اوگانستان ءِ انیگیں در کارانی وزیر امیر خان متقی ءَ پشاور پولیس مسیت ءَ بیتگیں وتکُشیں اُرش ءُ پاکستان ءِ نیمگ ءَ اوگانستان ءِ سرءَ بھتام جنگ ءِ پُشدرءَ گُشتگ کہ پاکستان ءَ اوگانستان ءِ سرءَ بھتام جنگ ءَ پیسر سرجمی ءَ پَٹ ءُ پول کنگ لوٹیت، ءُ پاکستان ءِ وزیر وتی گِسانی سرءَ کپتگیں برپ ءَ ھمساھگانی چھت ءِ سرءَ دور مہ دی اَنت۔
اوگان دری کارانی وزیر ءَ گُشتگ کہ ما پاکستان ءَ گشیں کہ آ پشاور اُرش ءِ سرجمی ءَ پَٹ ءُ پول بہ کن اَنت پرچہ کہ اَے دمگ جنگ، شورہ ءُ تراکاں چہ واکپ داریں دمگ اِنت، ءُ اے ممکن نہ اِنت کہ یک وتکُشیں جیکٹ ئے ءَ چہ مسیت ءِ سرجمیں چھت تاوانبار بہ بیت۔
آئی ءَ دیمترءَ گُشتگ کہ وتی 20 سالی جنگ ءِ تہءَ چُشیں وتکُشیں جیکٹ نہ دستگ کہ چریشی ءَ مسیت ءِ سرجمیں چھت بال بہ کنت ءُ بازیں مردماں گوں وت بہ بارت۔
پمیشکہ اوگان دری کارانی وزیر ءِ گُشتن ءَ پاکستانی سرکار پشاور وتکُشیں تراک ءِ سرجمی ءَ پَٹ ءُ پول بہ کنت ءُ اوگانستان ءِ سرءَ بھتام جنگ ءَ چہ پھریز بہ کنت۔
زانگ بہ بیت کہ گوستگیں روچاں پاکستانی پرگینگ خیبرپختوا ءَ پشاور پولیس لائنز ءِ مسیت ءَ ظھر ءِ نماز ءِ نیام ءَ یک وتکُشیں تراکے ءَ مسیت ءِ امام ءُ پولیس کارمنداں ھوار کساس 100 مردم بیران بیتگ اَت۔