نوشکی ءَ دھکان کاراں لین نیستی ءِ بگیری ءَ زھرشانی کنان ءَ شھدگ بند کتگ

نوشکی ءَ لینانی بازیں لوڈشیڈنگ ءِ بگیری ءَ دھکان کار ءُ لس مردمانی زھرشانی، درنگاز کنوکاں زھرشانی کنان ءَ آر سی ڈی شھدگ تاں ھشت ادار ءَ بند کتگ چریشی ءَ ھردو نیمگاں گاڑیانی لین لگ اِتگ –

زھرشانی سوب ءَ بازیں مساپر ءِ اڈوجنجالانی دیمپان بوتگ کہ پد ءَ رند ءَ دمگی واکدارانی گند ءُ نند سوبمند بوتگ گڈا شال تاں تفتان شھدگ پچ کنگ بوتگ –

نوشکی ءِ کُچگی دمگاں لینانی بیست ءُ دو ادار ءَ لوڈشیڈنگ ءُ نوشکی ءِ راہ ءَ چہ اوگانستان ءَ یوریا کھاد آرگ ءِ سر ءَ بندش ءِ بگیری ءَ زمیندار ایکشن کمیٹی ءِ جار ءِ پد ءَ دھکانکاراں مل ءِ دمگ ءَ شال تاں تفتان ءَ رؤکیں شھدگ ءِ سر ءَ زھرشانی کتگ ءُ دگ بند کتگ ءُ چہ مل گریڈ ءَ دالبندین ءَ رؤکیں لین ھم بند کتگ انت –

ھمے وھد ءَ گوں دھکانکاراں تران کنان ءَ میر محمد اعظم ماندائی، گوستگیں سوبائی وزیر حاجی میر غلام دستگیر بادینی، میر خورشید احمد جمالدینی، حاجی شاہ زمان جمالدینی ءُ دگہ مردماں گوشتگ کہ ھمک روچ یکشل ءَ بیست ءُ دو اداراں ءَ لینانی لوڈشیڈنگ ءِ سوب ءَ نوشکی ءِ کشت ءُ کشار نام ءُ نشان گار بنت ءُ دھکانکار دو وھدے نگن ءَ چمدار بنت ءُ وامدار بنت –

آھانی گوشگ ات کہ دھکانکار لاچار بوتگ ءُ دگانی سر ءَ در اتکگ انت کیسکو ءِ واکدار نوشکی ءِ مردم ءُ دھکانکارانی گوم ءَ شر بہ بیت –

نوشکی ءِ اسسٹنٹ کمشنر زائد شاہوانی ءَ گوں زمیندار ایکشن کمیٹی ءِ رھشوناں گند ءُ نند کتگ ءُ دمگی واکدارانی باور کنائینگ ءَ ھشت اداراں پد آر سی ڈی شھدگ پچ کنگ بوتگ –