زاھدان: یک دگہ ورنایے بندیگجاہ ءَ پاھو ءِ ھکم دیگ بیتگ

زاھدان ءَ زھرشانی ءِ وھد ءَ دزگیری بیتگیں مردمانی تہ ءَ چارُمی ورنا ءِ سر ءَ ھم پاھو ءِ ھکم دیگ بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی لشکر ءِ دست ءَ گرگ بیتگیں ابراھیم ناروئی ءِ سر ءَ ھم مروچی ایرانی آمیدگس ءَ پاھو ءِ ھکم داتگ –

ابراھیم ناروئی گوستگیں سال ءِ سَے اکتوبر ءَ دوھزار ءُ بیست ءُ دو ءَ ماں زاھدان ءَ چیریں ادارھانی لس پوشاکی کارندھاں آوار جتگ ءُ برتگ –

فارسی نیوز بلوچ گزارش ءِ رد ءَ ابراھیم یک ھپتگے ءَ چیریں زانداناں کنگ بیتگ ءُ پد ءَ آئی ءِ سر ءَ بے کساس لٹ ءُ کٹ لنگ ءَ پد آئی ءِ سر ءَ جتگیں بھتامانی سر ءَ دزنشان چنگ بیتگ-

بھتامانی سر ءَ دزنشان ءَ پد ایرانی پاسداران انکلاب ءِ آمیدگس زاھدان ءَ آئی ءِ سر ءَ پاھو دیگ ءِ ھکم داتگ-

زاھدان ءِ آمیدگس ءِ جج ءَ گشتگ کہ گاں ابراھیم ناروئی ءِ بے گناھی ءِ منانک ھست گڑا آئی ءِ سر ءَ کسے دیم ءَ گپ بہ جنت ءُ آئی ءِ پاھو دارگ بیت اِنت-

زانگ بہ بیت ھمے زوتاں سَے دگہ ورناہ ھم زھرشانیاں ھواری ءِ بھتام ءَ پاھو ءِ دیگ ءِ ھکم دیگ بیتگ اَنت-

اے سئیں ورنایانی تہ ءَ شعیب میر بلوچزئی ریگی، منصور دھمردہ ءُ کامبیز خروت ءِ نام ھوار اَنت کہ ھرسئیں کس کسان سالیں ورناہ اَنت-