءَ چہ دمگی سیاست کنگ ءَ زبھر کنگ ءِ کوشست بوگ ءَ انت بازیں مردمے دمگ ءِ جاورانی ھراب کنگ ءِ پندل کنگ ءَ انت ءُ مناں بدنام کنگ ءِ سازش بگیری ءَ.من آمیدگس ءَ رواں –