چاریگ، پوج ءُ موبائیل ٹاور ءِ سر ءَ بوتگیں اُرشانی زمّہ واری بلوچ سلاہ بندیں گلاں منّ اِتگ انت

الم بوانیت

بلوچستان ءِ جتا جتائیں ھند ءُ دمگاں ریاستی چاریگ ءُ موبائیل ٹاور ءُ پاکستانی پوج ءِ سر ءَ اُرش کنگ بوتگـ اُرشانی زمّہ واری بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ لبریشن آرمی ءَ منّ اِتگ انت-

گوستگیں شپ ءَ ھاران دمگ لجے ءَ  محمد جان نامی مردمے ءِ سر ءَ سلاہ بندیں مردماں اُرش کُتگ ءُ آ کُشتگ دومی نیمگ ءَـ آئی ءِ کوش ءِ زمّہ واری بلوچ لبریشن آرمی ءَ منّ اِتگ-

بی ایل اے ءِ جارکش جیئند بلوچ ءَ وتی آفیشل ٹیلی گرام چینل ھکل ءَ شنگ کرتگیں درشان ءِ تہءَ گوشتگ کہ مئے سرمچاراں ھاران ءِ دمگ لجے ءَ زورگیریں پاکستانی پوج ءُ چیریں ادارھانی یک کارمندے ءِ سر ءَ اُرش کُتگ ءُ آ کُشتگ، آئی ءِ سلاہ دستیگ کُتگ-

جارکش ءَ گوشتگ کہ مئے سرمچاراں گوستگیں شپ ءَ لجے ءَ اُرش کُتگ ءَ محمد جان ء حسن خان ساسولی کُشتگ ءُ چہ آئی ءَ یک کلاشنکوپ ءِ ھم دستیگ کُتگ-

جارکش ءَ گوشتگ کہ دژمن ءِ دیم ءَ باجو بوتگیں اے مرد ءَ بازیں وھدے بوتگ کہ زورگیریں پاکستانی پوج ءُ چیریں ادارھانی جوڑ کرتگیں ٹولی ءِ بھر بوتگءُ لجے ءُ کش ءُگوری دمگاں کار کنگ ءَ بوتگ- اے مرد ءَ پوجی لشکر کشیانی وھد ءَ دژمن ءِ کمک کنگے ھاتر ءَ زالبول ھم بلیک میل کتگ ءُ پہ دژمن ءِ کارانی کنگ ءَ کارمرز کتگ انت-

جارکش ءَ گوشتگ کہ بلوچ لبریشن آرمی اے مرد ءِ کوش ءِ زمّہ واری ءَ منّیت- ما پیش ءَ گوشتگ کہ دژمن ءِ گوشگ ءِ پد ءَ کار کنوکیں ریاستی چاریگ ھچ وڑءَ پھل کنگ نہ بنت ءُ اے ٹولی ءِ دومی کارمند زوت نشانگ کنگ بنت-

دومی نیمگ ءَ بلوچستان ءِ دمگ مند کوہ ڈگار ءَ سلاہ بندیں مردماں موبائیل ٹاور ءِ مانداشتگ ءُ گوستگیں روچ ءَ ھپت فروری ءَ کولواہ ءِ دمگ چمبر ءَ پوج ءِ سر ءَ اُرش کنگ بوتگ-

موبائیل ٹاور ءِ ماندارگ ءُ پوج ءِ سر ءَ بوتگیں اُرشانی زمّہ واری بلوچستان لبریشن پرنٹ ءَ منّ اِتگ اَنت- 

بی ایل ایف ءِ جارکش میجر گْوھرام ءَ وتی آفیشل  ٹیلی گرام چینل آشوب ءَ پاکستانی پوج ءِ گوں چیر کرتگیں شورھاں نشانگ کنگ ءِ زمہ واری منّ اِتگ ءُ گوشتگ کہ ھپت پروری ءَ آواران ءِ ھند کولواہ چمبر ءَ سرمچاراں پاکستانی پوج ءِ یک ادارکی ڈوارے ءَ تراک ناکیں شورہ چیر کرتگ، زورگریں پوج اے ڈواراں پہ کاروان ءِ پکٹ سیکورٹی ءَ کارمرز کنت، ھپت پروری ءَ دو پوجی  کارمند ھمیشی ءِ تہ ءَ پترتگ اَنت کہ اے ترک اِتگ اَنت کہ چہ ایشی ءَ دوئیں پوجی کارمند سک باز زدگ بیتگ اَنت-

جارکش ءَ دیمتر ءَ گْوشتگ کہ چارشمبے ءَ ھشت پروری ءِ شپ ءِ ساھت نُھءَ سرمچاراں مند ءِ دمگ کوہ ڈگار ءَ پاکستانی ٹیلی کمیونیکیشن لمیٹڈ یوفون موباھل ءِ یک ٹاورے سر ءَ اُرش کتگ ءُ مانداشتگ-

 میجر ءَ گوشتگ کہ بلوچستان ءِ وتواجھی ءَ تاں پاکستانی لشکر انفراسٹرکچر ءُ دگہ ھاسیں شوربندیانی سر ءَ اُرش برجاہ بنت-

نوکتریں