مند ءَ ماھل بلوچ ءِ زورانسری آوار جنی ءِ بگیری ءَ زھرشانی ءُ روانک

بلوچستان ءِ بنجاھی شھر شال ءَ پاکستانی پوج ءِ دست ءَ زورانسری آوار جنگ بوتگیں ماھل بلوچ ءِ زورانسری آوار جنی ءِ بگیری ءَ مند سورو ءَ آئی ءِ کھول ءُ زالبولانی نیمگ ءَ زھرشانی روانک ءِ کشگ بوتگ –

درنگاز کنوکانی دست ءَ ماھل بلوچ ءِ اکس ءُ پلے کارڈ بوتگ انت کہ آھانی سر ءَ ماھل بلوچ ءِ زورانسری آوار جنی آئی ءِ سر ءَ جنگ بوتگیں دروگیں ارزی ترندی ءَ گوں ایرجتگ ءُ سرکار ءُ پوجی ادارھانی بگیری ءَ نارہ جتگ –

درنگاز کنوکیں زالبولانی گوشگ ات پہ مئے مردینانی ننگ ءِ ھاتر ءَ چی پشت کپتگ کہ زالبول ءِ برگ بہ بیت لٹ شاپ کنگ بہ بیت ـ اگاں ما پہ ماھل ءَ دگہ چیزے کُت نہ کنیں بلے پہ آئی ءَ یک توارے چست کُت کنیں ـ

درنگاز کنوکانی گوشگ ات ماھل ءِ سر ءَ زلم کنگ بوگ ءَ چدو پیسر آئی ءِ لوگواجہ شھید کنگ بوتگ ، آئی ءِ وسرک شھید کنگ بوتگ ، ماھل بلوچ لوگ ءَ چہ بے لوگ کتگ آ لاچار بوتگ شتگ شال ءَ باڑھے سر ءَ لوگ زرتگ کہ وتی زھگاں وانیناں بلے مرچی ھمودا اے ریاست ءَ وتی ھرجان جتگ – ماھل بلوچ تھنا منی گھار نہ انت سرجمیں بلوچ راج ءِ گھار انت – مرچی اگاں ما پہ ترس ماھل ءِ واست ءَ پاد میا ایں باند ءَ من بیت کناں، پدا شمے مات ءُ گھار بیت کناں – مرچی ماھل ءِ ھاتر ءَ توار چست بہ کنے تانکہ باندا شمے سر ءَ اے نوبت مہ ایت –

درنگاز کنوکاں ماھل ءِ سر ءَ جنگ بوتگیں دروگیں کیس ءِ ھلاس کنگ ءُ آئی ءِ یل کنگ ءِ لوٹ کتگ –

ھمے وھد ءَ پاکستانی پوج ءَ دمگی دکاندارانی دکانی بند کنگ ءِ پد ءَ آ دزگیر کنگ ءِ جھد کتگ انت کہ درنگاز کنوکیں زالبولاں آ دزگیر بوگ ءَ نہ اشتگ انت –

زانگ بہ بیت ھمے ماہ ءِ ھبدہ ءُ ھژدہ فروری ءِ میانی شپ ءَ ادار یانزدہ ءِ نزیک ءَ پاکستانی پوج ءَ بلوچستان ءِ بنجاھی شھر شال ءَ بلوچ زالبول ماھل بلوچ گوں ھمراھے زھگاں چہ جند ءِ گِس ءَ زورانسری آوار جتگ ءُ بیگواہ کتگ –
بیڑ بری ءِ دومی روچ ءَ بلوچ گل ءُ انسانی ھکانی ترندیں زھرشانیانی سوب ءَ سی ٹی ڈی ءِ واکداراں بلوچ زالبول ءِ دزگیری منّ اِتگ ءُ آئی ءِ سر ءَ بازیں ارزی ءِ نبشتگ کتگ –

ماھل بلوچ ءِ زورانسری آوار جنی ءُ پدا رند ءَ آئی ءِ سر ءَ جنگ بوتگیں دروگیں بھتامانی بگیری ءَ بلوچستان ءِ جتا جتائیں دمگاں زھرشانیانی درچ برجاہ انت گوستگیں روچءَ شال سریاب دگ بلوچ وومن نیمگ ءَ زھرشانی نندانک ءِ کنگ بوتگ کہ پدا رند ءَ واکدارانی گند ءُ نند ءَ پد ننداک ھلاس کنگ بوتگ –
ماھل بلوچ ءِ تُرو ءَ شال ءِ نندانک ءِ سر ءَ وئیل درگت ءَ گوشتگ کہ پاکستانی پوج ءَ مئے گِس ءَ بیڑ برتگ بیڑ ءِ میان ءَ مارا دگہ کوٹی ءَ بند کتگ ءُ ماھل دگہ کوٹی ءَ برگ بوتگ ءُ آ لٹ شاپ کنگ بوتگ –

ماھل بلوچ ءِ درکانودی آوار جنی ءِ بگیری ءَ نودربر ءُ سیاسی گلانی نیمگ ءَ بلوچستان ءَ ھوار پاکستان ءِ دگہ شھراں زھرشانی کنگ ءِ جار جنگ بوتگ – درنگاز کنوکاں لوٹ کتگ ءُ گوشتگ کہ ماھل بلوچ ءِ سر ءَ جنگ بوتگیں ارزی ھلاس کنگ بہ بنت ءُ آ یل کنگ بہ بیت ءُ بلوچستان ءَ یکجاھیں سزا ءَ زالبولانی نشانگ کنگے کار یل کنگ بہ بیت-